Atyraý qalasynda – 5 555, Jylyoı aýdanynda – 4 242, onyń ishinde Teńiz ken ornynda – 3 133, Qulsary qalasynda – 1 109, Inder aýdanynda – 361, Isataı aýdanynda – 251, Qyzylqoǵa aýdanynda – 435, Qurmanǵazy aýdanynda – 185, Maqat aýdanynda – 285, Mahambet aýdanynda 235 qaýipti indettiń belgisi rastaldy. Tek sońǵy eki táýlikte koronavırýs ınfeksııasyn 36 adam juqtyrdy.
Al 5 maýsym men 20 qarasha aralyǵynda monıtorıngtik toptar 15 122 nysanǵa 6 120 tekseris júrgizdi. Sonyń nátıjesinde 2 005 materıal jınaqtalyp, 86 mln teńgege jýyq aıyppul salynyp otyr. Onyń ishinde shekteý sharalaryn buzǵan 579 ákimshilik is jeke jáne zańdy tulǵalarǵa toltyryldy. Degenmen sala mamandary óńirdegi epıdemııalyq ahýaldy turaqty dep sanaıdy.
Oblys ákimi Mahambet Dosmuhambetov SOVID-19 indetiniń taralýyn odan ári boldyrmaý maqsatynda qurylǵan monıtorıngtik toptardyń jumysyn taldaý maqsatynda arnaıy keńes ótkizdi. Onda densaýlyq saqtaý basqarmasy, polısııa, sanıtarııalyq-epıdemıologııalyq baqylaý departamentteri, «Atameken» UKP-nyń óńirlik fılıalynyń basshylary, qala, aýdan ákimderi atqarylǵan jumystary týraly esep berip, usynystaryn jetkizdi.
– Qazir álem elderindegi ahýal kúrdelene tústi. Elimizdiń keıbir óńirlerinde indettiń taralýy aýqymy baıqalady. Sondyqtan kez kelgen ýaqytta daıyn bolýymyz kerek. Qaýipti indettiń aldyn alý úshin monıtorıngtik toptar ásirese demalys kúnderi baqylaýdy kúsheıtip, halyqqa túsindirý, eskertý jumysyn jandandyrǵany jón, – dedi M.Dosmuhambetov.
Sondaı-aq shekara beketinde elimizge kelýshilerge baqylaýdy kúsheıtý, senbi-jeksenbi kúnderi tekseris sharalaryn kóbeıtý, kásipkerlerdi karantın sharalaryn birneshe ret buzǵan jaǵdaıda lısenzııasynan aıyrý máseleleri talqyǵa salyndy. О́ńir basshysy memlekettik bas sanıtarlyq dárigerdiń qaýlysynda kórsetilgen talaptardy qatań saqtaýdy, monıtorıngtik top jumysyn turaqty zerdelep otyrýdy tapsyrdy.
Atyraý oblysy
