KAZGIýÝ Ýnıversıteti Basqarma tóraǵasynyń birinshi orynbasary Ǵalymjan Qudaıbergenov pandemııaǵa joǵary oqý oryndary ártúrli deńgeıde daıyn bolǵanyn aıtady. Degenmen ýnıversıtetter sonyń arqasynda damýdyń dástúrli tásilderin qaıta qarastyryp, zamanaýı bilimge bir taban jaqyndaı túskenin de atap ótti. Sondaı-aq Ǵalymjan Baıanqululy qatysýshylarǵa stýdentter men ata-analar úshin iske qosylǵan Smart KAZGUU mobıldi qosymshasyn tanystyrdy.
«Búginde stýdentter úıden shyqpaı-aq shotyndaǵy balansyn ózi basqara alady. Sondaı-aq sabaq kestesin ózi quryp, ótinishti elektrondy túrde jazady, anyqtamalar men qujattardy da qolma-qol alýǵa múmkindigi bar. Mundaı qyzmetterdiń barlyǵy olarǵa mobıldi qosymshanyń kómegimen kórsetiledi. "Qarjy" bólimi arqyly stýdent óziniń balansyn basqarady. Stýdent nemese ata-anasy balansty tolyqtyra alady jáne shotta qansha qalǵanyn teksere alady. Sondaı-aq stýdentterge bir semestr nemese belgili bir kezeń boıynsha kóshirimin alýǵa múmkindik qarastyrylǵan», - dedi Ǵalymjan Qudaıbergenov.
Mobıldi qosymshanyń taǵy bir artyqshylyǵy, stýdent kredıttik oqytý júıesi boıynsha óziniń sabaq kestesin qurýyna bolady. Oqytýshyny, sabaq ýaqyty men kúnin de ózi tańdaı alady.
Tikeleı efırde ótken talqylaýǵa qatysýshylar árbir joǵary oqý orny bilim berýdegi klassıkalyq tásilder men sıfrlandyrýdy sátti úılestiretin qashyqtan oqytýdyń avtorlyq modelin ázirleý qajet degen qorytyndyǵa keldi.
