Atyraýda NCOC kompanııasynyń demeýshiligimen modýldi tıptegi ınfeksııalyq aýrýhana paıdalanýǵa berildi. Jańa aýrýhanada 8 blok pen 10 qosalqy nysan bar. Munyń bári Germanııanyń «Modex» zaýytynda shyǵarylǵan modýldik temirbeton bloktardan qurastyryldy. Mundaı ekologııalyq taza materıal qysta syrttaǵy salqyndy ótkizbeı, ishtegi jylýdy saqtaıdy. Al jazdaǵy aptap ystyqta da aýrýhana ishi qońyrsalqyn bolyp turady. Aýrýhana ǵımaratynyń jalpy aýdany – 6764 sharshy metr.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, joǵary tehnologııalyq medısınalyq jabdyqtardy qospaǵanda, jobany iske asyrý kezinde otandyq materıaldar men taýarlardy paıdalanýǵa basymdyq berilipti. Aýrýhana 200 tósekke eseptelip otyr. Onyń ishinde 20 oryn jansaqtaý jáne qarqyndy terapııa bólimshesine arnalypty.
Bul aýrýhanany osy zamannyń talabyna saı medısınalyq emdeý orny deýge ábden bolady. Oǵan birneshe sebep bar. Birinshiden, munda pasıentterdi emdeý men dıagnostıkalaýǵa qajetti qural-jabdyqtardyń bárimen qamtylyp otyr. Osyǵan oraı PTR zerthanasy, rentgen men kompıýterlik tomografııa kabınetteri ashyldy. Ekinshiden, aýrýhana dálizine qaýipti ınfeksııa taralmaıdy. Osy maqsatta palatalardyń ishinde teris qysym jasaıtyn arnaıy sorý-syrtqa taratý jeldetkishimen jabdyqtaldy. Úshinshiden, «las» jáne «taza» aımaqtarǵa bólingen. Tórtinshiden, mundaǵy aýany tazartýdyń ózgeshe ádisi qoldanylady. Buǵan aýa tereń tazartatyn ORIT súzgi qoraptary ornatylǵany dálel bola alady.
– Osynyń bári pasıentterge, eń aldymen dárigerlerge tónetin qaýip-qaterdi aıtarlyqtaı azaıtýǵa múmkindik beredi. Aǵyndy sýlardyń qorshaǵan ortany lastamaýyna da basa mán beriledi. Sondyqtan aǵyndy sý tolyq tazartý kezeńinen ótedi. Al jedel járdem kólikteri dezınfeksııalaý pýnktine óńdeýden ótkiziledi. Sondaı-aq medısınalyq qaldyqtardy zararsyzdandyrý stansasy iske qosyldy. Reanımasııa men qarqyndy terapııa bólimsheleri membrana arqyly ótken taza sý óndirý jáne búırek jetkiliksizdigi bar pasıentterge arnalǵan dıalız apparattarymen jabdyqtaldy. Palatadaǵy árbir tósek medısınalyq gazdar men ottegi jelisine qosylǵan, deıdi basqarma basshysy.
Bul aýrýhanany burynǵy emdeý oryndarynan ereksheleıtin taǵy bir tusy bar. Bul – emdelýshilerdiń densaýlyq jaǵdaıyna qashyqtan monıtorıng júrgizý. Osyǵan baılanysty avtomattandyrylǵan monıtorıng ortalyǵy jasaqtalǵan. Medısına qyzmetkerleri emdelýshilerdiń aýrý tarıhyn burynǵydaı qalyń dápterge qalammen jazyp otyrmaıdy. О́ıtkeni olar saraptamalardy planshetter arqyly almasady. Aqyldy tehnologııamen avtomatty túrde shyǵarylatyn derekterge ýaqytyly ózgeris engize alady. Osyndaı san alýan ereksheligi bar ınfeksııalyq aýrýhananyń jobasyn «Aqmol Project» JShS daıyndapty. Al qurylysyn «BI-Industrial» JShS eki aıǵa jeter-jetpes mezgilde, ıaǵnı, 18 tamyz-15 qazan aralyǵynda júrgizdi.
Oblystyq kardıologııalyq ortalyq janynan qosymsha 50 oryndyq ǵımarat boı kóterdi. Úsh qabatty japsarjaıdyń qurylysy da NCOC kompanııasynyń demeýshiligimen salyndy. Munda júrek-qan tamyrlary aýrýlary bar naýqastarǵa medısınalyq kómek kórsetý úshin eki operasııalyq palata, alty tósektik reanımasııalyq bólme, «Fılıps Prodıva» fırmasynyń MRT apparatymen, zerthana, ottegimen qamtý jelisi bar. Avtomatty jeldetý jáne aýa baptaý júıesimen jabdyqtalyp otyr.
Oblys ákimi Mahambet Dosmuhambetovtyń aıtýynsha, kardıoortalyqty keńeıtý júrek-qan aýrýlarynan bolatyn ólim-jitimniń aldyn alý úshin qolǵa alynyp otyr. О́ıtkeni sońǵy ýaqytta bul ortalyqtyń dárigerlerine júginetin naýqastar kóbeıip barady. Muny jyl basynan beri júrekke 1000 ota jasalǵanynan baıqaý qıyn emes.
– Kardıologııalyq ortalyqtyń qosymsha korpýsy osy zamanǵy medısınalyq qural-jabdyqtarmen qamtyldy. Japsarjaı qurylysy josparlanǵan merzimnen bir aı buryn aıaqtaldy. Bizdiń demeýshiligimizben iske asyrylǵan jobanyń quny 5,2 mlrd teńgeni quraıdy, deıdi NCOC kompanııasynyń basqarýshy dırektory Rıchard Hoýv.
Al ortalyqtyń bas dárigeri Marat Qonysovtyń málimetinshe, qosymsha ǵımarattyń ashylýy onkologııada birlesken ádisterdi júrgizýge múmkindik beredi. Endi kardıoortalyqtaǵy tósek sany 150-ge jetti. Bolashaqta balalar kardıologııasyn damytý kózdelip otyr.
– Bizdiń ortalyqta kardıologııada qoldanylatyn zamanaýı tehnologııalardy jetik meńgergen mamandarymyz kóp. Prosedýralar óte qymbat, biraq pasıentter úshin bári memleket esebinen júrgiziledi. Mamandardyń ortasha jasy – 27-32-de. Jyl basynan beri ortalyqta 1000 ota jasaldy, deıdi M.Qonysov.
Atyraý oblysy
