Saltanatty jıyndy ashqan Aqparat jáne qoǵamdyq damý mınıstri Aıda Balaeva úshkúndik sharanyń otandyq aqparat salasynyń álemdik básekege qabiletti ekenin kórsetkenin atap ótti.
«Úsh kúnge sozylǵan Astana Media Week jobasy halyqaralyq jýrnalıstıkanyń nazaryn elordamyzǵa aýdarǵan erekshe is-shara boldy. Búginde búkil álemdi ábigerge salǵan pandemııa jaǵdaıynda álem jýrnalısteri bir arnada toǵysyp, óz kásipterine degen adaldyqty kezekti ret dáleldep otyr. Onlaın formattaǵy platformada álemniń 16 memleketiniń kórermenderi úshin 50-den astam halyqaralyq medıa sarapshy óz tájirıbelerin ortaǵa saldy. Jáne eń bastysy – bizdiń otandyq jýrnalıstıka deńgeıi de álemdik básekege qabilettiligine kóz jetkizdik», dedi mınıstr.
Qatysýshylar AQSh, Ulybrıtanııa, Shvesııa, Saýd Arabııasy, Reseı sekildi elderden qosylǵan bilikti sarapshylardan saladaǵy sońǵy ózgerister men trendter týraly aqparat alyp, pandemııa saldarynan ózgeriske ushyraǵan medıanyń bolashaǵy týraly oramdy oılaryn tyńdady.
«Osyndaı ortaq alańda ózara tájirıbe almasyp, ozyq úlgilerdi úırený jýrnalısterdiń biliktiligin jetildirip, ony jańa deńgeıge kóteretini anyq. Sonyń ishinde otandyq medıa salanyń odan ári damýyna úlken serpin beredi dep senemiz. «Úrker» ulttyq báıgesiniń marapattaý rásimi Astana Media Week aptalyǵy aıasynda ótip otyr», dep atap ótti vedomstvo basshysy.
Qoǵamdaǵy ár salanyń ózindik orny baryn basa aıtqan A.Balaeva, sonyń ishinde jýrnalıstıkanyń qoǵam úshin atqaryp otyrǵan eńbegin joǵary baǵalady. Onyń aıtýynsha, árbir qyzmet laıyqty baǵasyn alýy kerek. Mınıstr qazylar alqasy júzden júırik shyqqandarǵa laıyqty baǵasyn bergenine senimdi ekenin jetkizdi.
Aqparat salasyndaǵy ulttyq syılyq bıyl tórtinshi ret tabystalyp otyr. Bıylǵy baıqaýdyń jańalyǵy – qazaq jýrnalıstıkasynyń jampozy Sherhan Murtaza atyna arnaıy atalym taǵaıyndalǵany boldy.
«Sherhan aǵamyzdyń otandyq jýrnalıstıkany damytýda atqarǵan eńbegi men qosqan úlesi ólsheýsiz. Sondyqtan da qazaq jýrnalıstıkasynyń asqar shyńy sanalatyn Sheraǵa atyndaǵy marapatqa ıe bolý – kim úshin de zor mártebe, bıik jetistik dep bilemin», dedi Aıda Balaeva. Atalǵan atalym boıynsha músinshe men 1 mıllıon teńgeni qazaq jýrnalıstıkasynyń aqtańgeri, pýblısıst Qaınar Oljaı jeńip aldy.
Saltanatty jıynda barlyǵy 11 atalym boıynsha úzdikter anyqtaldy. «Jyldyń úzdik fotosýreti» atalymyna táýelsiz ekologııalyq sholýshy Sáken Dildahmet, al «Úzdik reportaj» atalymynda Kyzylorda-news.kz portalynyń qyzmetkeri Nursultan Myqtybaevtyń jumysy joǵary baǵaǵa ıe boldy. Odan bólek, «Jyldyń úzdik analıtıkalyq materıaly» boıynsha Strategy2050.kz portalynan Kaırat Jandybaev, «Úzdik jýrnalıstik zertteý» atalymynda «Vremıa» gazetiniń jýrnalısi Mıhaıl Kozachkov, «Úzdik tanymdyq materıal» boıynsha Sputnik Kazahstan aqparat agenttiginen Tımýr Nıtalıev marapattaldy. Al «Egemen Qazaqstan» gazetiniń tilshisi Gúlbarshyn Sabaeva «Jyldyń úzdik suhbaty» atalymynda jeńiske jetti. Sondaı-aq úzdik marapatqa shyǵarmashylyq ujymdar da ıe boldy. «Atyray» radıostansasyndaǵy «Efırde 102 FM» baǵdarlamasy «Radıostansadaǵy úzdik joba», TengriNews portaly «Úzdik jańalyqtar portaly», jambyldyq «AQ JOL» gazeti «Jyldyń úzdik gazeti», «Juldyz» jýrnaly «Jyldyń úzdik jýrnaly» dep tanyldy.
Jeńimpazdarǵa sertıfıkat, «Úrker» estelik músinshesi men 1 mıllıon teńge aqshalaı syılyq tabystaldy.
Qaýipsizdik sharalaryna baılanysty kórermender marapattaý rásimin tikeleı efırde kórýge múmkindik aldy. Bıyl barlyǵy 470 ótinim kelip tústi. Aqparat salasynyń úzdikterin bedeldi qaıratkerler, shyǵarmashylyq zııaly qaýym ókilderi jáne tanymal qazaqstandyq jýrnalısterden quralǵan qazylar alqasy tańdaǵan.
Astana Media Week sharasynyń bıylǵy formaty qatysýshylar men qonaqtarǵa jańa múmkindikter ashty. Bilikti sarapshylardyń qatysýymen ótken paneldik sessııalardy saıt arqyly 25 myń, áleýmettik jeliler arqyly 10 myńǵa jýyq adam tamashalaǵan. Orta eseppen 1 paneldik sessııaǵa 2500-ge jýyq qatysýshy qatysty. Mınıstr A.Balaeva sharany oflaın uıymdastyrǵan kezde zalǵa osynshama adamdy syıǵyza almas edik deıdi. Sondaı-aq onyń aıtýynsha, qatysýshylardyń geografııasy da keńeıgen. Sharany Qazaqstan turǵyndary ǵana emes, álemniń 16 elinen tamashalaǵan. Mınıstr Astana Media Week sharasynyń halyqaralyq deńgeıde ótkenin aıta kele, aldaǵy ýaqytta da osyndaı formatty qoldaıtynyn jetkizdi.
