«Taýarlardyń kóleńkeli aınalymyn qysqartý, sondaı-aq aınalymdy baqylaý úshin bıznes prosesterdi jolǵa qoıý arqyly kásibin adal júrgizetin kásipkerlerge teń jaǵdaı jasaýǵa jol ashady», dedi A.Myrzahmetov.
Memlekettik organdardyń qoldaýymen ulttyq palata EAEO aktileri men tańbalaý máseleleri boıynsha ulttyq zańnamaǵa negizgi normalardy engizdi. Atap aıtqanda, ár memleket tańbalaýdy engizýdiń kúnin ózderi belgilep, qanatqaqty jobalardy mindetti júrgizýge, tańbalaýǵa jatatyn taýarlar tizimin, sondaı-aq tańbalaýǵa jatatyn kodtyń qunyn palata jáne bıznes qaýymdastyqpen kelisip belgileýge múmkindik aldy.
Basqarma basshysy tańbalaýǵa jatatyn taýarlardy anyqtaýda bızneske artyq júkteme túsirmeıtin ekonomıkalyq turǵyda negizdelgen maqsatty tizimge kóńil bólý kerektigin aıtady.
Sút ónimderin tańbalaýda Ulttyq palata eksporttalatyn ónimderge basymdyq berilý kerek degen ustanymda. Bul amal EAEO naryǵyn saqtaý úshin qolǵa alynyp otyr dep sendirdi basqarma tóraǵasy. Ishki naryqta mundaı mindet qajet emes.
«Kásipkerler úshin bul prosedýranyń shyǵyny kóp. Sondyqtan memleketten qoldaý kórsetýin suraımyz. Bul jaǵdaıda tańbalaýdy engizýdiń shyǵyndaryn azaıtý úshin qoldaý quraldary men bıznesti yntalandyrý qajet. Bızneste tańbalaýdy engizý boıynsha aldyn ala esep júrgizilip, farmasevtıkaǵa 13 mlrd teńge, aıaq kıim sektoryna 1,6 mlrd teńge jáne sút óndirisi salasyna 9,7 mlrd teńge qajet ekeni anyqtaldy», dedi A.Myrzahmetov.
Onyń aıtýynsha, EAEO elderinen tańbalanbaı keletin taýarlardan ishki naryqty qorǵaý úshin qazir tehnıkalyq retteý, veterınarlyq sertıfıkattar, elektrondy shot-faktýralar sekildi tetikter qarastyrylǵan.
