Elordalyq komandamen eki jyl tabysty nátıje kórsetip, bıyldan bastap «Lokomotıv» klýbynyń tizginin ustaǵan Andreı Skabelka Iаroslavlde «Barysqa» qarsy ótkizgen alǵashqy kezdesýinde 7:2 esebimen jeńiske jetken-di. Araǵa aı salyp Nur-Sultanǵa qonaqqa kelgen ol bul joly da jeńisine senimdi bolǵan. Alaıda keıingi matchtarda sátti oıyn kórsetip júrgen «Barys» oıynshylary oǵan múmkindik bergen joq.
Ketken eseni qaıtarý úshin muzaıdynǵa shyqqan Iýrıı Mıhaılıs shákirtteri á degennen-aq oıyn tizginin qoldaryna alyp, kezdesýdiń esebin birinshi bolyp ashty. 9-mınýtta Anton Sagadeev qarsylas qaqpasyn dál kózdedi. Degenmen ekinshi kezeńde «Lokomotıv» shabýylshysy Georgıı Ivanov (27-mınýt) esepti teńestirip ketti. Biraq qonaqtardyń qýanyshy kópke sozylmady. Arada 10 mınýt ótkende Mettıý Frettın «Barystyń» ekinshi shaıbasyn soǵyp, esepti taǵy alǵa shyǵardy. Al úshinshi kezeńniń sońǵy mınýtynda qonaqtardyń bos qaqpasyna gol soqqan Lınýs Vıdell kezdesýdiń núktesin qoıdy. Osylaısha «Barys» 3:1 esebimen jeńiske jetip, «Lokomotıvten» ese qaıtardy.
