Esterińizge sala keteıik, Túrkistan oblysy aýmaǵynda jergilikti polısııa qyzmetiniń tabıǵatty qorǵaý polısııasy qyzmetkerleri “Brakoner” jedel-profılaktıkalyq is-sharasyn ótkizdi. Onyń negizgi maqsaty – brakonerlik derekterin anyqtaý, ekologııalyq qylmystar men tabıǵatty qorǵaý zańnamasy salasyndaǵy basqa da quqyq buzýshylyqtardyń jolyn kesý.
Polıseıler “Brakoner” jedel-profılaktıkalyq is-sharasynyń qorytyndysy boıynsha bes ekologııalyq qylmysty anyqtady, onyń ishinde zańsyz ań aýlaý boıynsha úsh jaıt, balyqty zańsyz aýlaýǵa qatysty eki jaıt jáne tirkelmegen qarýdy saqtaý boıynsha bir jaıt anyqtaldy.
Mysaly, reıdtik is-sharalar barysynda Kentaý QPB polısııa qyzmetkerleri “Ohotzooprom” qyzmetkerlerimen birge QR Qyzyl kitabyna engizilgen “qarabaýyr buldyryq” aýlaǵan brakonerdi ustady. Túrkistan qalasynyń turǵyndarynan tártip saqshylary “Qyzyl kitapqa” engen qustardyń denesimen 12 kalıbrli ańshy myltyǵyn tárkiledi. Atalǵan jaıt boıynsha QR QK 337-baby (Zańsyz ań aýlaý) boıynsha sotqa deıingi tergeý amaldary júrgizilýde.
Shardara aýdanynda tabıǵatty qorǵaý polısııasynyń qyzmetkerleri qoldanýǵa tyıym salynǵan “Qytaı aý-torymen” jergilikti sý qoımasynda balyq aýlap júrgen eki balyqshyny ustady. Jetisaı aýdanynyń turǵyndarynan tártip saqshylary 100 metrden astam balyq aýlaý toryn, motorly qaıyqty jáne 126 kg zańsyz aýlanǵan balyqty anyqtady. Qazirgi ýaqytta brakonerlerge qatysty QR QK 335-baby (Balyq resýrstaryn, basqa da sý janýarlaryn nemese ósimdikterin zańsyz óndirý) boıynsha sotqa deıingi tergeý amaldary júrgizilýde.
Sonymen qatar “Brakoner” jedel-profılaktıkalyq is-sharasy barysynda tártip saqshylary 416 ákimshilik quqyq buzýshylyqty anyqtady, onyń ishinde 71-i ań aýlaý erejelerin buzý, 111-i balyq aýlaý erejelerin buzý jáne 218-i azamattyq qarý men onyń patrondaryn satyp alý jáne saqtaý tártibin buzý. Nátıjesinde quqyq buzýshylarǵa jalpy somasy tórt mıllıon teńgeden astam ákimshilik aıyppul salyndy.
Túrkistan oblysy PD JPQ qyzmetkerleri reıd kezinde kúdiktilerden barlyǵy 14 birlik ańshy qarýy, úsh motorly qaıyq, 283 metr balyq aýlaý torlary, sondaı-aq eki”Qyzyl kitapqa engen qustardyń” denesin, jabaıy borsyqtyń jańa soıylǵan etin, tórt qoıan jáne 200 kg-ǵa jýyq túrli tuqymdy balyqtar tárkilendi.
Sondaı-aq “Brakoner” jedel-profılaktıkalyq is-sharasy aıasynda polısııa qyzmetkerleri turǵyndar arasynda tabıǵatty qorǵaý zańnamasyn buzýǵa jol bermeý jáne brakonerlik jaǵdaıynda qylmystyq jáne ákimshilik jaýapkershilikke tartý týraly profılaktıkalyq jáne túsindirý áńgimelerin ótkizdi. Sonymen qatar azamattardy Qazaqstan Respýblıkasynyń tabıǵatyn, janýarlary men ósimdikter álemin qorǵaýǵa shaqyrdy.
