Jıynda baıandama jasaǵan energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaev 1 qarashadaǵy jaǵdaı boıynsha baspana kezeginde 28 766 adam turǵanyn aıtty. Jyl basynan beri kezekte turǵan 543 azamat memlekettik turǵyn úı qorynan páter alǵan.
"Kezekte turǵandar sany jyl saıyn artyp kele jatqanyna qaramastan, aýdandarda qurylys qarqyny tómen kúıinde qalyp otyr. Máselen, sońǵy úsh jylda Merki jáne Moıynqum aýdandarynda kezekte turǵandarǵa birde-bir páter berilmegen. Baızaq jáne Jýaly aýdandarynda tek eki úıden, T.Rysqulov aýdanynda tórt úı paıdalanýǵa berilgen", dedi Q.Qorǵanbaev.
Aýdan ákimderi túrli sebep aıtyp, aqtalýǵa tyrysqanymen, aımaq basshysy eger nátıje bolmasa, eshqandaı syltaý kómektespeıtindigin basa aıtty.
"Jambyldyqtardyń turǵyn úı jaǵdaıyn jaqsartý bir qurylymnyń ǵana mindetine kirmeıdi. Buǵan jergilikti ákimdikter de, energetıka jáne turǵyn úı-kommýnaldyq sharýashylyq basqarmasy da jaýapty. Barlyǵy atsalysýy kerek. Aýdandarda bos úıler kóp. Basqarma ákimdiktermen birlesip, olardy rekonstrýksııalaý úshin ınvestorlardy tartýǵa tıis. Máseleni sheshýdiń túrli joldaryn usynyńyzdar", dedi Berdibek Saparbaev.
Q.Qorǵanbaevtyń aıtýynsha, jyl basynan beri "Shańyraq" pılottyq jobasy boıynsha turǵyn úı satyp alýǵa 68 turǵyn, «Baqytty otbasy» boıynsha – 343 turǵyn, «7-20-25» boıynsha - 175 turǵyn nesıege qol jetkizgen.
"Kórsetkishter kóńil kónshitpeıdi. "7-20-25" baǵdarlamasyn iske asyrý nátıjesi boıynsha bizdiń oblys sońǵy orynda tur. Bul birinshi kezekte Taraz qalasy ákiminiń olqylyǵynan der edim. О́ıtkeni, kezekte turǵandardyń basym bóligi oblys ortalyǵynan tirkelgen. Qala ákimi bul máseleni der kezinde sheshe almady. Ákimdikter banktermen birlesip turǵyn úı baǵdarlamalarynyń barlyq tetikteri men artyqshylyqtary týraly jan-jaqty túsindirýi tıis", dep tapsyrdy oblys ákimi.
Apparattyq keńestiń kún tártibindegi ekinshi másele retinde ınjenerlik ınfraqurylymmen qamtamasyz etý jáne jeke turǵyn úı qurylysy úshin jer telimderin berý jaıy qaraldy. Aǵymdaǵy jyldyń 1 qazanyndaǵy jaǵdaı boıynsha jer telimin alý úshin 124 698 adam kezekte tur.
Jer qatynastary basqarmasynyń basshysy Baqtııar Kópbosynov olar boıynsha qurylǵan biryńǵaı baza týraly habarlady "Aýdandarda birneshe jyl qatarynan jobalyq-smetalyq qujattamalar ýaqytyly ázirlenbeıdi. Jeke turǵyn úı qurylysyn damytýdyń 2022 jylǵa deıingi Kartasyna sáıkes keler jylǵa 76 ınfraqurylymdyq joba boıynsha jumys júrgizý josparlanǵan bolatyn, biraq qazirgi tańda onyń tek 15-i ǵana daıyndalǵan. Biz mundaı qarqynmen bul máseleni jýyq arada sheshe almaımyz. Turǵyndar 2006-2007 jyldardan beri áli kúnge deıin kezekte turǵandaryn aıtyp, shaǵymdanýda. Olardyń narazylyǵy oryndy. Turǵyndar ózderi úı salǵysy keledi, biraq biz ol úshin tipti jer bólip bere almaı otyrmyz. Ákimder bul máselege nemquraıly qaraıdy, olarǵa báribir. Olardan osy iske degen talpynys kórinbeıdi. Respýblıkalyq bıýdjetten az qarjy bólinip jatqan joq. Tek ony ýaqytyly ári sapaly ıgerý qajet. Qurylys basqarmasy bul jumystardy úılestire almaýda", dedi oblys ákimi. Jer telimine kezekte turǵandardyń kópshiligi (70 myńnan astam) Taraz qalasynda tirkelgen.
Ol sondaı-aq buǵan deıin turǵyn úı salý úshin ınvestorlardy tartý qajettiligi týraly birneshe ret aıtylǵanyn, al tıisti baqylaýdyń joqtyǵynan paıdalanýsyz jatqan jerlerdi qaıtarý jumystarynyń álsizdigin eske saldy. Bul máseleni jan-jaqty taldaý oblys ákiminiń orynbasarlary Ulan Jazylbek pen Berik Nyǵmashevke arnaıy tapsyryldy.
"О́kinishke oraı, jumystar álsiz júrgizilýde. 28 myńnan astam adam baspana kezeginde, 120 myńnan astam adam jer telimi kezeginde tur. Oblys halqynyń jalpy sanymen eseptesek, bul óte kóp. Meniń atyma kezekte turǵandardan shaǵymdar kún saıyn kelip túsedi. Men olardy da túsinemin. Ákimder qujattarmen uzaq ýaqyt aınalysyp qana qoımaı, ınfraqurylymy bar daıyn ýchaskelerdi de turǵyndarǵa úlestirip berýde sylbyrlyq tanytýda. Olar istelmegen jumys úshin san túrli syltaý oılap tabady. Sizderdiń basty mindetterińiz – halyqtyń ómir súrýine qolaıly jaǵdaı jasaý ekenin umytpańyzdar", dedi aımaq basshysy qala jáne aýdan ákimderine eskertý jasap.
Sondaı-aq, Berdibek Saparbaev kezekte turǵan adamdar óz nómirlerin jáne turǵyn úı máselesine qatysty basqa da aqparattardan habardar bola alýy úshin elektrondy bazanyń jumysyn júıege keltirýdi tapsyrdy. Sonymen qatar, tıisti baqylaýdyń joqtyǵynan, paıdalanýsyz jatqan jerlerdi qaıtarý jumystarynyń álsizdigin atap ótken oblys ákimi bul baǵyttaǵy jumystardy júıeleýdi júktedi.
