Qos joba da Azamattyq bastamalardy qoldaý ortalyǵy men Aqparat jáne qoǵamdyq damý mınıstrliginiń qoldaýymen iske asqan. Halyq arasynda kitap oqýdy nasıhattaýǵa baǵyttalǵan Bolashaq Books jobasy kitap oqý mádenıetin qalyptastyrýdy ǵana emes, sondaı-aq jas azamattardyń bilim kókjıegin keńeıtýdi kózdeıdi. Ol úshin elimizdiń barlyq óńirinde qoǵamdyq kitap sóreleri ornatyldy. Joba úılestirýshisi Juldyz Júnisova bıylǵy jyldyń qorytyndylaryn shyǵara kele, aldaǵy josparlaryna toqtaldy.
«Qaýymdastyq bul jobany ári qaraı da jalǵastyrýdy kózdep otyr. Osy jyly qurylǵan áýesqoılar klýby men áleýmettik jelilerdegi paraqshalar jumysyn jalǵastyra beredi. Sondaı-aq qaýymdastyq aımaqtarda qoıylǵan sórelerdiń jańa kitaptarmen tolyqtyrylýyna jáne olardyń saqtalýyna jaýap beredi», dedi joba úılestirýshisi.
Otandastarymyzdy kitap oqýǵa qyzyqtyrý úshin jańa tehnologııalar arqyly aqparat berip, áleýmettik jelidegi paraqshalarda paıdaly málimetter jarııalanyp otyrǵan. Odan bólek Ulttyq aýdarma bıýrosy, «Rýhanı jańǵyrý» jobalyq keńsesi jáne Qazaqstan volonterler lıgasymen memorandýmdarǵa qol qoıylǵan. Saýda jáne oıyn-saýyq ortalyqtarynda jáne joǵary oqý oryndarynda kitap.kz elektrondy kitaphanasyndaǵy kitaptarǵa siltemeler ilindi. Bul – arnaıy QR kod arqyly qalaǵan kitapqa jedel qol jetkizýge yńǵaıly. Sórelerdi jańa kitaptarmen toltyrýǵa oblystyq kitaphanalar da atsalysqan eken. Jastarǵa kitap oqyp qana qoımaı, ol týraly pikir almasý da qyzyqty ekeni sózsiz. Sol sebepti ózi oqyǵan kitapty almastyrýǵa múmkindik beretin sharalar da uıymdastyrylǵan. Joba avtorlary osy sekildi qyzyqty sharalar arqyly jastar arasynda kitap oqýdy qyzyq ári paıdaly daǵdyǵa aınaldyrýǵa bolatynyna senimdi.
Juldyz Júnisova jastardy yntalandyrý úshin arnaıy baıqaýlar da uıymdastyrylǵanyn aıtyp berdi.
«Áleýmettik jelide «Kitap áleminen súıikti keıipkerime kospleı» atty baıqaý ótkizdik. 123 jumys qabyldandy. Nátıjesinde, aqtyq synda 30 týyndy júldege talasty. Jeńimpazdarǵa noýtbýk, planshet, uıaly telefon sekildi qajetti gadjetter men kitap dúkenderine arnaıy sertıfıkat tabys ettik. Bul kishigirim shara qatysýshylardyń shyǵarmashylyq qabiletterin damytyp, qatarlastarymen bólisýine sep bolady», dep atap ótti J.Júnisova.
Pandemııaǵa deıin turǵyndar sórelerdegi kitaptardy úıine alyp ketip, ne sol jerde oqýǵa múmkindik alsa, karantın kezinde oqyrmandarǵa arnalǵan onlaın sharalar óte bastaǵan. «Kitapqumarlar» klýby jıi kezdesip, súıikti kitaptaryn, qaı kitap boıynsha kıno túsirýge bolatynyn jáne ózge de taqyryptardy talqylap turǵan. Bul sharalar jastardy kitap oqýǵa yntalandyryp, ortaq qyzyǵýlyǵy bar órenderdiń basyn qosýǵa taptyrmas alańǵa aınaldy.
Is-sharada taǵy bir jobanyń qorytyndysy tanystyryldy. «Jastar jáne ınnovasııalar» jobasy isker jastardyń degenine jetip, óz arasynda kásibı qoǵamdastyqtar qalyptastyrýyna jaǵdaı jasaýǵa baǵyttalǵan. 29-30 qazanda Bolashaq qaýymdastyǵy osy maqsatta onlaın forým ótkizdi. Spıkerler ınnovasııa jáne kásipkerlik salasyndaǵy sońǵy jańalyqtardy aıtyp, óz tájirıbelerin ortaǵa saldy.
Bolashaq qaýymdastyǵy atqarýshy dırektorynyń orynbasary Álisher Dýngenın forýmnyń halyqaralyq sıpatqa ıe bolǵanyn atap ótti. «Sharaǵa qatysýǵa Reseı Federasııasy men О́zbekstan Respýblıkasynyń azamattarynan 500-den astam ótinim kelip tústi, bul TMD elderi jastarynyń ınnovasııany oqýǵa jáne zerdeleýge qyzyǵýshylyǵyn kórsetedi», dedi Á.Dýngenın.
Qorytyndy prezentasııaǵa 50-den astam kórermen qatysty, olardyń ishinde jobanyń qatysýshylary men volonterler, áriptes uıymdardyń ókilderi bar.
