Kúres túrlerinen el chempıonaty ótedi degen habar áldeqashan taraǵanymen, basshylyq tarapynan naqty jaýap bolǵan joq. Sebebi, koronavırýsqa baılanysty iri jarystar uıymdastyrýǵa áli de tyıym salynǵan. Federasııa ókilderi Almaty qalalyq dene shynyqtyrý jáne sport basqarmasymen biraz ýaqyt kelissóz júrgizgennen keıin balýandar básekesiniń bıyl uıymdastyrylatyny resmı túrde habarlandy.
Almatydaǵy týrnırge kóremender qatystyrylmaıdy. Sanıtarlyq-epıdemıologııalyq talaptardy saqtap, bir jerde júzden asa adamnyń shoǵyrlanýyna múmkindik bermeý úshin bul qadamnyń durys ekenin anyq.
Sondaı-aq, ár oblystan 15 sportshy, 2 jattyqtyrýshy, 2 tóreshi jáne bir ókildiń qatysýyna ruqsat bar.
Jarysqa kelýshiler (sportshylar, bapkerler, ókilder, tóreshiler) týrnırge qatysardan 1-3 kún buryn aralyǵynda PTR test tapsyrýǵa mindetti. PTR test teris nátıje kórsetkende ǵana, balýandar el chempıonatyna jiberiledi.
Sonymen qatar, jarysqa qatysýshylar óz aımaqtarynda medısınalyq tekserýden ótip, densaýlyǵynda eshqandaı aqaý joqtyǵyn dáleldeıtin anyqtamany mandattyq komıssııaǵa tapsyrýy tıis.
Ár komandada sportshylar men basqa da ókilderdiń densaýlyq jaǵdaıy týraly uıymdastyrýshylarǵa habarlap otyratyn dárigerdiń bolýy - basty talaptardyń biri.
Qazirgi ahýalǵa baılanysty Qazaqstan chempıonatynyń ashylý jáne jabylý saltanaty ótkizilmeıdi. Balýandar men jattyqtyrýshylardyń baspasóz máslıhatyn uıymdastyrýyna, suhbat berýine tyıym salynady. Taǵy bir aıta keterligi, beldesýge shyqqan balýandardyń bir-birimen qol alysýyna ruqsat joq jáne marapattaý rásiminde áleýmettik ara-qashyqtyqty saqtaýy qatań qadaǵalanady. Básekeni qabyldaıtyn sporttyq nysannyń barlyq talaptarǵa saı bolýyn uıymdastyrýshylar basty nazarda ustamaq.
Uzaq ýaqyttan beri bozkilemge shyqpaǵan balýandar qaýymy bul dodany asyǵa kútýde. Grek-rım kúresinen komanda bas bapkeri Baqtııar Baıseıitovtiń aıtýynsha, týrnırge qurama úzdikteri tegis qatysady.
«Qazaqstan chempıonaty aldaǵy maýsym qarsańynda ulttyq quramany jasaqtaý úshin taptyrmas doda. El birinshiligi barysynda jańa esimder shyǵyp jatsa, birden bas komandaǵa shaqyrtý alady. Sebebi, osy dodada úzdik atanǵan jastar bizdiń bolashaǵymyz bolmaq. О́zderińiz biletindeı, búginde ulttyq qurama sapyndaǵy balýandardyń basym bóligi ózderiniń sońǵy olımpıadalyq kezeńderinde ter tógip júr. Máselen, Nurmahan Tinálıev, Almat Kebispaev, Demeý Jadyraev, Ashat Dilmuhamedov syndy tisqaqqan bozkilem sheberleri úshin bul sońǵy olımpıadalyq kezeń bolýy yqtımal. Sondyqtan, bizge búgingi batyrlardyń ornyn basatyn izbasarlar kerek", - deıdi bas bapker.
Áıelder kúresinen komanda bas bapkeri Nurlan Amanqosov ta el birinshiliginde jas sportshylardyń kózge túsetinin senimdi.
"Qazaqstan chempıonatyna ulttyq qurama sapynan qatysatyndar tizimi jarys jaqyndaǵanda belgili bolady. Qazaqstan chempıonaty nátıjesinde jańa esimder shyqsa ulttyq quramaǵa shaqyramyz. Jeńimpaz ben júldeger atanǵan sportshylar qatarynan jas balýandar kezdesedi dep oılaımyn. Olımpıada oıyndaryna deıin qazirgi quramnyń ózgerý-ózgermeýi sportshylarǵa tikeleı baılanysty. Eger álemdik dodalarda ózderin jaqsy kórsetip, joǵary nátıjege qol jetkizip júrse, árıne, quramadaǵy oryndary saqtalady. Al eger jańa esimder shyǵyp, jas balýandar halyqaralyq arenada el namysyn abyroımen qorǵap júrse, onda solarǵa múmkindik beriledi. Olımpıadaǵa da dál solaı, kim daıyn - sol barady», - deıdi bapker.
Erkin kúresten eki dúrkin Azııa chempıony Danııar Qaısanov bolsa, uzaq úzilistiń balýandar úshin ońaı bolmaǵanyn aıtady.
«Biz segiz aıdan beri eshqandaı jarysqa qatyspadyq. Bul kásibı sportshy úshin úlken úzilis. Qarasha aıynda el chempıonaty uıymdastyrylady degen habar aldyq. Shyny kerek, qýanyshty jaıt. Búginge deıin kóptegen elder ishki birinshiligin ótkizip tastady. Sondyqtan, balýandardyń barlyǵy jarys ótetin kúndi asyǵa kútip júr», - deıdi ol.
Kúres túrlerinen 2020 jylǵy Qazaqstan chempıonaty barlyq sanıtarlyq normalardy jáne UWW bekitken erejelerdi saqtaý arqyly ótedi. Týrnır 26 qarashada máresine jetedi.
