Qazirgi tańda avtojol salasynda eń jıi kezdesetin máselelerdiń biri – júk avtomobılderiniń shamadan tys júk tasýy bolyp otyr. Bul jańadan salynǵan joldardyń merziminen buryn buzylýyna alyp keledi.
Statıtıkaǵa júginsek, elimizdegi joldardyń 9,3 prosenti ǵana 10 tonnadan astam júktemeni qabyldaı alady. Al, jalpy paıdalanymdaǵy joldardyń 90,7 prosenti júk kólikteriniń eń az salmaǵyna da tótep bere almaıdy. Ol azdaı, sapasy jaǵynan qaýipti sanatta tur.
Zańǵa sáıkes jalpy paıdalanymdaǵy avtojoldar arqyly júk kóligimen 25 tonnadan astam júk tasymaldaýǵa tyıym salynǵan. Alaıda, depýtattar keltirgen aqparat boıynsha osy joldarmen 40 tonnaǵa deıin júk tasymaldaý tolastamaı tur.
"Bul problemaǵa tosqaýyl bolatyn baqylaýshy organǵa basa mán berý qajet. Mysaly, elimizde 95 myń 600 shaqyrym bolatyn avtomobıl joly bar. Al Kóliktik baqylaý ınspeksııasynyń jalpy shtat sany 278 mamandy quraıdy, kóliktik baqylaý beketteriniń sany – 53. Demek, bir Kóliktik baqylaý beketi shamamen 2 myń shaqyrym avtomobıl jolyn nazarda ustaý kerek. Bul, árıne, avtomobıl joldaryn tolyqqandy baqylaý úshin jetkiliksiz", – deıdi senatorlar.
Osyǵan baılanysty depýtattar aýyr júk tasymaldaýshy kólikterdi tekserý men baqylaýdy kúsheıtýdi jáne júk tasymaldaý faktilerin (tehpasport negizinde, ólsheýsiz) tekserý quqyǵyn polısııaǵa da berý múmkindigin qarastyrýdy surap otyr. Sondaı-aq, saýal barysynda oblystyq jáne aýdandyq mańyzy bar avtomobıl joldaryn salý, jóndeý jumystary kezinde zamanaýı ınnovasııalyq tehnologııalardy keńinen qoldanýdy talap etýdiń qajettiligi de aıtyldy.
