21 qarashada kafede bolǵan gaz ballony jarylysy saldarynan 30-dan astam adam jaraqat aldy, eki adam qaza boldy. Halyqtyń ómiri men densaýlyǵyna úlken qaýip tóndiretin osy tótenshe jaǵdaıdy eskere otyryp Nur-Sultan ákimdigi qoǵamdyq tamaqtaný oryndaryn jospardan tys tekserýdi bastady. Elorda ákimi Altaı Kólginovtiń tapsyrmasy boıynsha jumys toby quryldy, onyń quramyna Tótenshe jaǵdaılar departamenti, Ishki ister mınıstrligi, turǵyn úı ınspeksııasy, ákimdik, ónerkásiptik qaýipsizdik basqarmasy jáne t.b. kiredi. Komıssııany ákim orynbasary Baqtııar Máken basqarady.
«Memleket kásipkerlerdi qoldaý úshin barlyq jaǵdaılardy jasaıdy, tekserýlerge moratorıı jarııalandy. Biz kásipkerlerimizge senemiz. ShOB nysandary óz kezeginde barlyq qaýipsizdik erejelerin saqtaýy kerek. Adam ómiri men densaýlyǵyna eshteńe qaýip tóndirmeýi kerek. О́tken aptada bolǵan oqıǵany eskere otyryp, mobıldi top jospardan tys tekserýlerge baryp, qosymsha nusqaýlar beredi. Eger zań buzýshylyqtar anyqtalsa, menshik ıelerine aıyppul jáne odan da qatal jaza qoldanylady», - dedi jumys tobynyń múshesi, ınvestısııalar jáne kásipkerlikti damytý basqarmasy basshysy Erlan Bekmyrzaev.
Jıynda qoldanystaǵy ballondardy kem degende 5 jylda bir ret qarap, kýálandyrý kerek ekendigi eske salyndy.
Korrozııalyq gazdarmen toltyrýǵa arnalǵan ballondar (hlor, metılhlorıd, fosgen, kúkirtti sýtek, kúkirt dıoksıdi, hlorsýtek jáne basqalary), sondaı-aq avtomobılder men basqa da kólik quraldary úshin otyn retinde qoldanylatyn syǵylǵan jáne suıytylǵan gazdarǵa arnalǵan ballondar kem degende 2 jylda bir ret tekserilýi tıis.
«Gaz jáne gazben jabdyqtaý týraly» Zańǵa sáıkes, suıyltylǵan munaı gazyn eki qabattan joǵary kóp qabatty turǵyn úılerdegi turmystyq ballondarda saqtaýǵa jáne (nemese) paıdalanýǵa tyıym salynady.
Gaz tutynatyn júıeler men gaz jabdyqtarynyń ıeleri olardyń tıisti tehnıkalyq jaǵdaıy men qaýipsizdigin qamtamasyz etýge mindetti.
