Atalǵan álem chempıonatyna Qazaqstannyń boksshylary tolyq quramda baryp, barlyq 11 salmaq dárejesi boıynsha óner kórsetti. Biz úshin bul synaq sátsiz bastaldy. Alǵashqy aınalymda úkilegen qos úmitimiz jarys jolynan shyǵyp qaldy. 54 kılo salmaqtaǵy Mirjan Raqymjanov ózbekstandyq Bahodýrjan Sultanovtan utylsa, 60 kılo salmaqtaǵy Dýlat Boranqulov pákistandyq Asqar Álı Shahqa jol berdi. Kóp uzamaı 75 kılo salmaqtaǵy Gennadıı Golovkın oıda-joqta Muhammed Hıkalǵa ese jiberdi. Dál osyny eshkim kútpep edi. Mysyr eliniń ókili bizdiń saqa sportshydan baqandaı alty upaıǵa ozdy. Sol mejede 91 jáne +91 kılo salmaqtaǵy Jeńis Taýmurynov pen Rýstam Irgebaev jeńilistiń kermek dámin tatty. Alǵashqysy reseılik Aleksandr Alekseevten, ekinshisi amerıkalyq Maıkl Ýılsonnan jeńildi. Shırek fınalda 57 kılo salmaqtaǵy Berik Serikbaev san soǵyp qaldy. Onyń Reseıdiń dańqty boksshysy Alekseı Tıshenkoǵa áli jetpedi.
Al qalǵan bes boksshymyz qarsylastaryn qoǵadaı japyryp, jeńis tuǵyryna kóterilý múmkindigine ıe boldy. Solardyń arasynan Serik Sápıev pen Erdos Jańabergenovtiń tamasha ónerine tánti boldyq. 64 kılo salmaqta saıysqa túsken Qaraǵandynyń qyrany barlyq qarsylasyn kóp upaı aıyrmashylyǵymen utty. Atap aıtsaq, slovak Tıbor Glavaskı (37:13), amerıkalyq Karl Dagan (37:26), ýkraınalyq Nıkolaı Semenıagý (27:15), ázerbaıjan Emıl Magerramov (41:23) jáne ózbekstandyq Dılshot Mahmutov (40:21) qandasymyzǵa jarytyp qarsylyq kórsete almady. Erdostyń da ekipini eshkimdi shydatpady. 81 kılo salmaqta judyryqtasqan Mańǵystaýdyń marqasqasy koreıalyq Pak Sýn Son (34:20) men aýstralııalyq Ben Mak Ehrandy (36:24) bas-kótertpeı sabaǵan soń, shırek fınalda týnıstik Murad Sahraýıdi esinen tandyrdy. Jartylaı fınalda О́zbekstan maqtanyshy, Olımpııa oıyndarynyń qola júldegeri, álem chempıony, álem birinshiliginiń eki dúrkin júldegeri О́tkirbek Haıdarovtan (36:31) aılasyn asyrdy. Aqtyq saıysta horvatııalyq Marıo Sıvolıchti (27:12) jeńdi. Sóıtip, qazaqtyń qos myqtysy altyn tuǵyrda marqaıyp turdy.
Alǵashqy aınalymdardan súrinbeı ótken taǵy úsh boksshymyz qola medaldi moıyndaryna ildi. 48 kılo salmaqtaǵy Birjan Jaqypov majarstandyq Pal Bedakqa, al 51 kılo salmaqtaǵy Mırat Sársenbaev pen 75 kılo salmaqtaǵy Baqtııar Artaev Kýba qabylandary – Endrı Latıfa men Erıslandı Laraǵa ese jiberdi. Iá, araǵa segiz jyl salyp Almatyda ótken álem chempıonatynda bul nátıjeni jaqsartqanymyz ras. Alataý baýraıynda bizdiń jigitter 4 altyn, 2 kúmis jáne 2 qolany oljalaǵan edi. Bul 2013 jyl bolatyn.
Mıanıandaǵy jarystyń jalpykomandalyq esebinde Qazaqstan quramasy úshinshi oryndy ıelendi. Aldymyzdy Kýba men Reseı orady. Bostandyq araly ókilderi 4 altyn, 1 kúmis jáne 3 qolamen qorytyndylasa, kórshilerimiz 3 altyn, 1 kúmis jáne 1 qolany oljalady. Sonymen qatar Qytaı men Ońtústik Koreıa quramalary bir-bir bas júldege qol jetkizdi.
Álem chempıonattaryndaǵy Qazaqstan ulttyq qurama komandasynyń jeńip alǵan júldeleri:
1993 jyl. Tampere
Vasılıı Jırov (75 kılo) – qola.
1995 jyl. Berlın
Bolat Jumadilov (51 kılo) – kúmis, Vasılıı Jırov (81 kılo) – qola.
1997 jyl. Býdapesht
Ermahan Ybyraıymov (71 kılo) – kúmis, Bolat Jumadilov (51 kılo) – qola.
1999 jyl. Hıýston
Bolat Jumadilov (51 kılo) – altyn, Muhtarhan Dildábekov (+91 kılo) – kúmis, Ermahan Ybyraıymov (71 kılo) – qola.
2001 jyl. Belfast
Galıb Jafarov (57 kılo) – kúmis.
2003 jyl. Bangkok
Galıb Jafarov (57 kılo), Gennadıı Golovkın (75 kılo) – altyn.
2005 jyl. Mınıan
Serik Sápıev (64 kılo), Erdos Jańabergenov (81 kılo) – altyn, Birjan Jaqypov (48 kılo), Mırat Sársenbaev (51 kılo), Baqtııar Artaev (75 kılo) – qola.
2007 jyl. Chıkago
Serik Sápıev (64 kılo) – altyn, Baqtııar Artaev (75 kılo), Erkebulan Shynalıev (81 kılo) – qola.
2009 jyl. Mılan
Serik Sápıev (69 kılo) – qola.
2011 jyl. Baký
Serik Sápıev (69 kılo), Ádilbek Nııazymbetov (81 kılo) – kúmis, Ǵanı Jaılaýov (60 kılo), Ivan Dychko (+91 kılo) – qola.
2013 jyl. Almaty
Birjan Jaqypov (49 kılo), Mereı Aqshalov (64 kılo), Danııar Eleýsinov (69 kılo), Jánibek Álimhanuly (75 kılo) – altyn, Ádilbek Nııazymbetov (81 kılo), Ivan Dychko (+91 kılo) – kúmis, Qaırat Eralıev (56 kılo), Berik Ábdirahmanov (60 kılo) – qola.
2015 jyl. Doha
Danııar Eleýsinov (69 kılo), Ivan Dychko (+91 kılo) – kúmis.
2017 jyl. Gambýrg
Qaırat Eralıev (56 kılo) – altyn, Ábilhan Amanqul (75 kılo), Qamshybek Qońqabaev (+91 kılo) – kúmis, Erjan Jomart (49 kılo), Abylaıhan Júsipov (69 kılo), Vasılıı Levıt (91 kılo) – qola.
2019 jyl. Ekaterınbýrg
Bekzat Nurdáýletov (81 kılo) – altyn, Qamshybek Qońqabaev (+91 kılo) – kúmis, Sáken Bıbosynov (52 kılo), Abylaıhan Júsipov (69 kılo), Tursynbaı Qulahmet (75 kılo), Vasılıı Levıt (91 kılo) – qola.
