Quramyna salalyq jáne jergilikti kásipodaqtar fılıaldary tóraǵalarynyń, kásipodaq belsendileriniń qatarynan 16 múshe kiretin shtabty «Ustaz» qalalyq jergilikti kásipodaǵynyń tóraǵasy Serikjan Baıǵutdınov basqarady.
– Aldaǵy jyly 10 qańtarda ótetin Parlament Májilisi men máslıhattar depýtattarynyń saılaýyna baılanysty Kásipodaqtar federasııasy saılaýǵa baıqaýshy retinde qatysý týraly ótinish jasady. Aldymyzda eki mindet tur. Birinshiden, jumys berýshilerdiń óz qyzmetkerlerine qysym jasamaýy mańyzdy. Ekinshiden, biz saılaý prosesiniń el zańnamasyna sáıkes ótýin qadaǵalaýymyz kerek. Bizdiń negizgi mindetimiz – osyndaı mańyzdy proseste demokratııa qundylyqtarynyń damýyn jáne adamnyń tańdaý erkindigin zań sheńberinde qamtamasyz etý. Sol sebepti baıqaýshylardyń ashyq ári adal jumysyn uıymdastyrý qajet.
Kásipodaqtar federasııasy saılaý prosesteriniń ashyqtyǵyn jáne tikeleı daýys berý kúninde baqylaýdy tolyq qamtamasyz etetinine senimdi. Almaty qalasy boıynsha aýmaqtyq kásipodaqtar birlestigi bul jumysqa belsene qatysady. Búgin qalada 507 saılaý ýchaskesinde daýys berý barysyn qadaǵalaıtyn 715 múshe uıymnan 1014 táýelsiz baıqaýshy tirkeldi. Koronavırýs jaǵdaıyn eskere otyryp, ár saılaý ýchaskesinde eki kásipodaq ókilinen bolady.
– Almatydaǵy salalyq jáne jergilikti kásipodaqtardyń barlyq fılıaldary Kásipodaqtar federasııasynyń aldaǵy saılaýǵa baıqaýshy retinde qatysý týraly úndeýin qoldaǵany mańyzdy. Bizdiń saılaý kezinde baıqaýshy retinde tájirıbemiz jetkilikti. Sondaı-aq saılaýdyń qıyn pandemııa jaǵdaıynda ótetinin eskergenimiz jón. Sol sebepti prosestiń qaýipsiz, barlyq sanıtarlyq talaptarǵa saı ótýine yqpal etýimiz kerek, – dep atap ótti S.Baıǵutdınov.
Shtab kásipodaq baıqaýshylarynyń jumysyn úsh baǵyt boıynsha uıymdastyrady. Bul – oqytý, uıymdastyrý jumysy jáne BAQ-pen ózara is-qımyl. Munda halyqaralyq baıqaýshylarmen jáne sheteldik jýrnalıstermen kezdesýler ótedi. Josparlanǵan sharalardyń biri – aýmaqtyq kásipodaqtar birlestigi músheleriniń qalalyq uıymdardyń ujymdarymen jáne jumys berýshilerimen kezdesýleri.
Saılaýdyń ashyqtyǵyn qamtamasyz etý úshin kásipodaq baıqaýshylary arnaıy daıyndyqtan ótedi. Shtab janynda baıqaýshylar mektebi jumys isteıtin bolady. Munda oqytý men trenıngter onlaın formatta nemese barlyq qaýipsizdik sharalaryn saqtaı otyryp 50 adamǵa ótedi. Tájirıbeli dáriskerler baıqaýshylardy «Saılaý týraly» zańmen tanystyryp, quqyqtary men mindetterin túsindiredi. Sondaı-aq olarmen pandemııa kezindegi saqtyq sharalary boıynsha túsindirý jumystary júrgiziledi.
