Qasym-Jomart Toqaevqa Qazaqstan Respýblıkasy Konstıtýsııasynyń 25 jyldyǵyna oraı ótken sharalardyń qorytyndysy jaıynda baıandaldy.
Konstıtýsııalyq Keńes Tóraǵasynyń aıtýynsha, Ata Zańnyń mereıtoılyq is-sharalaryn uıymdastyrý jáne ótkizý jónindegi Ulttyq jospar koronavırýs pandemııasy týdyrǵan qıynshylyqtarǵa qaramastan júzege asqan.
Prezıdentke mereıtoı sheńberinde ótken is-sharalar qorytyndysy boıynsha Ata Zańnyń áleýetin jan-jaqty iske asyrý jáne eldegi konstıtýsııalyq zańdylyq júıesin nyǵaıtýǵa baǵyttalǵan usynystar týraly aqparat berildi. Usynystardyń bir bóligi Konstıtýsııalyq Keńestiń quqyqtyq negizin odan ári jetildirý jáne azamattardyń konstıtýsııalyq quqyqtaryn qorǵaý kepildigin kúsheıtýge baılanysty kelip túsken.
Qasym-Jomart Toqaev Konstıtýsııa Qazaqstannyń memlekettiligi men elimizdiń strategııalyq damýynyń negizi ekenin aıtty. Táýelsizdiktiń 30 jyldyǵy aıasynda memlekettik organdar men azamattar konstıtýsııalyq talaptardy tereń túsinýi jáne ony basshylyqqa alýy kerek.
