Keshe Ortalyq kommýnıkasııalar qyzmetinde bolǵan dástúrli brıfıngke qatysqan Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev elimizdegi kásibı Parlamenttiń besinshi shaqyrylymynyń ózinde 114 zań qabyldanǵanyn aıtty.
Keshe Ortalyq kommýnıkasııalar qyzmetinde bolǵan dástúrli brıfıngke qatysqan Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev elimizdegi kásibı Parlamenttiń besinshi shaqyrylymynyń ózinde 114 zań qabyldanǵanyn aıtty.
OKQ resmı ókili Altaı Ábıbýllaev shaqyrýdy qabyl alǵan meımanǵa rızashylyǵyn bildirip, mıkrofondy Máýlen Áshimbaevqa usynǵan. Sózin memlekettik tilde bastap, ary qaraıǵy negizgi oıyn resmı tilde baıandaǵan depýtat brıfıngte 3 máselege qatysty áńgime qozǵady. Onyń birinshisi – «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń Qazaqstandaǵy parlamentarızmdi damytýdaǵy róli» týraly syrt elden kelgen qonaqtardyń qatysýymen ótkizilgen konferensııa jaıy boldy. Sheteldik sarapshylardyń Qazaqstan parlamentarızmine osy konferensııada bergen baǵasyna toqtalǵan sheshen: «Olardyń barlyǵy búginde Qazaqstanda tıimdi zańnamalyq organ qurylǵandyǵyn atap ótti. Úkimetpen tyǵyz jumys jasaýdyń arqasynda el ómiriniń kez kelgen salasyn retteıtin mańyzdy zańdar dúnıege keldi. Osy besinshi shaqyrylymnyń ózinde ǵana, ıaǵnı ótken jylǵy qańtardan beri Májilis 160 zań jobasyn qarap jáne maquldap, olardy Senatqa joldasa, olardyń 144-in senatorlar da, Memleket basshysy da qoldady. Qazir olar ózderiniń zańdyq kúshine endi», degen depýtat ekinshi máselege oıysqanda zań shyǵarmashylyǵy týrasyndaǵy óz pikirimen bólisti.
Onyń aıtýynsha, ýaqyt óte kele Májilis janynan zań shyǵarý ınstıtýtyn qurý qajet. О́ıtkeni, mundaı ınstıtýt Úkimetten qaralýǵa kelip túsetin zań jobalaryna saraptama júrgizýmen qatar, olarǵa baǵa berip jáne depýtattardyń zańdardy jaqsarta túsýine septigin tıgizedi. Árbir zańnyń adamdar taǵdyryna tıgizer áserin aıtqan depýtat: «Zańǵa salǵyrt qaraýǵa bolmaıdy, olar muqııat saraptalyp jasalýy kerek. Sonda ǵana biz zańdardy búgingi jaǵdaıǵa jáne erteńgi bolashaqtyń ıgiligine jumys istetetin bolamyz. Bizge árdaıym zań jobalary sapaly bolyp kelmeıdi. Osy jyldyń ózinde úkimettik qurylymdarmen birlesip, qaıta óńdelip baryp jasalǵan zańdar qatary biraz boldy. Bizde mundaı ınstıtýt ta, ortalyq ta joq. Búgingi kúni depýtattar muny ózderi isteıdi, oǵan tıisti apparattyń bólimsheleri kómektesedi. Eger de osy baǵytta belgili bir qadamdar qabyldansa, bul zańdardyń sapasyn arttyrar edi. Búgingi kúni tıisti múmkindikter men resýrstar jetkilikti emes», deı kelip, zamanaýı qoǵam jaǵdaıynda depýtattardyń zańnamalyq bastamalaryn iske asyrýǵa qajetti sharttardy qurý qajettigine toqtaldy.
«Depýtattardyń zań jobalaryn ázirleý jaǵynan alǵandaǵy múmkindikterin kúsheıtý qajet. Zań jobasyn ázirleý – óte kúrdeli, kóp eńbektenýdi qajet etetin úderis. Osy tusta kóptegen zańdardy qarastyryp, halyqaralyq tájirıbeni zertteý, zań jobalaryn qabyldaý nátıjelerin boljaý kerek. Bul – óte kúrdeli jumys. Degenmen, búgingi kúni depýtattar tarapynan zańnamalyq bastamalar jasalyp, olar usynǵan zańdardyń jıirek qabyldanýyna qaraı bet burýymyz kerek. Bul baǵytta Májilis Tóraǵasy bastamasymen sońǵy ýaqytta aýqymdy jumys júrgizilip jatyr», dedi Májilis depýtaty.
Depýtat áńgimesiniń endigi bir ózegi 29 qarasha kúni Sankt-Peterbýrg qalasynda ótetin «Qazirgi álemdegi ıadrolyq qaýipsizdik. Iаdrolyq qarýsyzdaný men qarý-jaraqty taratpaý úrdisindegi parlamentarıılerdiń róli» atty halyqaralyq konferensııa boldy. TMD memleketteriniń Parlamentaralyq Assambleıasymen birlese ótkizilip otyrǵan osy basqosýǵa toqtalǵan ol: «Esterińizde bolsa, byltyr 29 tamyzda Astanada úlken konferensııa uıymdastyrǵan bolatynbyz. Onda Elbasy baıandama jasap, óziniń bastamalaryn aıtyp bergen edi. Sankt-Peterbýrgtegi konferensııa Astanada kóterilgen taqyryptardy jalǵastyrý jáne parlamentaralyq yntymaqtastyqty damytý maqsatynda uıymdastyrylyp otyr», dedi M.Áshimbaev.
Budan soń depýtat jýrnalıster tarapynan qoıylǵan saýaldarǵa jaýap berdi.
Anar TО́LEÝHANQYZY,
«Egemen Qazaqstan».
