Ortalyq kommýnıkasııalar qyzmeti alańynda Densaýlyq saqtaý mınıstrligi sanıtarlyq-epıdemııalyq baqylaý komıteti tóraǵasynyń orynbasary Nurlybek Asylbekov dári-dármekpen qamtamasyz etý sharalary jóninde keńinen málimdedi. Onyń aıtýynsha, atalǵan maqsatqa óńirlerge 17,9 mlrd teńge bólindi.
«Qazirgi kezde dárihanalarda halyqtyń dárilik zattarǵa qajettiligin qamtamasyz etý úshin dárilik zattar jetkilikti. Monıtorıngtik toptar 1 640-tan asa dárihanany tekserip, shekti baǵadan asyrylyp, satylǵan dárilik zattardyń 199 ataýyn anyqtaǵan. Atalǵan kezeńde 174 mln teńge somasynda shekti baǵanyń artýynyń 876 faktisi, 39,4 mln teńge somasynda dárilik zattardy zańsyz ótkizýdiń 347 faktisi anyqtaldy. Sondaı-aq 1 223 ákimshilik hattama toltyrylyp, 213 mln-nan asa aıyppul salyndy. Zańsyz aınalymnan 10 mln-nan asa dárlik zat alyndy, dedi N.Asylbekov.
Sonymen qatar vedomstvoaralyq komıssııanyń tapsyrmasymen indettiń jańa tolqynyna daıyndyq maqsatynda biryńǵaı dıstrıbıýtor birqatar sharalar qabyldady. Bul týraly «SK – Farmasııa» JShS basqarma tóraǵasy Erhat Esqalıev jan-jaqty málimet berdi.
«Birinshiden, barlyq medısınalyq uıymdarda aılyq qordy qalyptastyrý qolǵa alyndy. Búginde biryńǵaı dıstrıbıýtor 20 mlrd teńgeden asa somaǵa 91 dárilik zat kólemin jetkizdi. Ol tez qalpyna keltirilip otyrady. Ekinshiden, pnevmonııa men KVI bar naýqastardy antıbıotıktermen jáne dene qyzýyn túsiretin dári-dármekpen tegin ambýlatorlyq qamtamasyz etý uıymdastyryldy. Shamamen 2 mlrd teńge somasyna 1 mln-ǵa jýyq adamdy qamtý josparlanǵan. Úshinshiden, «qaýipsizdik jastyǵy» dep atalatyn eki aılyq dári-dármekter qory quryldy. Stasıonarlarda aıyna 60 myń pasıent bolady degen boljammen koronavırýs ınfeksııasyn emdeýge arnalǵan dári-dármekterdiń 44 ataýy satyp alynady, – dedi E.Esqalıev.
Onyń aıtýynsha, ázirge 44 ataýdan dári-dármektiń 39 túri satyp alyndy. Gýmanıtarlyq kómek sheńberinde qajetti dári-dármekti jetkizý máselesi qosymsha pysyqtalýda. Tómendemeıtin qor kólemi bekitilgen kestege sáıkes biryńǵaı dıstrıbıýtordyń 4 habyna dárilik zattarǵa paıyzdyq araqatynasta qajettilik faktisi boıynsha jetkiziledi. Tómendemeıtin qor Densaýlyq saqtaý mınıstrliginiń boljamy negizinde medısınalyq uıymdardyń ótinimderinen tys qalyptastyrylǵan jáne naqty óńirde naqty pozısııalar boıynsha aýrýdyń órshýi jaǵdaıynda paıdalanylady. Paıdalanylatyn kólem jedel túrde qosymsha satyp alýmen tolyqtyrylady. Osy sıkldy tolyqtyrý úshin eki aı ýaqyt jetkilikti.
