Er adamnyń jyly-jumsaq pisirýmen aınalysýyn nápaqa taýyp, bala-shaǵa asyraý úshin «áıeldiń isi, erdiń kúshi» dep jumysty «jynysqa» jiktemeı, qoldan kelgen tirlikti jasaý, sóıtip, kásiptiń kózin tabý deımiz be, áıteýir eshkim jaqsy isti joqqa shyǵara almaıdy. Qazir ashanalarda tamaqty dámdi etip daıyndaýda anaý-mynaý áıeldi jarty jolda qaldyratyn besaspap aspaz erler az emes, tipti mártebeli tulǵalardyń da jeke aspazdary kóbine erlerden bolyp keledi.
Jańaózen qalasynyń turǵyny Sábıt Qabykeev 21 jasynan bastap tátti torttar daıyndaıdy. Osy kásipti qolǵa alýǵa táttige degen súıispenshilik basty sebep bolǵan. Búginde ol ártúrli torttardyń quramyn ázirlep, ózi ataý beredi.
– Tort pisirip júrgenime 6 jyldaı boldy. Qytaıdaǵy oqýymdy tastap elge oralyp, bir jyldaı júrip, ózimniń bıznesimdi bastadym. Tapsyrystardy ázirshe úıde qabyldaımyn. Búginde menen sabaq alǵan shákirtterim de bar. Aldaǵy ýaqytta óz kondıterlik dúkenimdi ashýdy josparlap otyrmyn. Maqsatym – Jańaózen, Aqtaý qalalarynda kondıterlik stýdııa ashyp, kásibimdi keńeıtý. О́sip kele jatqan jastardy jumysqa tartyp, eńbekke baýlyǵym keledi. Qazir ózgeshe reseptermen 3 tort oılap shyǵardym, deıdi Sábıt Qabykeev.
Sábıt Qabykeevtiń aıtýynsha, bir tortty ártúrli jaǵynan jasap kórip, erekshe torttyń reseptin oılap tapqan. Ony daıyndap, naqty quramyn anyqtaý úshin 2 aıǵa jýyq ýaqyt ketken. Búginde ózi daıyndaǵan táttilerine «Aı tátti», «Úsh sulý» jáne «Aqqý» degen at qoıǵan 27 jastaǵy kásipker azamat bolashaqta jumyssyz júrgen jastarǵa tegin túrde bilim berip, óziniń kondıterlik dúkenine jumysqa alýdy maqsat tutady.
Al Sábıttiń torttarynnan dám tatyp, ony óz dastarhanynan kórýge asyqqan turǵyndar tek rızashylyqtaryn bildirýde.
Mańǵystaý oblysy
