Forýmda ekologııa, ishki týrızm, azamattardyń quqyqtary men qazaq mádenıetiniń qundylyqtary keńinen qamtyldy. Atalǵan máselelerge baılanysty 50 úkimettik emes uıym ókilderine «Tań», «Aqparat», «Adamgershilik» qoǵamdyq qorlary jáne «Elsana» rýhanııat klýbynyń jetekshileri Shynar Iztileýova, Gúljan Eleshova, Saltanat Rahımova men Nurjan Ermuhanov saraptamalyq dıalog alańyn ótkizdi.
Oblys ákiminiń orynbasary Baqytgúl Hamenovanyń aıtýynsha, ÚEU ókilderi Úkimet pen qoǵamdy baılanystyratyn altyn kópir bolýy kerek.
– Memleket basshysynyń Qazaqstan halqyna Joldaýynda bılik pen qoǵam arasyndaǵy turaqty dıalogty ornatý úshin «Halyq únine qulaq asatyn memleket» tujyrymdamasyna basa mán berildi. Osyǵan oraı jergilikti atqarýshy organdardyń basshylary úkimettik emes uıymdar ókilderimen turaqty kezdesýler ótkizilýde. Bul forýmǵa qoǵamdyq uıymdardyń úzdik áleýmettik mańyzdy jobalary men bastamalaryna qoldaý kórsetý maqsatynda sheteldik jáne otandyq kásiporyndar qatysyp otyr, – dedi Baqytgúl Hamenova.
Úkimettik emes uıymdar arasynda qoǵamǵa paıdaly is atqaryp júrgeni bar. Máselen, «Inklıýzııa Bolashaq Atyraý» qoǵamdyq birlestigi erekshe balalarǵa arnalǵan ınklıýzıvti qoldaý synybyn ashyp, olardyń bilim alýyna jol ashyp otyr. Al «Móldir kóz» qoǵamdyq birlestigi zaǵıp jandardy bir ortalyqqa jınap, «Jartylaı fabrıkattalǵan ónimder» sehyn ashty. Qazir sehta 20 adam jumyspen qamtyldy. «Men barmyn!» qoǵamdyq qory Daýn sındromy bar balalarǵa bı úıretedi. «Aınalaıyn baladan» qoǵamdyq qory Maqat kentinde 20 balany kásiptiń qyr-syryna úıretý úshin tegin dáris ótkizýde.
Oblys ákiminiń orynbasary Baqytgúl Hamenova alty ÚEU ókiline «Halyq alǵysy» medalin tabystady. Sondaı-aq on tórt ÚEU ókili oblys ákiminiń Alǵys hatyn ıelendi.
Atyraý oblysy
