Muny atam qazaq asar, asar salý dep ataǵany belgili. Bir-birine janashyrlyǵy, qaıyrym-jaqsylyǵy, birlik-uıymshyldyǵy joq halyq «Kóp túkirse – kól» dep aıta almasa kerek. Osy ıgi dástúrdiń búginde jańasha túrge enip, aýqymyn keńeıte túskeni kóńil qýantady.
Máselen, Qostanaı oblysynyń Amangeldi aýdanyna qarasty Baıǵabyl eldi mekeninen túlep ushqan jastar búginde elimizdiń ár óńirine turaqtap, syrt jerde eńbek etip júrse de, týǵan aýylyna zamanaýı sport alańyn salyp berip, ıgi iske uıtqy bolyp otyr.
Jan-jaqta júrgen baıǵabyldyq jastardy jaqsy iske jumyldyryp, bastama kótergen Bolat Jumaǵalıev búginde Taldyqorǵan qalasynda turady.
– О́zim Taldyqorǵan qalasyndaǵy meshitterdiń birinde ımamdyq qyzmet atqaramyn. Osydan bir jyl buryn WhatsApp áleýmettik jelisi arqyly jerlesterdiń basyn biriktirip, «Táýekel!» dep atalatyn top ashtyq. Muny alǵash amandyq-saýlyq bilisip, qysyr áńgime, jalań maqtaý, quttyqtaý aıtatyn jer dep oılaǵandar da boldy. Keıin top múshelerine maqsat-mindetimizdi túsindirip, ózimiz ósip-óngen týǵan aýylymyzǵa paıdasy tıetin perzenttik boryshymyzdy óteýimiz kerek degen úndeý tastadyq. Abyroı bolǵanda, ıgi bastama kópshilik qoldaýyna ıe bolyp, árkim múmkindiginshe óz qaltasynan qarjy qosyp, aýqymdy isti qolǵa alyp, Baıǵabyl aýylynda zamanaýı sport alańyn ashtyq. Osylaısha, álemdi indet jaılaǵan kúrdeli kezeńde aýyldaǵy artymyzdan qaýlap ósip kele jatqan balalar úshin júzdegen jerles azamat jınaǵan qarajatqa aýylda sport alańy boı kóterdi, – dedi Bolat Jumaǵalıev.
Sport alańynyń ashylý rásimine Amangeldi aýdany ákiminiń orynbasary Súndet Ǵanıev, aýdan ákimdigine qarasty birneshe bólim basshylary men aýyl turǵyndary qatysty. Saltanatty jıynda ákim orynbasary baıǵabyldyqtardy jańa sport nysanynynyń ashylýymen quttyqtap, fýtbol alańynyń salynýyna erekshe atsalysyp, jastardy uıymdastyra bilgen Baǵlan Erǵazın men Bolat Jumaǵalıevke aýdan ákiminiń Alǵys hatyn tapsyrdy.
– Amangeldi aýdanynda salamatty ómir saltyn, buqaralyq sportty damytý baǵytynda kóptegen tyndyrymdy ister atqaryldy. Baıǵabyl aýyldyq okrýgindegi fýtbol alańynyń ashylýy – sonyń bir dáleli. Jalpy, buqaralyq sportty damytý oblys ákimi Arhımed Muhambetovtiń tikeleı tapsyrmasy. О́ńir basshysy shalǵaı aýyldardaǵy áleýmettik salanyń damýyn qadaǵalap otyrady. Aýdanymyzda mundaı sharalardyń jıi ótip jatqany qýantady. Mysaly, kúni keshe ǵana Aqsaı aýylynda kúrdeli jóndeýden ótken sport zaly ashyldy, – dedi Súndet Ǵanıev.
Aýdan basshylary Baıǵabyl aýylynyń jas fýtbolshylaryna oıyn doptaryn syıǵa tartty. Odan keıin sóz alǵan Bolat Jumaǵalıev áleýmettik sharaǵa belsene atsalysqan aýyl azamattaryna alǵys hattar men baǵaly syılyqtaryn tabys etti.
– Týǵan jerdi kórkeıtý nıetimen jasalǵan qaıyrymdy iske «Táýekel, jerlester!» tobyndaǵy azamattar kóp eńbek sińirdi. Aýdan basshylyǵynan alǵan marapatty osy áleýmettik jelidegi toptyń jetistigi dep qabyldańyzdar. Áldebireýdiń eńbegin bóle-jara aıtýdyń ózi artyq etedi. Árkimniń óz nesibesi bar. Shyny kerek, Baıǵabyldyń bary da, baǵy da – mektep. Aýylǵa at basyn buryp kelgenderdi qonaq qylyp, álek bolatyn da sol mekteptiń ujymy. Osy joly da úrdis jalǵasty. Muǵalimi men oqýshysy, basshysy men kúzetshisine deıin osy qýanyshtyń basy-qasynda júrdi. Kez kelgen ıgi bastamanyń tártibi men tálimine jaýapty Qýandyq Baqytuly bastaǵan pedagogter qaýymyna alǵysymyz sheksiz. Ony búkil aýyl adamy kórdi. Sonaý Almaty oblysynan Serik esimdi ámbebap mamandy shaqyrtyp, sport alańynyń sapaly salynýyna jaǵdaı jasadyq. Ol kisini aýyl adamdary qonaq qylyp, qazaqy dástúrmen laıyqty shyǵaryp saldy. Jerlester rıza, oıyn balasynyń qýanyshynda shek joq. Kópten kútken sport nysany boı kóterdi. Mine, bizge budan artyqtyń qajeti joq, – dedi Bolat Saǵynǵalıuly.
Aýyl sportynyń keshegisi men búginin jaqsy biletin ardager sportshy Aıtmuhambet Bıǵabylovtyń sózinshe, jasandy jamylǵysy bar fýtbol alańynyń sapasy jaqsy. Qurylysy tez arada aıaqtalsa da, jumystar jınaqy, tııanaqty istelgen.
– «Ýatsapta» ashylǵan toptyń basty maqsaty – týǵan aýyldyń kem-ketigin túzep, gúldenýine atsalysý. Osy maqsatta aldaǵy jyldary jańa jobalarǵa jol ashylady. Ony qoldaý – aýyldyń ár azamatynyń abyroıy. Bolat, Qýandyq, Baǵlan sııaqty belsendi jastar josparlarymen bólise jatar, – deıdi «Táýekel, jerlester» tobynyń múshesi Murat Nurjanov.
Baıǵabyldyq volonterler aldaǵy ýaqytta aýyl ortalyǵynan saıabaq ashyp, aýyl mańyndaǵy ózen jaǵasyn abattandyrýdy kózdep otyr.
Qostanaı oblysy
Amangeldi aýdany
Baıǵabyl aýyly
