Dál osyndaı naqty qamqorlyqty sezingen sharýashylyqtyń biri – Nura aýdanyndaǵy Egindi aýylynda qurylǵan «Ádiljan» sharýa qojalyǵy. Búginde Zýra Zeınýrqyzy basqaratyn bul sharýashylyqtyń qorasy malǵa toly. Tórt túliktiń bári bar demeseńiz de, jylqy, sıyr jáne qoı jaǵy jetkilikti, ósip-ónip jatqan jaǵdaıda. Zýra Zeınýrqyzynyń ózi osydan on segiz jyl buryn sharýa qojalyǵyn qurǵanda kóp qıynshylyqty kórgenin aıtady. Sondaı kezde bireýi tuqym, bireýi tehnıka berip, kómek qolyn sozǵan jerlesterine dán rıza.
«Biz sııaqty aýyl sharýashylyǵy kásipkerligimen aınalysatyn adamdarǵa degen qoldaýy men qamqorlyǵy úshin memleketimizge, Elbasy men Prezıdentimizge rızashylyǵymdy bildirgim keledi. Ásirese aýyl sharýashylyǵyn qarjylaı qoldaý qorynyń Qaraǵandy fılıalyna, onyń basshysyna aıtar alǵysym sheksiz», deıdi kásipker áıel.
Zýra Zeınýrqyzy atalǵan qordan osymen altynshy ret nesıe alypty. Sońǵy ret nesıeni 16 paıyzdyq ústememen alǵan eken, onyń 10 paıyzyn memleket tóleıtin kórinedi. «Munyń ózi biz sııaqty kásipkerlerge kórsetilgen úlken qoldaý. Jalǵyz biz ǵana emes, aınalamyzdaǵy birneshe sharýa qojalyq ta jeńildikpen nesıe alyp, jaǵdaılaryn túzep jatyr», deıdi Zýra Zeınýrqyzy.
Sharýashylyq mal ónimderin ótkizýdi de jolǵa durys qoıa bilgen. «Sút-qaımaq, qurt-maı, irimshik pen etti Nur-Sultan, Qaraǵandy qalalaryndaǵy saýda núktelerine ótkizemiz. Bul sharýany úlken ulym Qaırat ózi retteıdi», deıdi kásipker áıel.
Mal sharýashylyǵynan bólek, sharýa qojalyǵy bir myń gektardaı jerge bıdaı, arpa, suly seýip, egin orady. Bul sharýanyń bárimen Zýra Zeınýrqyzynyń ekinshi uly Janaıdar aınalysady. Tehnıka jaǵynan kemdik kórgen jerleri joq. Búgingi kúnde «QazAgroQarjy» kompanııasy arqyly traktor, kombaın sııaqty aýyl sharýashylyǵy tehnıkasyn túgeldeı jańartyp alǵan.
Isker azamatsha aýylda eki birdeı dúken ustaıdy. Bireýi azyq-túlik dúkeni bolsa, ekinshisi sharýashylyq taýarlaryna arnalǵan. Bul dúkenderdegi taýarlardyń da baǵasy qoljetimdi eken.
Qazirgi ýaqytta «Ádiljan» sharýa qojalyǵy jergilikti on adamdy jumyspen qamtyp otyr. Olardyń aı saıynǵy eńbekaqysy, malynyń qysqy jemshóbi, otyny da sharýashylyqtyń moıynynda. Jalpy, Zýra Zeınýrqyzy aýyldaǵy áleýmettik turǵydaǵy máselelerdi sheshýge belsendi túrde atsalysady. Mysaly, qysta joldy qardan arshý, sý tasyǵanda bóget salý sııaqty ortaq isterge úles qosyp otyrady.
Sonymen qatar aýyldaǵy jalǵyzilikti jandarǵa, kópbalaly, áleýmettik jaǵynan az qamtylǵan otbasylarǵa qoldan kelgen kómekten aıanǵan emes. Aıadaı ǵana aýyldyń turǵyndary da «Ádiljan» sharýa qojalyǵynyń qaıyrymdy isterine únemi rızashylyq tanytyp, jomart jandarǵa árqashan tilekshi bolyp júredi.
Zýra Zeınýrqyzy men Janat Qalybekuly ekeýi bes balany ósirip, aqar-shaqar bolyp otyrǵan otbasy. On shaqty nemerege meıirimdi aıamaı tókken ata men áje.
Sharýa qojalyǵynyń bolashaqqa degen jospary, alǵa qoıǵan maqsaty da zor. «Mal basyn kóbeıtip, tehnıka sanyn arttyryp, sharýashylyqtyń aıasyn keńitsek degen oıymyz bar. Mundaı nıetimizdi jergilikti ákimdik te qoldap otyr. Eń bastysy, elimiz aman, zamanymyz tynysh bolsyn. Qazir eńbek etemin degen adamǵa aınalaıyn ókimetimiz barlyq jaǵdaıdy jasaǵan ǵoı», deıdi zeınet jasynda ekenine qaramastan, belsendi ómir súrýge, adamdarǵa jaqsylyq jasaýǵa degen qulshynysy zor Zýra Zeınýrqyzy.
Qaraǵandy oblysy,
Nura aýdany
