Qyzylordada budan jarty aıdan astam ýaqyt buryn «Gelıos» janar-jaǵarmaı quıý beketine shabýyl jasaǵan kúdiktiler qolǵa tústi.
Qyzylordada budan jarty aıdan astam ýaqyt buryn «Gelıos» janar-jaǵarmaı quıý beketine shabýyl jasaǵan kúdiktiler qolǵa tústi.
«Oqıǵa bıylǵy jylǵy 12 qarasha kúni saǵat 04:40 kezinde «Aqmeshit» shaǵyn aýdanynda ornalasqan «Gelıos» janar-jaǵarmaı quıý beketinde oryn aldy. Betperde kıip alǵan belgisiz eki adam beketke kirip kelip, kassa janyndaǵy qorapqa salynǵan 780 778 teńge aqshany tartyp alady. Ketip bara jatqandarynda aldarynan shyǵyp, qarsylyq kórsetken kassır I.Nurtazaevtyń keýde tusynan belgisiz atys qarýymen oq atqan. Nátıjesinde zardap shegýshi oqıǵa ornynda qaıtys bolǵan», – dedi osyǵan oraı oblystyq ishki ister departamenti baspasóz qyzmetindegiler.
Qyzylorda qalalyq ishki ister basqarmasy atalmysh faktige baılanysty Qylmystyq kodekstiń 96-baby 2-bóligi «j, z» tarmaqtarymen (adamdar toby, aldyn ala sóz baılasý arqyly qaraqshylyqpen ushtasqan kisi óltirý), 179-baby 2-bóligi «a, g» tarmaqtarymen (adamdar tobynyń aldyn ala sóz baılasý boıynsha qarý retinde paıdalanatyn zattardy qoldanýmen jasalǵan qaraqshylyq) qylmystyq is qozǵady.
Baspasóz qyzmetiniń málimdeýinshe, jedel-izdestirý sharalarynyń nátıjesinde atalǵan asa aýyr sanattaǵy qylmysqa qatysy bar degen 3 kúdiktige qatysty jınaqtalǵan dáleldemeler tergeý barysynda naqty aıǵaqtarmen bekitilgen. Qazir is boıynsha aıǵaq zattar alynyp, tergeý amaldary júrgizilip jatyr.
Qurysh NURYMBET.
