«Partııalyq aktıv saýaldama negizinde 14 problemany aıqyndap aldy. Olardyń ishinde jeteýin saýaldamaǵa qatysýshylar 100 paıyz eń ózekti másele retinde kóterip otyr. Olar: shetel azamattaryna jerdiń jalǵa berilýine jáne satylýyna tyıym salý, jańa áleýmettik saıasatty qurý, ár balaǵa járdemaqy berý, aýyldy eldi mekenderde ońtaılandyrý jyldarynda jabylyp qalǵan medısınalyq mekemelerdiń jumysyn jandandyrý, búkil aýyldy, onyń ishindegi shalǵaıdaǵy aýyldardyń barlyǵyn ınternetpen qamtamasyz etý, shaǵyn jáne orta bıznes ókilderi men fermerlerge 2-4 paıyzben nesıe berý, sonymen qatar olardyń kommýnaldyq shyǵyndaryn sýbsıdııalaý, atajurtqa oralatyn qandastardyń Qazaqstan Respýblıkasynyń azamattyǵyn alýyn
jeńildetý, tıimsiz baǵdarlamalarǵa mıllıardtap qarajat jumsaýdy toqtatý», dedi T. Raqymbekov.
Saýaldamaǵa qatysqandar 14 suraqtan basqa, ózderin alańdatyp júrgen problemalardy da kórsetken. Sonyń ishinde 17 854 bıýlletende qosymsha máseleler kórsetilgen. Mysaly, 1000-nan astam adam saýaldamadaǵy 10 problemalyq máseleni belgilegen. Onyń ishinde aýyz sý, gazben jabdyqtaý, ınternet boıynsha 3 671 usynys kelip tústi. 2 787 adam aýyl sharýashylyǵy óndirýshilerin memlekettik qoldaýdy jetildirý, nesıeler men sýbsıdııalardyń qoljetimdiligi, kooperasııa negizinde ádil baǵalar boıynsha aýyl sharýashylyǵy ónimderin satyp alý jáne ótkizý júıesin qurýdy qoldaǵan. El turǵyndary azyq-túlik qaýipsizdigin qamtamasyz etý, baǵanyń ósýine jáne quramynda GMO bar ónimderdi satýǵa jol bermeý máselesin de ózekti dep tapqan. Sondaı-aq 2 758 respondent ıpotekany tóleýge múmkindik bolmaǵan jaǵdaıda turǵyn úıdi keıin satyp alý múmkindigin qarastyra otyryp, jalǵa beriletin turǵyn úı sanatyna aýystyrý týraly usynys jasaǵan. 2 448 respondent jastar úshin jumys oryndaryn ashýdy, onyń ishinde zeınetkerlik jasty tómendetý arqyly ony kóbeıtýdi usyndy. Pandemııaǵa baılanysty qyzmetin ishinara nemese tolyq toqtatqan kásipkerlerge 2 jylǵa deıin nesıelik demalys berý týraly 2 141 usynys kelip túsken. Odan bólek 1 793 adam turǵyn úı alý, sharýashylyq júrgizý jáne kásipkerlik qyzmet úshin kredıtter bere otyryp, jumys kúshi artylǵan ońtústik óńirlerden jumys kúshi tapshy soltústik óńirlerge ishki kóshi-qondy yntalandyrý týraly aıtqan. Stýdentter úshin avtobýstarda, poıyzdarda jáne ushaqtarda júrý tarıfterin 30 paıyzdan bastap 50%-ǵa deıingi jeńildikti qalpyna keltirý týraly usynysty 2 myńǵa jýyq adam qoldady. Al sport alańdary men stadıondar salý, ár aýylda densaýlyq saqtaý jáne mádenıet mekemelerin qalpyna keltirý boıynsha 1 174 usynys kelgen. Eń ózekti máselelerdiń ondyǵyn sýarmaly jáne jaıylymdyq jerlerdi qalpyna keltirý jáne tıimdi paıdalaný qorytyndylady.
Partııa ókilderi saýaldama nátıjesinde anyqtalǵan máseleler men usynystar partııa baǵdarlamasyna enetinine sendirdi.
