Fızıka zańdaryna sensek, qara qurdymnyń joıqyn áserinen eshqandaı materııa qutyla almaıdy eken. Qara qurdym dep atalatyny da sol, keńistiktegi búkil jaryqty soryp alatyn alyp úńgirdiń túsi qap-qara, shet-shegi kórinbeıtin tym orasan qubylys.
Jalpy, álem tarıhynda bul taqyrypqa soqpaǵan sana ıesi bolmaǵanyn aıttyq. Qara qurdym týraly kóbine fantazııalyq ádebıette, kınoda jıi qaýzalatynyn da atap kettik. Búgin biz sol qara qurdym aınalasyndaǵy kóp týyndylardyń ishinen eń bir qysqa oqıǵa týraly baıandaǵymyz keledi. Aǵylshyn rejısseri Fılıp Sensom men ssenarıst Ollı Ýılıamstyń «Qara qurdym» degen qysqametrli fılmi adam sanasyn kenet burylǵan kólikteı aýdaryp jiberetin erekshe kartına retinde álemdegi eń bir erekshe sıýjetterdiń qatarynda desek qatelespeımiz.
Asqynǵan sarańdyq adamdy jaqsylyqqa aparmaıdy. Árıne, áńgime jeti atasynan beri jilik maıy úzilmegen baıdyń sarańdyǵy bolsa túsinikti bolar edi. Qyzyq bolǵanda, bul sińiri shyqqan kedeı, ómirde eshqashan joly bolmaǵan qarapaıym jumyskerdiń ashkóz sarańdyǵy. Uzaqtyǵy bar-joǵy úsh mınýttan aspaıtyn qysqametrli bul fılm sarań adamnyń súıkimsiz minezi túptiń-túbinde ózin ózi jutyp tynady degendi aıtqysy keledi.
Úlken ıdeıany júk etken kishkentaı ǵana sıýjetti tolyq baıandaı ketsek, sharshap, jumysynda keshke deıin kidirgen keńse qyzmetkeri bir kúni qyzyq jaıtqa tap bolady. Túri ábden qaljyraǵan, kúni boıy keńseniń eshqashan bitpeıtin qaǵaz jumysynan qajyǵan qyzmetker túnniń bir ýaǵynda jalǵyz ózi qaǵaz kóshirmesin jasaıtyn qurylǵymen jumys istep turady. Qyrsyqqanda qymyran irıdi degendeı, qurylǵy da birer sátke isten shyǵady. О́zi sharshap, tıtyqtap turǵan álgi beıshara úlken qurylǵyny yzalanyp teýip-teýip jiberedi. Sol-aq eken, jaryǵy óship-janǵan qurylǵy qaıta qosylady da qyzmetkerge kerek qaǵazdy emes, ortasynda úlken qara dóńgelek sýreti bar erekshe qaǵazdy basyp shyǵarady. Qyzmetker alǵashynda álgi A2 formatymen basylyp shyqqan qara domalaq sýretke mán bermeı, janyndaǵy ústeldiń ústine tastaı salady. Alaıda qyzyqtyń bári sol sıqyrly qara domalaq sýrette bolyp shyǵady. Basty keıipker sálden keıin qolyndaǵy sý ishken kesesin álgi qara domalaq sýrettiń ústine qoıa salǵany sol edi, kese sýrettiń ishine túsip joq bolyp ketedi. О́z kózine ózi senbegen jigit qolyn aparyp edi, qoly qaǵazdyń ishine op-ońaı kirip ketti de kesesin alyp shyqty.
Mine, ǵajap. Qaljyraǵan qyzmetkerge endi qanat bitip, kózi shyradaı janǵan beıshara álgi qaǵazdy ala salyp dálizde turǵan saýda dúńgirshegine qaraı jóneldi. Sıqyrly qaǵazyn japsyryp, ıesi joq dúńgirshektiń ishinen tátti shokoladty op-ońaı alyp shyǵady. Iаǵnı bul qara qurdym qaǵazdy kez kelgen jerge japsyryp, ar jaǵyndaǵy zatty alýǵa ábden bolady degen sóz.
Qyzmetkerdiń kózi endi basshysynyń bólmesindegi esikke túsedi. Júgirip baryp sıqyrly qaǵazyn japsyra qoıyp esikti ishinen ashyp alady da bólmeniń tórinde turǵan temir seıfke qaraı betteıdi. Bara salyp, «qaraqshy qaǵazyn» seıftiń esigine jelimder-jelimdemesten ishindegi qap-qap aqshany alyp shyǵa bastaıdy. Taý bolyp úıilgen aqsha biter emes, áli de qalǵan sııaqty, qoly jetken jerdiń bárindegi baılyqty túgel syrtqa shyǵarady. Ashkózdigi toıat tappaı, endi álgi qara dóńgelek sýrettiń ishine basyn kirgizip alyp aqshany ári qaraı tonaı bastaıdy. Alaıda seıftiń túbine qaraı taǵy umtyla bergende jartylaı jelimdelgen qaǵaz syrtqa sypyrylyp túsedi de, ashkózdiktiń aranyna beıshara qyzmetker máńgi jutylyp kete barady. Sońǵy kadrlarda qańyraǵan keńse tórinde turǵan seıf, onyń mańynda úıilgen aqsha, jerge sypyrylyp túsken A2 paraǵy jatady.
Shyn máninde, ol qyzmetker qazyna toly qambaǵa emes, óziniń ashkózdigine jutylyp ketken edi.
Mine, osyndaı tamasha ıdeıany ózine ózek etken ómirsheń kartına bizdi birden oı tuńǵıyǵyna osylaı tartyp áketti jáne ulttyń aqadal qazynasyna ury qoldaryn aıamaı suqqan nebir ashkóz, jemqor tıpterdi kóz aldymyzǵa ákeldi.
