Maqat aýdanyndaǵy L.Shahatov atyndaǵy №76 orta mektepte hımııa páninen dáris beretin ol sabynnyń birneshe túrin jasap shyǵardy. Hımııalyq qospasy joq sabyndar ekologııalyq turǵydan tazalyǵymen erekshelenedi.
– Gıpoallergendi ónimdi kúndelikti turmysta hosh ıisti sabyn retinde qoldanýǵa bolady. Sabyndy jasaý kezinde tabıǵı ónimderdi paıdalanamyn. Máselen, lımon denege balǵyndyq, quramyndaǵy S dárýmeni aǵzaǵa nár beredi. Ekinshi túri – aqjelken qosylǵan sabyn. Onyń quramynda dárýmender toptamasy bar. Aqjelkendi keptirý arqyly jasalǵan sabyndy jańa týǵan nárestege de, kez kelgen jastaǵy adamǵa da paıdalanýǵa bolady. Al ónimge qosylatyn efır maıy hosh ıis beredi, – deıdi hımııa pániniń muǵalimi Marfýǵa Aǵynova.
Jas maman atalǵan mekteptegi jumysyn bıyl bastady. Biraq sabyn jasaýmen aınalysqanyna bir jylǵa jýyqtaǵan eken.
– Hımııa – óte qyzyqty sala. Kúndelikti turmysta qoldanatyn osyndaı ekologııalyq taza ónimder jasaýǵa baýlý arqyly oqýshylardy atalǵan salaǵa qyzyqtyrýǵa bolady. Sabyn jasaýdyń qyr-syryn tolyq meńgergen soń ony oqýshylaryma úıretýge daıynmyn, – deıdi jas maman.
Atyraý oblysy
