Kásipqoı rıngte 13 kezdesý ótkizip úlgergen 29 jastaǵy qandasymyz barlyǵynda jeńiske jetip, toǵyz básekeni merziminen buryn aıaqtady. Sońǵy ret Aıdos Erbosynuly bıyl jazda Mınskide Germanııanyń týy astynda óner kórsetip júrgen nıgerııalyq boksshy Nýhý Navaldy upaı sanymen utty. Qazirgi kezde ol WBC Asia, WBA International jáne WBO Global nusqalary boıynsha altyn belbeýlerdi ıelenýde.
Aıdosqa qarsylas atanǵan jigittiń jasy 31-de. Issa Samır kezinde áýesqoılar arasynda da ózin jaqsy qyrynan kórsetip, Búkilafrıka oıyndarynda kúmis medaldi moınyna ildi. 2011 jyldan beri ol kásipqoı rıngte kúsh synasýda. Sol aralyqta 19 ret sharshy alańǵa kóterilip, barlyq básekelesterinen basym tústi. 16 jekpe-jekti Issa nokaýtpen aıaqtady.
Sondaı-aq aıtýly jarysta Bekzat Nurdáýletovte óner kórsetedi. Kásipqoı rıngke ekinshi ret shyqqaly otyrǵan álem chempıony 40 jastaǵy nıgerııalyq Kabırý Tovolavımen judyryqtasady. Qara qurlyqtyń ókili buǵan deıin 15 kezdesý ótkizip, 13 ret ústemdik tanytqan.
