Búgin Mádenıet jáne sport mınıstri Aqtoty Raıymqulova QR-nyń Tuńǵysh Prezıdent – Elbasy Keńsesiniń qoldaýymen Qazaqstannyń Túrkııadaǵy Elshiligi jəne TÚRKSOI uıymy uıymdastyrǵan halyqaralyq onlaın konferensııaǵa qatysty.
Onlaın konferensııa N.Á.Nazarbaevtyń Ulu Bozkirin mirasi ("Uly Dala murasy") atty túrik tilindegi kitabynyń jaryq kórýine arnaldy. Sonymen qosa bul is-shara Tuńǵysh Prezıdenti kúnine oraı ótip otyr.
Jıynǵa túrki álemin zertteýmen aınalysyp júrgen ǵalymdar, qazaq jáne túrik saıası, iskerlik, ǵylymı elıta ókilderi qatysyp, baıandama jasady.
Kitapqa kórnekti memleket jáne saıası qaıratker, Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń ár jyldary kópshilik aldynda sóılegen sózderi men baıandamalary engen.
Sonymen qatar jınaq túrki álemi men dala órkenıetiniń tarıhy men damýynyń negizgi baǵyttaryn qamtıdy. Kitap dala órkenıetiniń tarıhı jáne rýhanı muralaryn jańǵyrtýdyń, túrki memleketteriniń ıntegrasııasyn damytýdyń zamanaýı úderisteri aıasynda erekshe ózekti əri mańyzdy bolyp otyr.
Basqosýda sóz alǵan Aqtoty Raıymqulova búginde Qazaqstan birlik pen qoǵam kelisiminiń altyn besigine aınalǵanyn atap ótti.
"Elimizdegi tatýlyq pen yntymaqtyń biregeı úlgisin jahan jurtshylyǵy zerdelep, "qazaqstandyq jol" nemese "Nazarbaev modeli" dep baǵa beredi. Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń salǵan sara jolyna álemdik saıasatkerler men ǵalymdar tarapynan qyzyǵýshylyq joǵary. Onyń bastamalary men ıdeıalary tereń zertteýlerge arqaý bolyp, oǵan halyqaralyq deńgeıdegi jetekshi buqaralyq aqparat quraldarynyń, álemdegi iri elder lıderleriniń de nazary kúsheıip otyr.
Sonymen birge Elbasynyń túrki elderiniń baýyrlastyq qarym-qatynasyn damytýdaǵy róli erekshe. Túrkııa Respýblıkasynyń burynǵy prezıdenti Abdýllah Gúl: "Búkil túrki álemi Nursultan Nazarbaevty óziniń kóshbasshysy retinde tanıdy jáne onyń baýyrlas túrki halyqtaryn biriktirý, ortaq tarıhty zertteý, mádenı baılanystardy damytý boıynsha bastamalaryn joǵary baǵalaıdy", dep kórsetken edi. Osy oraıda Elbasynyń túrki álemi jáne dala órkenıetiniń tarıhy men damýynyń negizgi baǵyttary týraly kópshilik aldynda sóılegen sózderi men baıandamalaryn qamtyǵan "Uly Dala murasy" atty kitaptyń túrik tilinde jaryq kórip otyrǵany asa qýanyshty jaǵdaı. Bul týyndy qazaq eli men búkil túrki halyqtary úshin shynymen de asyl mura bolyp qalady.
Elbasynyń túrki elderiniń yntymaqtastyǵyn ilgeriletý baǵytynda jasaǵan bastamalary jaıynda shyǵarylǵan bul kitaptyń ózektiligi álemde bolyp jatqan jahandaný men aımaqtandyrý úrdisi aıasynda erekshe aıqyndala túsetini sózsiz. Sonymen qatar ejelden qalyptasqan kóshpendiler órkenıeti murasynyń búgingi túrki ıntegrasııasy aıasyndaǵy mańyzy zor. Sondyqtan, Elbasy Nursultan Ábishuly Nazarbaevtyń osy baǵyttaǵy atqarǵan eńbegin túrki álemine nasıhattaý bizdiń baýyrlastyq paryzymyz. Biz úshin jáne bolashaq urpaq pen búgingi oqyrman úshin mańyzdysy – Elbasynyń murasyn túrki elderine tanytý. Kitaptyń túrik tilinde sóıleıtin oqyrmanǵa pash etilýi – qazaqtyń maqtanyshy", dedi mınıstr.
