Jumysyn ýaqyt talabyna saı jetildirip jatqan klınıkanyń múmkindigi mol. Ýnıversıtet rektory Bolatbek Abdrasılov qazir klınıkada 24 myń adamǵa qyzmet kórsetiletinin, bul kórsetkishti 40 myńǵa deıin kóbeıtýge múmkindik baryn aıtady. Aldaǵy ýaqytta turǵyndardyń klınıkaǵa qaralýyna barlyq jaǵdaı jasalǵany jóninde habarlandyrýlar taratylyp, ortalyqtyń qyzmet aıasy keńeıtilmek.
Ýnıversıtet kómegine oblys aýmaǵyndaǵy mektepterden de suranys túsýde. Stýdentterdiń teorııany praktıkamen ushtastyrǵany jaqsy maman bolyp shyǵýyna septigin tıgizetinin aıtqan Túrkistan oblysy Adamı áleýetti damytý basqarmasy basshysynyń orynbasary Ardaq Sadyqova «Pedagog mamandar daıyndaý júıesindegi ózekti máseleler» taqyrybynda uıymdastyrylǵan jıyn barysynda ýnıversıtet rektoryna óz usynysyn jetkizdi.
«Álemdegi pandemııanyń zardabynan bilim oshaqtarynyń barlyǵy qashyqtan bilim alyp jatqany barshaǵa aıan. Sol sebepti biz mektep baǵdarlamasyna birshama ózgeris engizdik. Bir synypty ekige bólip, 15 baladan oqytyp jatyrmyz. Al oǵan bilikti mamandar tapshy bolyp otyr. Osyǵan baılanysty ýnıversıtettiń joǵarǵy kýrstaǵy pedagog stýdentteriniń praktıkalaryn sozǵanyn qalaǵan edik. Alaıda bul múmkin bolmady. Memlekettik baǵdarlama boıynsha olar tek belgili bir merzimde ǵana mektep bazasynda praktıkadan ótedi eken. Osyǵan baılanysty sizderden memleketke usynys tastalsa, balalardyń bilim alýlaryna jas mamandaryńyz úles qossa eken degen tilegimiz bar», dedi A.Sadyqova.
Bul oraıda ýnıversıtet jáne Adamı áleýetti damytý basqarmasy arasynda jumys baǵyttary negizinde kelisim jasalyp, salalar boıynsha jumys tobyn qurý týraly sheshim qabyldandy.
Al Túrkistan pedagogıkalyq kolledj dırektory Aıdos Appazov ýnıversıtettiń múmkindikterin aıta otyryp, kolledj muǵalimderiniń bilimin arttyrý maqsatynda magıstratýrada oqytý úshin kvota qarastyrýdy surady. Sonymen birge ýnıversıtettiń IT mamandary sońǵy sıfrly tehnologııalardy ıgerýge kolledj mamandaryna kómek berý jóninde ótinishin bildirdi. Rektor bul usynystardy qoldap, ýnıversıtet tarapynan kómek kórsetýge daıyn ekenin jetkizdi.
Mamandary men qyzmeti suranysqa ıe ýnıversıtette 10 myńnan asa stýdent, ınternder, magıstranttar, rezıdentter men doktoranttar, sondaı-aq daıyndyq fakýltetiniń tyńdaýshylary bilim alady. Oqytýshylar dástúrli oqý baǵdarlamasynyń onlaın kontentin qysqa merzim ishinde daıarlap, stýdentterdiń bilim sapasynyń tómendemeýin basty nazarda ustaýda.
«Bizdiń ýnıversıtetimiz – resmı halyqaralyq statýsy bar birinshi joǵary oqý orny. Sonymen birge bıyldyń qantarynan bastap joǵary oqý orny Prezıdent Qasym-Jomart Toqaevtyń Jarlyǵymen «Erekshe mártebege» ıe boldy. Bizdiń túlekterdiń jumysqa ornalasý deńgeıi de jyl saıyn joǵarylap keledi. Buǵan sheteldik oqý oryndarymen tyǵyz baılanysta bolýymyz da áser etýde. Atap aıtqanda, Túrkııa, Reseı, Anglııa, Germanııa, Ispanııa, Italııa, Qytaı, Polsha, О́zbekstan elderiniń joǵary oqý oryndarymen seriktestik baılanystamyz», deıdi ýnıversıtet rektory B.Abdrasılov.
Memleket basshysy Jarlyǵymen berilgen mártebe úlken akademııalyq jáne basqarýshylyq derbestik bere otyryp, Ph.D. fılosofııa doktory men sala boıynsha doktor dárejesin daıyndaýǵa, bilim berý baǵdarlamalarynyń mazmunyn anyqtaýǵa jáne jeke úlgidegi dıplomdardy berýge jol ashty. Sondaı-aq professorlyq-oqytýshylyq quramnyń jalaqysyn 75%-ǵa, qyzmetkerlerdiń jalaqysyn 30%-ǵa arttyrýǵa jáne materıaldyq-tehnıkalyq bazany jańartýǵa múmkindik berdi. Jýyrda atqarylǵan jumystar boıynsha halyqqa esep bergen ýnıversıtet rektory qashyqtan bilim berý júıesiniń uıymdastyrylýy, ǵylym salasy jáne taǵy basqa da aýqymdy ister týraly baıandady. Kelesi jyly stýdenttik Ýnıversıada ótkizý josparlanyp otyrǵanyn jetkizdi. Oqý ornynda jańa bilim berý baǵdarlamalary sońǵy eki jylda 72%-ǵa artqan. Buryn 100 mamandyq bolsa, qazirgi tańda ýnıversıtet stýdentterdi 172 mamandyq boıynsha daıarlaıdy. Solardyń qatarynda robot tehnıka, sıfrly jýrnalıstıka, sıfrly qarjy analıtıkasy, kompıýterlik modeldeý jáne derekterdi vızýalızasııalaý, kompıýterlik ınjenerııa, jobalardy basqarý, bilim salasyndaǵy menedjment sekildi mamandyqtar ashylyp, daıyndyqtar júrgizilip jatyr.
Ýnıversıtette 19 elden kelgen 40 asa ulys pen ulttardyń ókilderi, ıaǵnı 1 500-ge jýyq shetel azamaty oqıdy. Túrkııa, Bolgarııa, Majarstan, Albanııa, Bosnııa, Gersegovına, Kosovo, Əzerbaıjan, Reseı elderiniń stýdentteri esh kedergisiz ýnıversıtettiń qashyqtan oqytý júıesi arqyly bilim alýda. Naýryzdan bastap ýnıversıtettiń oqý prosesi tolyqtaı qashyqtan oqytý júıesine kóshirilgen.
«Ata-analardyń, qoǵamnyń qashyqtan oqytýǵa degen pikiri kúmánǵa toly boldy. «Stýdent onlaın oqýda jaýapkershilikti qanshalyqty sezinedi, qalaı qatysady, ne úırenedi, oqý sapasy tómendemeı me?» saryndaǵy saýaldar sansyz. Onlaın oqytýda árbir stýdenttiń oqý úlgerimi onlaın baza arqyly baqylandy. Qashyqtan bilim berý barysynda stýdenttermen qatar ata-analarmen de baılanysyp otyrdyq. Qashyqtan bilim berý júıesine, atqarylǵan jumystar jóninde saýaldama júrgizip, baǵasyn aldyq. Saýaldama boıynsha ýnıversıtettiń qashyqtan bilim berý aqparattyq júıesine stýdentterdiń 95 paıyzy oń baǵa berdi. Al emtıhannyń ádil ótkenin 94,4 paıyzy rastady. Emtıhandy uıymdastyrý deńgeıin 94,3 paıyz degen kórsetkishke ıe boldy», deıdi rektor.
Ýnıversıtettiń endigi maqsaty da aıqyn. Bul – halyqaralyq reıtıngte 500 ýnıversıtettiń qataryna kirip, ulttyq reıtıngte alǵashqy bestikke ený, materıaldyq bazany jetildirip, óńirge qajetti mamandyqtardy ashý. Turǵyndar úshin de, ýnıversıtet oqytýshylary men stýdentterine de qajetti klınıkany zamanaýı qural-jabdyqtarmen qamtamasyz etý jolǵa qoıylǵan. Sonymen birge qazirgi ýaqytta bilikti mamandardy baspanamen qamtamasyz etý máselesin sheshý baǵytynda jumystar júrgizilýde.
Túrkistan oblysy
