О́ndiris órleýden tanǵan joq

Onyń eń basty qasıeti – dym­qyl­dy jerden qoryq­paı­tyn­dyǵy. Qan­daı dymqylda tursa da lamınasııalanǵan fanerden jasalǵan zattar men bu­ıym­dar búlinbeıdi. Sonymen qatar onyń sándiligi de joǵary talap­qa saı. Lamınasııalanǵan fanerdiń taǵy bir qa­sıeti – beriktigi. Qatty tyǵyz­dal­ǵandyqtan, ol aýyr salmaqqa da, temperatýralyq rejimge de shydaıdy. 

Soltústik Qazaqstan oblysy ákimdiginiń sońǵy otyrysyn­da «Radýga» JShS endi 20 kún­nen keıin osynaý sapaly ónim – lamınasııalanǵan fanera shy­ǵara bastaıtyn zaýytyn iske qosa­ty­ny belgili boldy. Sondaı-aq osy ká­sip­oryn bazasynda elektr­teh­nı­ka­lyq ónimder, kirpish, polıpropılen ydys­tar jasaıtyn óndirister de ashyl­maq.

Qazaqstan rynogynda 1994 jyldan beri kele jatqan osy kásiporyn elimizdiń soltústiginde ǵana emes Almaty, Nur-Sultan, Qaraǵandy, Shymkent, О́skemen, Qostanaı, Kók­she­taý syndy elimizdiń 12 qala­syn­da jáne Reseı qalalarynda óziniń fılıalyn ashqan. Aldymen eden syrlaıtyn túrli syrlar men boıaýlar shyǵarýǵa mamandanǵan kásiporyn qazir qulashyn keńge jaıǵan. Búginde kompanııanyń qaramaǵynda 2 myńǵa jýyq adam jumys isteıdi.

Jalpy, Soltústik Qazaqstan oblysy 2020 jyldyń aıaǵyna deıin 287 mlrd teńgedeı ınvestısııany óndiriske quımaq. Sonyń ishinde joǵaryda atalǵan lamınasııalanǵan faner shyǵaratyn zaýyt ta bar. Sonymen qatar jylyjaı keshenin, maı ekstraksııalaıtyn zaýyttardy da iske qospaqshy. Qazirdiń ózinde tartylǵan ınvestısııa kó­le­mi 202 mlrd teńgeden asqan. Bul byltyrǵy jyldyń sáıkes merzi­min­de tartylǵan ınvestısııadan 33,5 mlrd teńgege artyq. Oblys ákimi Qumar Aqsaqalov bıylǵy ınvestısııa kólemi byltyrǵydan 20 paıyzǵa artyq bolatynyn atap ótti. 

– О́ndiriske salynǵan árbir 4 teńgeniń 3-eýi jekemenshik ınves­tı­sııalar. Búgingi tańda barsha álem jaman indettiń kesirinen tú­si­niksiz jaǵdaıǵa qalyp, erteńgi kún­nen qaýip kútip, ózderiniń is­ker­lik belsendiligin tómendetip otyr­ǵanda bizde qarqyn artqany qýan­tady. Bir kezde biz de bastaǵan jobalarymyzdy aıaqtaı almaı qalarmyz dep qaýiptengen edik, biraq kez kelgen tyǵyryqtan shyǵýdyń joldary bolady eken. Ol úshin tipti artyq táýekelderge de barýdyń qajeti joq. Tek qolǵa alǵan isińniń halyqqa, elge paıdaly bolatynyna degen senim kerek eken, – dedi ol.

О́ndiriske ınvestısııa tartý boıynsha qazir Soltústik Qazaqstan respýblıkalyq ortasha kórsetkishten joǵary qatarda keledi. О́sim oblys ortalyǵynda ǵana emes, barlyq aýdandarda da bar. Qolǵa alynǵan jobalardyń toqtap qalǵany joq, bári alǵa jyljýda. Sondyqtan jaman indet óndiristi aıaqtan shala almady dep aıtýǵa tolyq negiz bar.

Soltústik Qazaqstan oblysy