Aıtýly jarystyń jalpykomandalyq esebinde Qazaqstan besinshi oryndy ıelendi. Bizdiń sportshylar 76 júldege (18 altyn+23 kúmis+38 qola) ıelik etti. Kósh basynda – Qytaı quramasy. О́z jerinde ótken baıraqty básekede Aspanasty eliniń ókilderi 416 júlde (119+119+98) oljalady. Bul – Azııa oıyndarynyń rekordtyq kórsetkishi! Ekinshi oryndy Ońtústik Koreıanyń oǵlandary enshiledi. Olardyń qorjynyna 232 medal (76+65+91) tústi. Úshinshi satyǵa Japonııanyń jampozdary jaıǵasty. Kúnshyǵys eliniń órenderi 216 júldeni (48+74+94) ıelendi. Tórtinshi orynda – Iran. Parsy eli sportshylarynyń otandastarymyzdan júldeleri áldeqaıda az bolǵanymen, medaldarynyń sapasy jaǵynan aldymyzdy orap ketti. Bul jarysta olar 59 márte (20+14+25) jeńis tuǵyryna kóterildi. Sondaı-aq Úndistan (14+17+33), Taıpeı (13+16+38), О́zbekstan (11+22+23), Taıland (11+9+32) jáne Malaızııa (9+18+14) quramalary ozyq ondyqtyń qataryna qosyldy.
XVI jazǵy Azııa oıyndarynda óner kórsetken jerlesterimizdiń arasynan eń úzdik kórsetkishke jeńil atletter qol jetkizdi. «Sport padıshasy» ókilderi 4 altyn, 4 kúmis jáne 3 qolany oljalady. Barlyǵy – 11 júlde. Bizdiń sportshylardyń arasynda Dmıtrıı Karpov (onsaıys), Olga Rypakova (úsh qarǵyp sekirý), Margarıta Masko (800 metrge júgirý) jáne Olga Tereshkovanyń (400 metrge júgirý) tuǵyry bıik boldy. Aýyr atlettermiz de ózderiniń myqtylyǵyn moıyndatty. Ziltemirshiler 9 márte (3+2+4) jeńis tuǵyryna kóterildi. Bas júlde Maııa Maneza (63 kılo), Svetlana Podobedova (75 kılo) jáne Ilıa Ilınge (94 kılo) buıyrdy.
Jekelegen sportshylar jaıynda aıtar bolsaq, kórkem gımnasshy Anna Alıabeva, grek-rım kúresi sheberi Nurmahan Tynalıev, boksshylar Danııar Eleýsinov pen Serik Sápıev, karateshiler Darhan Asadilov pen Rınat Saǵyndyqov jáne áıelder kúresiniń ókili Elena Shalygına syndy myqtylar qarsylas shaq keltirmeı, altyn tuǵyrdan qol bulǵady. Sonymen qatar regbıden (áıelder), sý dobynan (erler), kórkem gımnastıkadan jáne nysana kózdeýden (áıelder, 50 metr, tapansha) ótken komandalyq saıystarda bas júldeni qazaqstandyqtar jeńip aldy.
