– Burynǵy ǵımarat eski bolǵandyqtan, kóp qıyndyq kórdik. Ásirese reanımasııalyq kómekti qajet etetin naýqastardy ekinshi qabatqa qolmen kóterip shyǵaratyn edik. Jańa aýrýhanaǵa arnaıy lıft ornatyldy. Bul qyzmetkerlerimizdiń jumysyn jeńildetedi. Eski aýrýhanadaǵy operasııalyq kabınet bir adamǵa arnalǵan bolsa, endi munda eki naýqasqa bir mezgilde ota jasaýǵa múmkindik bar. Perzenthana bólimshesi anaǵa reanımasııalyq kómek kórsetýge, náresteniń júrek soǵysyn tekserýge, shala týǵan nárestelerdi baqylaýǵa arnalǵan kıývezdermen qamtyldy, – deıdi Qurmanǵazy aýdandyq ortalyq aýrýhanasynyń dırektory Gúlsara Nurmaǵanbetqyzy.
Aýdanda qaýipti indettiń ekinshi tolqynyna daıyndyq qolǵa alynyp otyr. Soǵan oraı jańa aýrýhananyń hırýrgııa bólimi provızorlyq stasıonar retinde jasaqtaldy. Aýrýhanadaǵy bólimshelerge 63 ottegi núktesi qosyldy. Ottegini berý prosesi bir ortalyqtan basqarylady. Provızorlyq stasıonarǵa dırektordyń emdeý isi jónindegi orynbasary, hırýrg Nurǵısa Sholpanov jetekshilik etedi.
– Ár palataǵa úsh ottegi núktesi júrgizildi. Sondaı-aq aýrýhana 9 ókpege jasandy tynys berý apparatymen qamtyldy. Reanımasııalyq 3 tósektik oryn bar. Eki ıntensıvti terapııa kereýeti jasaqtaldy. Reanımatolog-dárigerler sońǵy emdeý hattamasy boıynsha onlaın oqý kýrstarynan ótti. Qazirgi aýrýhananyń provızorlyq bólimshesinde 28 oryn daıyndaldy. Naýqas sany kóbeıetin bolsa, ony 40-qa deıin ulǵaıtýǵa múmkindik bar, – deıdi hırýrg N.Sholpanov.
Qurmanǵazy aýdany ákiminiń orynbasary Jastilek Hasanovtyń aıtýynsha, munda ortalyq aýrýhanadan ózge, ortalyq emhana, 16 ambýlatorııa, 2 selolyq aýrýhana, 8 medısınalyq pýnkt bar. Bularda 63 dáriger, 336 orta býyn qyzmetkeri turǵyndardyń densaýlyǵyn qorǵaýǵa jumylyp otyr. Al jańa aýrýhanada 13 joǵary, 49 orta, 36 kishi býyn qyzmetkeri jumys isteıdi.
Atyraý oblysy,
Qurmanǵazy aýdany
