Qaýiptiń aldyn alý baǵytynda istelinip jatqan jumystar jaıly óńirlik kommýnıkasııa qyzmetinde oblys ákiminiń orynbasary Naýryzbaı Baıqadamov pen oblystyq densaýlyq saqtaý basqarmasynyń basshysy Sábıt Pazylov BAQ ókilderine arnalǵan brıfıngte tarqatyp aıtyp berdi.
Spıkerler jedel járdem qyzmetin ortalyqtandyrýdyń arqasynda oblys ortalyǵy men aýdandarda naýqastarǵa jetip, olarǵa dárigerlik kómek kórsetý sapasy bir deńgeıde kórsetilip otyrǵanyn atap ótti. Osynyń arqasynda aımaqtaǵy medısınalyq jedel járdem stansasy qyzmeti elimizdegi Ulttyq shuǵyl medısınany úılestirý ortalyǵynyń baǵalaý reıtınginiń aldyńǵy qatarynan kóterildi. Alys eldi mekender turǵyndary da sapaly jáne jedel medısınalyq kómektiń qoljetimdiligin anyq sezinip otyr. О́tken apta sońynda jedel járdem qyzmetine 42 avtokóliktiń kilti tabystaldy. Osyndaı qoldaýdyń arqasynda bıyl shaqyrystarǵa keshigý 2,5%-dan 1,9%-ǵa azaıyp, nátıjeli reanımasııa 47,2%-dan 56,3%-ǵa ulǵaıǵan. Epıdemııalyq maýsym bastalǵaly beri oblysta 3 264 naýqas tirkelip, olardyń 97 paıyzy qulantaza aıyǵyp shyqty.
Kesel órship turǵan kezde baıqalǵan dári-dármek tapshylyǵyn alda boldyrmas úshin mamandar stasıonarlyq jáne emhanalyq jaǵdaıda jetispegen preparattarǵa saraptama jasap, dáriler tizimi jasaqtaldy.
Qajet bolǵan jaǵdaıda 21 ınfeksııalyq jáne provızorlyq oryndar qaıta ashylady. Sondaı-aq 200 tósek-oryndyq modýldi ınfeksııalyq aýrýhana qurylysy júrgizilýde.
Indet bastalǵanǵa deıin oblysta ókpeni jasandy tynystandyratyn 76 apparat bolypty, qazir bul qurylǵy sany 244-ge jetip otyr. Alda Dúnıejúzilik banki arqyly taǵy da 47 apparattyń jetkizilýi josparlanýda. Jergilikti bıýdjet esebinen 4 flıýro jáne 6 stasıonarly rentgen qondyrǵysyn satyp alý kózdelip otyr. Vırýstyń ekinshi tolqynyna oraı jasalǵan daıyndyq jumystary aıasynda quramynda 3 500 medısına qyzmetkeri bar mamandar rezervi quryldy.
Aımaqtaǵy irgeli kásiporyndar da derttiń taralýyn barynsha tejeýge hal-qaderinshe kómek qolyn sozyp jatyr.
– Mysaly, Qazaly aýdanynda «PetroQazaqstanQumkólResorsız» kompanııasynyń demeýshiligimen bir ottegi stansasy salynady. Bul stansa Aral jáne Qarmaqshy aýdandaryn, Baıqońyr qalasyn ottegimen qamtamasyz ete alady. «QazGerMunaı» BK» JShS oblystyq aýrýhana bazasynda qala aýmaǵyndaǵy emdeý mekemeleri men Syrdarııa, Jalaǵash aýdandaryn qamtamasyz etetin stansanyń taǵy birin salýǵa ázir, – dedi Naýryzbaı Seıitqalıuly.
Bastapqy medısınalyq sanıtarlyq kómek kórsetý baǵytynda da birshama júıeli jumys júrgizilýde. Shilde aıynan bastap qala, aýdan ákimdikterimen birlesip emhanalar bazasynda úı jaǵdaıynda dárigerlik kómek beretin mobıldik brıgadalar uıymdastyrylǵan edi. Osyndaı toptar sany az ýaqytta 161-ge jetti. Olardyń 38-i Qyzylorda qalasynda, 28-i aýdan ortalyqtarynda, 95-i aýyldarda uıymdastyryldy. Mobıldik brıgadalardy jergilikti bılik kólikpen qamtamasyz etip, naýqasqa jedel jetýine bar jaǵdaıdy jasady. Osy toptar búginge deıin 13 368 shaqyrtýǵa barypty.
Aıtqan jerden aýlaq, biraq alda da aýrý órshı qalsa, mobıldik brıgadalar qaıta jumyldyryp, turǵyndarǵa medısınalyq kómek kórsetip, dárilik zattardy jetkizýge ázir tur.
Qyzylorda
