Maqalada aıtylǵandaı, Keńes Armııasyna qarasty 66-brıgadanyń 2-batalony 7-rotasyndaǵy 1 jáne 2-vzvodtaǵy 17 jaýyngerdiń Gandjgalda erlikpen qaza tapqany jaıly derekter ashylǵan soń, eleýsiz qalǵan erlerdi izdeýshilerdiń arqasynda 17 erdiń erlikteri laıyqty baǵalaryn alǵan eken. Reseı eli óziniń jaýyngerleriniń bárine derlik Reseı Federasııasynyń Batyry ataǵyn bergen. О́kinishtisi, osy toptaǵy qazaqstandyqtar Serikbaı Turlybaev, Vladımır Prohorenko, Borıs Bochkınniń erlikteri eskerilmeı qalǵan. Kezinde ol jóninde belgili jýrnalıst Qaınar Oljaıdyń da «Tabyt – bireý, taǵdyr – ekeý» maqalasynda sóz bolǵanyn oqı otyryp, óz ulymyzdyń, óz erlerimizdiń erlikteri qashan laıyqty baǵasyn alady degenge biz de qosylamyz.
Osy oraıda, shynynda da Aýǵan soǵysyndaǵy erlikterdi baǵalaýǵa kelgende, qazaqstandyq bıliktiń nege moıyndary jar bermeıtinin túsiný qıyn. Qanshama jyl boıy joǵaryǵa jazyp júrip, Aýǵan soǵysyna qatysqandar «Ardagerler týraly» zańyna sáıkes keıbir jeńildikterge endi ǵana ilikti. Aty ańyzǵa aınalǵan «Qara maıor» Borıs Túkenuly Kerimbaevtyń erligi týraly qansha jazylsa da, «Halyq Qaharmany» degen ataqqa qol jetkize almaı, dúnıeden ótti. О́te ókinishti.
Endi mine, taǵy bir erimiz, qazaqstandyq jaýynger Serikbaı Turlybaevtyń óshpes erligi týraly Baıan Qýandyqqyzy barlyq aıǵaq derekterdi alǵa tartyp, «Halyq Qaharmany» ataǵyna laıyqty ekendigin jerine jetkize jazǵan eken. Iá, Uly dala batyrlarynyń erlik dástúri búgingi jastar úshin de, erteńge bolashaq úshin de mańyzdy nárse.
Elimizdiń jaqynda atap ótetin Táýelsizdik merekesine oraı nemese 2021 jyldyń 15 aqpanynda Keńes áskerleriniń Aýǵan elinen shyǵarylǵanyna 32 jyl tolýy qarsańynda Otan aldyndaǵy óz boryshtaryn adal atqarǵan, jaýyngerlik namysty jankeshtilikpen qorǵaǵan Borıs Kerimbaev pen Serikbaı Turlybaevqa «Halyq Qaharmany» ataǵy berilip jatsa, eldiktiń, erlik pen batyrlyqtyń ónegeli dástúri tolyǵa túsetini sózsiz.
Eli úshin óshpes erliktiń asqan úlgisin kórsetken erlerimiz osylaı laıyqty baǵalaryn alyp jatsa, Keńes elinde eskerilmeı qalǵan ádiletsizdiktiń orny tolar edi, Sápen apaı sııaqty batyr ul ósirgen analar aldyndaǵy paryzymyzdyń bir óteýi qaıtar edi.
Sádýaqas JUBATOV,
áskerı jýrnalıst,
zapastaǵy polkovnık
