Alǵashynda «Aqtóbe qalalyq sal aýrýyna shaldyqqan azamattardy qoldaý qory» qoǵamdyq birlestiginde erikti bolǵan, sol arqyly júrip-turýy qıyn adamdarǵa járdemdesken Maral – «D.A.R.» klýbyn qurýshylardyń biri. Bul salaǵa onyń joldan qosylmaǵanyn, úlken daıyndyqpen kelgenin aıtpaı ketýge bolmaıdy.
– 2007 jyly AQSh-tyń Qazaqstandaǵy ókildigi – Beıbitshilik korpýsy uıymynyń sheteldik eriktisine kýrator atandym. Onymen kezdespesten buryn Almaty qalasyna baryp, arnaıy kýrstan óttim. Semınarlarǵa qatystym. Tek qana aǵylshynsha sóıleıtin Perrı Teıcherdiń basty maqsaty – Quralaı Bazarbaıqyzy ashqan birlestiktiń jumysymen tanysý, mundaǵy densaýlyǵy dimkás adamdardyń jaǵdaıyn bilý. Áýelde ekeýmizdiń ózara túsinisýimiz qıynǵa soqqanyn jasyrmaımyn, tek ym-ısharamen «áńgimelesip» júrdik. Biraq «Qalaýyn tapsa, qar janady» degen ras eken. Bul meniń volonterler jumysyna odan saıyn etene aralasýyma da septigin tıgizdi. Ile-shala óz uıymymyz ashyldy, – dep ótken kúnderdi úlken tebirenispen eske aldy Maral.
Ulttyq volonterlik jelisiniń quramyna kiretin «D.A.R.» eriktiler klýbynyń qazirgi tańda 120 múshesi bar. 14 pen 75 jas aralyǵyndaǵy volonterlerdiń kóshbasshysy Maral úshin árqaısysynyń orny bólek. Al birlesip atqarǵan jumystarǵa ol erekshe ekpinmen toqtalady. Aıtalyq, uıymnyń eń alǵashqy jobasy – «Altyn júrek» aksııasy aıasynda múmkindigi shekteýli balalardy tárbıelep otyrǵan ata-analar qoldaý tapsa, «Sporttyq volonterlik», «Áleýmettik týrızm», «Biz birgemiz!», t.b. jobalary tirek-qımyl júıesi buzylǵan aqtóbelikterdiń bir sátke bolsa da kóńilin aýlaýǵa hám sergitýge baǵyttalǵan. Bulardyń barlyǵy – jyl saıyn ótkiziletin, ábden dástúrge aınalǵan jobalar.
«Áli de júzege asa qoımaǵan joba-josparlar bar, árıne. О́ńirde eriktilerdiń lageri uıymdastyrylsa, arnaýly toptaǵylardyń arasynda hokkeı oıyndary ótkizilse, keremet bolar edi. Bárinen buryn, volonterliktiń qyr-syryn úıretetin, onyń mán-mańyzyn jete túsindiretin arnaýly baǵdarlamalar qolǵa alynsa eken. Bilikti mamandar semınarlar ótkizýi kerek. Olar barlyǵynyń birinshi kezekte júrek qalaýymen, rııasyz jasalatynyn uǵyndyrsa eken deısiń ǵoı. Áıtpese, bizde áli kúnge eriktiler týraly durys túsinik qalyptaspaǵan. Kózboıaýshylyqqa salynýdan saqtansaq, top bolyp júrýdi volonterlik demesek, bul qozǵalys damı túsedi», – deıdi sóz arasynda áńgimelesýshimiz.
Ortalyq belsendileri talaı respýblıkalyq baıqaýlardan júldemen oralyp júr. Máselen, elordada ótken «Úzdik volonter» saıysynda «Volonterlik boıynsha úzdik joba» atalymy boıynsha «D.A.R.»-dyń jastary ózgelerden oq boıy ozyp shyǵyp, Bilim jáne ǵylym mınıstrligi tarapynan dıplom men baǵaly syılyqqa ıe boldy. Byltyr klýbtyń úılestirýshisi Gaýhar Jumaǵazıevany Prezıdent Qasym-Jomart Toqaevtyń ózi marapattady. Sonymen birge uıym kóptegen halyqaralyq, respýblıkalyq qozǵalystardan jemisti jumysy úshin alǵys hattar alǵanyn aıta ketkenimiz abzal. Oblystaǵy eń belsendi eriktiler uıymynyń arqasynda otbasyly bolyp jatqandar da az emes... Jansat-Maqpal, Serik-Lýnara, Nysanbek-Tursynaı, basqa da juptar – ıgilikti isti atqara júrip tabysqandar.
Maraldyń da jetistikteri birtalaı. Onyń erikti bolýmen shektelmeı, jastarmen jumys jasaıtyn trener hám mentor, elimizdiń batys aımaqtary boıynsha ótkizilgen sulýlyq baıqaýynda «Súıkimdi arý» atanǵanyn, ýnıversıtetti úzdik bitirgen maman ekenin keltire keteıik. II toptaǵy múgedek jan úshin bul aıtýǵa turarlyq asýlar emes pe?! Kópshilik taǵdyrlastary sekildi úıde otyryp qalmaı, qaıta aınalasyndaǵy adamdarǵa qol ushyn sozatyn volonter qyzdyń ómirge degen qulshynysy shynymen erekshe. Ol – sondaı-aq jeńil atletıka boıynsha paralımpıadalyq oıyndardyń II dúrkin kúmis júldegeri, arbadaǵy bıden Aqtóbede ótken baıqaýdyń jeńimpazy.
– Meniń bir ózgeshe qyrym Aqtóbe oblysynda tuńǵysh ret sheteldik volonterdiń kýratory bolǵanym shyǵar. Iаǵnı sonyń áserinen ózgelermen qazaq, orys jáne aǵylshyn tilderinde qatar sóılesýge daǵdylandym. Áıtpese áleýmettik volonterlik baǵytyn ustanǵandardyń birimin. О́zim de bala jastan múgedek bolǵandyqtan, dene bitiminde ózgeshelik bar adamdardyń muń-muqtajyn jaqsy túsinemin.
Mundaı toptaǵy kisilermen jumys isteý qıyn, olar ashýshań keledi degen pikirmen kelispeımin. Bári adamnyń ózine baılanysty. Degenmen múmkindigi shekteýli azamattarǵa erikti bolý úshin de aıryqsha qabilet kerek. Minez-qulqyn túsinip, psıholog bolýyń shart. Al bul ońaı sharýa emes, – dep syr aqtardy «D.A.R.» eriktiler klýbynyń jetekshisi.
Aıbek TASQALIEV,
jýrnalıst
Aqtóbe
