Oblysta Raıymbek aýdanyn damytýǵa turaqty kóńil bólinip keledi. Qaıta jańǵyrǵan aımaqtaǵy 7 aýyldyń jolyn jóndeýge 1,6 mlrd teńgege qarjy bólinip, uzyndyǵy 65 shaqyrym jol jóndelgen. Onyń ishinde aýdan ortalyǵy Narynqol aýylynda jalpy uzyndyǵy 31,5 shaqyrym bolatyn kóshelerge 795 mln teńgege asfalt tóseldi. 8 turǵyn úımen biriktirilgen ýchaskelik polısııa pýnkti salyndy.
Byltyr Jambyl, Qaqpaq aýyldarynda dárigerlik ambýlatorııalar turǵyzylyp, paıdalanýǵa berilgen. Bıyl 1,1 mlrd teńgege Qyzylshekara, Jambyl, Qaqpaq aýyldarynda aýyz sý júıesi jasalyp jatyr. Aldaǵy ýaqytta taǵy 7 aýyl sapaly aýyz sýmen qamtylatyn bolady. 2018 jyldan beri 4 mektep pen 2 balabaqsha kúrdeli jóndeýden ótkenin de atap ótken lázim. Taǵy 3 mektepti kúrdeli jóndeýden ótkizýge jobalyq-smetalyq qujaty daıyndalǵan.
El ishindegi jaǵdaı ońalǵanyn aýyl sharýashylyǵy salasynyń alǵa basýynan baıqaýǵa bolady. Aýdanda, ásirese kartop ósirý isi jaqsy jolǵa qoıyldy. Oblys qarajaty esebinen 28 birlik traktor men 111 birlik aýyl sharýashylyǵy tehnıkasy, 236 tonna gollandııalyq «Sante» jáne «Agrııa» kartop tuqymdary satyp alynǵan. Investısııalyq jobanyń aıasynda 4 servıstik-daıyndaý ortalyǵy quryldy. Sonyń nátıjesinde kartopty ár gektarynan 300 sentnerden ónim alýǵa qol jetkizildi.
О́ńirdiń rýhanı jańǵyrýy da qarqyndy. Keler jyly aqıyq aqyn Muqaǵalı Maqataevtyń 90 jyldyǵyn ótkizý josparda bar. Osy oraıda Qarasaz aýylyndaǵy Mádenıet úıine, Muqaǵalı Maqataevtyń ádebı-memorıaldy mýzeıine jóndeý jumystary júrgizildi.
Jalpy, bıyl aýdan turǵyndary ıgiligine birneshe áleýmettik nysan men qyzmet kórsetý ǵımarattary, Narynqol aýylynda qyryqtan astam turǵyn úı qoldanysqa berildi. Sonymen qatar «Azamattarǵa arnalǵan úkimet» jəne aýdandyq prokýratýra ǵımarattary iske qosyldy.
– Shekaranyń shebinde, oblystyń shetinde qaıta shańyraq kótergen Raıymbek aýdanynyń jańaryp, kórkeıip kele jatqany kóńil qýantady. Elbasy Nursultan Ábishuly Nazarbaevtyń Jarlyǵymen qaıta qurylǵannan beri aýdandaǵy halyq sany ósip, 40 myńǵa jýyqtady. Sonyń ishinde eki myńnan asa adam týǵan jerine qaıta oraldy. Aýdannyń damýyna, ınfraqurylymyn qalpyna keltirýge bıýdjetten 17,9 mlrd teńge qarjy jumsaldy. Joldary jasalyp, kóshelerine asfalt tóselip, jańa ǵımarattar salyndy. Basqa da ıgilikterdiń barlyǵy jasalýda. Sonyń ishinde birinshi kezekte, aýdanǵa jumys isteýge kelgen qyzmetkerlerdi baspanamen qamtamasyz etý máselesin sheship kelemiz. Mine, salynyp jatqan 83 kommýnaldyq turǵyn úıdiń alǵashqy kezegin qoldanysqa berip otyrmyz, – deıdi oblys ákimi Amandyq Batalov.
Aıtpaqshy, aýdanda salynyp jatqan deneshynyqtyrý-saýyqtyrý kesheni de jyl sońyna qaraı aıaqtalýy tıis. Onyń alańy – 4257 sharshy metr. Keshendi «Fýd MS» kompanııasy salýda. Qurylys jumystaryna qazir 87 adam tartylǵan.
Almaty oblysy
