Bir bólmeli 106 páterden turatyn on eki qabatty jańa úı Tilendıev dańǵylynan ońtústikke qaraı, Sarybulaq ózeniniń boıynda, Sh.Qosshyǵululy kóshesinde ornalasqan. Barlyq páter kezekte turǵandarǵa taza árlengen jáne qonystanýǵa daıyn kúıinde beriledi. Jalǵa alý quny 1 sharshy metr úshin aıyna 1 455 teńgeni quraıdy. Páter alǵandardyń arasynda dárigerler, medbıkeler, ǵylymı qyzmetkerler, zerthanashylar, oqytýshylar, tárbıeshiler, áleýmettik qyzmetkerler, polısııa jáne TJD qyzmetkerleri, sondaı-aq Nur-Sultan qalasy tótenshe jaǵdaılar departamentiniń órt sóndirý jáne apattyq qutqarý jumystary qyzmetiniń qutqarýshylary men qyzmetkerleri bar.
«Tuńǵysh Prezıdent Nursultan Nazarbaevtyń áleýmettik bastamalaryn iske asyrýdyń nátıjesinde elimizdiń kóptegen azamaty jeńildikti sharttarmen turǵyn úı alýda. Osy jyldyń jazynda bizdiń kompanııa men Nur-Sultan qalasynyń ákimdigi arasynda densaýlyq saqtaý, bilim berý qyzmetkerleri, mádenıet jáne sport qaıratkerleri, sondaı-aq polısııa jáne TJD qyzmetkerleri qatarynan jergilikti atqarýshy organda kezekte turǵandarǵa «Nurly jer» baǵdarlamasy boıynsha keıinnen satyp alý quqyǵymen turǵyn úı berý týraly kelisimge qol qoıyldy. Osy áleýmettik mańyzy bar jobany iske asyrýǵa biz kóp jyldyq tájirıbemizdi eskere otyryp kiristik. Búgin biz óte mańyzdy, ásirese osyndaı qıyn ýaqytta, áleýmettik sala ókilderine kiltterin tabystaımyz», dedi «Qazaqstan ıpotekalyq kompanııasy» IU» AQ basqarma tóraǵasy Ádil Muhamedjanov.
Beriletin páterlerdiń aýdany 37-den 53 sharshy metrge deıin. Jaldaý merzimi – 20 jyl. Jaldaý merzimi aıaqtalǵannan keıin páterler turǵyndardyń menshigine ótedi. Merziminen buryn óteýge moratorıı joq, jalǵa alýshylar turǵyn úıdi qaldyq quny boıynsha kez kelgen ýaqytta satyp ala alady.
«Tuńǵysh Prezıdent kúni qala turǵyndarynyń taǵy bir bóligi óz páterlerinde qonys toıyn toılaıdy. Búgin muǵalimder, medısına qyzmetkerleri, TJD, JP qyzmetkerleri, áleýmettik qyzmetkerler, mádenıet jáne sport qaıratkerleri baspanalaryna kirdi. Atalǵan páterler Qazaqstan ıpotekalyq kompanııasymen birge, jyldar boıy baspanany kútip, kezekte turǵan tulǵalarǵa satyldy. Osy baǵdarlama boıynsha myńǵa jýyq páter josparlanǵan. 350-den astamy taratyldy, búgin 100-den astam otbasy baspanalaryna kirdi», dedi elorda ákimi Altaı Kólginov.
