Konferensııa Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń (budan ári — Ulttyq komıssııa) qoldaýymen Nur-Sultandaǵy EQYU baǵdarlamalar keńsesi, Demokratııalyq ınstıtýttar jáne adam quqyqtary jónindegi bıýro, Qazaqstandaǵy «BUU-Áıelder» qurylymy, BUU Halyqtyń qonystanýy salasyndaǵy qory (IýNFPA) jáne #NeMolchıKZ qoǵamdyq qory birlesip uıymdastyrdy.
Alǵashqy sóz kezegi Ulttyq komıssııanyń tóraıymy Lazzat Ramazanovaǵa berildi. «Memlekettiń mańdaıaldy mindetiniń biri — zorlyqpen kúres. Otbasyndaǵy zorlyq-zombylyq qoǵamǵa keri áser etedi. Qazaqstanda búginde qolǵa alynyp jatqan sharanyń bári qoǵamda áıelder men balalardyń quqyǵyna qol suǵýdy túbegeıli joıý úshin jasalyp jatyr» dep atap ótti.
Konferensııaǵa Ulttyq komıssııa músheleri, ortalyq memlekettik organdar, Áıelder isteri jáne otbasylyq-demografııalyq saıasat jónindegi óńirlik komıssııalar, úkimettik emes uıymdar jáne halyqaralyq uıymdar ókilderi, sonymen qatar daǵdarys ortalyqtarynyń jetekshileri qatysty.
Kezdesýde turmystyq zorlyq-zombylyqtyń aldyn alýdyń qazaqstandyq jáne halyqaralyq tájirıbesi, ony vedomstvolardyń eleýi, daǵdarys ortalyqtarynyń qyzmeti, COVID-19 pandemııasy kezinde áıelderge qatysty zorlyq-zombylyqqa jol bermeý úshin jasalatyn tıimdi sharalar sóz boldy.
Qazaqstandaǵy «BUU-Áıelder» qurylymy men IýNFPA júrgizgen Jedel genderlik baǵalaýǵa qatysqan qatysýshylardyń 15,3% COVID-19 taralýy kezinde turmystyq zorlyq-zombylyqtyń kóbeıgenin estigenin, tipti keıbiri óziniń de basynan ótkergenin atap ótken. Karantın ýaqytynda turmystyq zorlyq-zombylyq týraly habarlaǵandarǵa kelsek, 25-34 jastaǵy áıelder úlesi (16,6%), ajyrasqandar (22,8%), halyqtyń áleýmettik turǵydan jaǵdaıy tómen top ókilderi (22%). Sonymen birge saýalnamaǵa qatysqan áıelderdiń 80% astamy pandemııa kezinde analardy qorǵaý, otbasyn josparlaý, turmystyq zorlyq-zombylyq kórgenderge psıhologııalyq qoldaý bildirý qyzmetine júginbegen.
Genderlik zorlyq-zombylyqqa qarsy óziniń qyzmetin atqarý kezinde EQYU-nyń Nur-Sultandaǵy baǵdarlamalar keńsesi 2020 jyly Qazaqstannyń segiz aımaǵyndaǵy daǵdarys ortalyǵynyń áleýetin arttyrýda. Bul jerlerde qosymsha oryndar bólinip, turmystyq zorlyq-zombylyqqa tap bolǵandarǵa jan-jaqty kómek kórsetetin mamandar tartylady.
«Qazaqstanda otbasyndaǵy kıkiljińge baılanysty polısııaǵa kúnine 500-den asa shaǵym kelip túsedi. Qoǵamnyń mindeti sol — memlekettiń, halyqaralyq qorlardy, úkimettik emes uıymdardyń kórsetip jatqan kómegin ár otbasyna jetkizý. Zorlyq kórgendermen ǵana emes, agressorlarmen de keshendi ári júıeli jumys júrgizý kerek. Zorlyqtyń tamyryn birlesip qana úzýge bolady», - deıdi quqyq qorǵaýshy, #NeMolchıKZ halyqaralyq qozǵalysy kóshbasshylarynyń biri, konferensııa uıymdastyrýshysy Dına Smaılova.
