Ata-analar jumysqa shyqqan soń balabaqsha jumys isteýi kerek. Sondyqtan balabaqshalar dezınfeksııalyq sanıtarlyq talaptardy saqtaı otyryp, jumysyn jalǵastyrýda. Bul jumystyń qalaı júrip jatqanyn Nur-Sultan qalasynyń bilim basqarmasy mektepke deıingi tárbıe jáne oqytý bóliminiń basshysy Aıgúl Erejepovadan surap bildik.
Onyń aıtýynsha, elordada 408 mektepke deıingi uıym jumys isteıdi. Onyń ishinde memlekettik mektepke deıingi uıymdar – 94, shaǵyn ortalyqtar – 41, jekemenshik mektepke deıingi uıymdar – 270. Karantın kezinde Nur-Sultan qalasynyń mektepke deıingi uıymdary Bas memlekettik sanıtarlyq dárigerdiń qaýlysyna sáıkes jumys algorıtmin qatań ustanady.
– Qazirgi ýaqytta balabaqshalar 15 baladan aspaıtyn kezekshi top rejiminde jumys istep jatyr. Balabaqshaǵa 3 kúnnen artyq kelmegen balalar ýchaskelik pedıatrdan densaýlyǵy jónindegi anyqtamasyn alyp qana keledi. Tańerteń balalardy qabyldaıtyn kezde medbıke dene temperatýrasyn ólsheıdi, ata-analar tek kireberiske deıin balany ákeledi jáne mindetti túrde maska taǵyp kelýi tıis. Barlyq uıym dezınfeksııalyq quraldarmen qamtamasyz etilgen. Dezınfeksııalyq-sanıtarlyq talaptar oryndalýda», deıdi bólim basshysy.
– Nusqaýlyq boıynsha tárbıelenýshilerdiń sany bir topta 15 baladan aspaýy tıis. Al qalǵan bala qalaı bilim alady?
– Jańa 2020-2021 oqý jylynda tárbıe-bilim berý úderisin uıymdastyrýdyń erekshelikteri Bilim jáne ǵylym mınıstrliginiń nusqaýlyq-ádistemelik hatynda túsindirilgen. Nusqaýlyqqa sáıkes mektep jasyna deıingi balalar úshin qashyqtan oqytý formaty qoldanylmaıdy. Mektep jasyna deıingi balalary bar ata-analardyń úlgilik baǵdarlamany óz betinshe ıgerýine keletin bolsaq, bul úshin qazaqstandyq bilimkids.kz kontenti bar. Munda úlgilik baǵdarlamaǵa sáıkes uıymdastyrylǵan oqytýdyń, sabaqtardyń elektrondy nusqalary ornalastyrylǵan. Buǵan qosa Nur-Sultan qalasynyń Bilim berýdi jańǵyrtý ortalyǵynda platforma quryldy jáne Elordamektep.kz elektrondy mektep portaly jumys isteıdi. Osynda «Mektepke deıingi tárbıe» bóliminde balalardyń ata-analary men mektepke deıingi uıymdardyń pedagogterine arnalǵan beınesabaqtar men materıaldar bar, – deıdi A.Erejepova.
Sondaı-aq mektepke deıingi uıymdardyń pedagogteri 5 bilim berý salasy boıynsha memlekettik tilde jáne orys tilinde beınematerıaldar daıyndady. Bul materıal ata-analarmen jáne balalarmen birlesip qaraý úshin daıyndalǵan. Qazirgi ýaqytta Bilim basqarmasy osy materıaldy ornalastyrý úshin platforma qurý jumysyn uıymdastyrýda.
Nur-Sultandaǵy №3 «Kúnshýaq» balabaqshasynyń ádiskeri E.Popovany da sózge tarttyq.
– Sanıtarlyq talaptardy algorıtm-nusqaýlyq boıynsha múmkindiginshe saqtaı otyryp jumys istep jatyrmyz. Ár saǵat saıyn 15 mınýt bólmeler jeldetip, balalardy múmkindiginshe serýenge shyǵaryp, dene qozǵalysy oıyndaryna basymdyq berilýde. Balanyń densaýlyǵy – basty nazarda. Kezekshi toptarda balalardyń sany 15 baladan aspaıdy. Qalǵan balalar úshin tárbıeshiler men pedagogterimiz memlekettik jáne orys tilinde beınesabaqtar daıyndady. Tárbıeshilerdiń balabaqshaǵa kelmegen balalardyń ata-analarymen keri baılanys ornatýy mańyzdy. Túrli qyzyqty tapsyrmalar berip, úıde otyrǵan balalardyń da belsendilik tanytýyna yqpal etýi kerek, – deıdi ádisker.
Indet kezindegi jekemenshik balabaqshanyń jumysy qalaı júrip jatqanyn bilý úshin «Alpamys» jekemenshik mektep-balabaqshasynyń dırektory, «Ádilet» mektepke deıingi uıymdar qaýymdastyǵynyń ókili Dınara Qudaıqulovamen sóılesken edik. Dınaranyń aıtýynsha, pandemııa kezinde jekemenshik balabaqshany ustap turý ońaı emes. Balalardyń kelýi 30%-ǵa azaıdy. Ár topta 10-15 baladan bala qatysýda. Kóp ata-ana indetten qaýiptenip, balalaryn ata-ájelerimen qaldyrýdy jón kóredi. Jeke balabaqshalardyń deni ǵımaratty jalǵa alyp otyr. Bıznesten túsetin kirister azaıýda, shyǵyndar ósip jatyr – antıseptıkter, dezınfeksııalyq eritindiler men kilemsheler, maskalar, qolǵaptar, termometrler satyp alýǵa kóp qarajat ketedi. Balalardyń 20 paıyzynyń ǵana kelýi bul shyǵyndardy ótemeıdi.
Jekemenshik balabaqshalardyń barlyǵy memleketten tapsyrys alady. Qazirgi jaǵdaıda jekemenshik balabaqshalar memlekettiń qoldaýynyń arqasynda ǵana óz bıznesterin ustap tur. Bıylǵy 1 qazannan bastap salyqtardy da keıinge shegerdi. Memlekettik tapsyrysta jalaqy, kommýnaldyq qyzmetter, jaldaý, salyq tólemderi, aǵymdaǵy jóndeýge, ádistemelik materıal satyp alýǵa arnalǵan shyǵystar kózdelgen. Alaıda qazirgi memlekettik tapsyrys kólemi jeke balabaqshalardyń barlyq shyǵynyn ótemeıdi. Bilim jáne ǵylym mınıstrligi usynǵandaı, Qarjy ortalyǵy qoldaý bildirip, 2021 jyldyń 1 qańtarynan bastap, jekemenshik balabaqshalardaǵy ár bala úshin memlekettik tapsyrysty 29 myń teńgeden 38 myń teńgege kóteredi dep úmittenemiz. Memlekettik tapsyrys kóleminiń kóbeıýi joǵarydaǵy shyǵyndardy jabýǵa múmkindik beredi. Qaýymdastyq ókili retinde basty másele dep osyny aıtar edim, – deıdi D.Qudaıqulova.
Átirgúl TÁShIM,
jýrnalıst
