Jataqhanalardyń jaıy jaqsy bolmaı tur

Máselen, Taraz qalasyndaǵy Jambyl po­lı­tehnıkalyq joǵary kolledjiniń áleý­e­ti óte jaqsy. Bilim berýdegi jańa­shyl­­dyqtar, tyń bastamalar munda kóp. Biraq atalǵan bilim nysanynyń jataqhanasyna kó­ńil bólinbegen. Iаǵnı, kúrdeli jóndeý qa­jet. Munda jańartý jumystary sońǵy ret 10 jyl buryn júrgizilipti. Sodan beri jataqhana kúrdeli jóndeý kórmegen kúıi tur. Aıta keteıik, kolledj jataqhanasy 40 jylǵa jýyq stýdentterdiń úıi bolǵan. Sol sııaqty Jambyl aýdanynda or­na­lasqan №17 Jambyl kolledjiniń jataq­ha­nasynda da osyndaı másele bar. Bú­gin­gideı kúrdeli jaǵdaıǵa qaramastan, stý­dent­ter atalǵan kolledjde dástúrli oqý formatynda bilim alýda. Biraq jataq­hana jaısyz, bir sózben aıtqanda, turýǵa qolaısyz. Tipti bólmeleriniń esigi múldem qulyptanbaıdy. Al kolledj basshylyǵy tozyǵy jetken ǵımaratty qaıta-qaıta syrlap, áktep áreń ustap otyr. Atalǵan kolledjde jýynatyn ar­naıy oryn bolma­ǵan­dyqtan jas­tar senbi, jeksenbi kúnderi úılerine jibe­ri­ledi.

Bul kúnde Talas aýdanynyń ortalyǵy Qarataý qalasynda 4 kolledj bar. Qa­ladaǵy №2 Qarataý kolledjiniń ja­taqhanasynda 36 stýdent turady. Ǵı­ma­rat 1977 jyly salynǵan. Munda da ja­taqhanany kúrdeli jóndeýden ótkizý má­selesi týyndaǵan. Búginde jataq­ha­na ǵımaraty eskirip, terezeleri syn­ǵan. Esikteri qulyptanbaıdy jáne ǵı­ma­rattyń syrtynda «Jataqhana» degen ataýy da jazylmaǵan. Bul kolledj byltyr júrgizilgen monıtorıng ná­tıjesinde e­limizdegi eń nashar 10 kol­ledjdiń tizimine enipti. Qalǵan 3 kol­led­jdiń jataqhanasynyń jaǵdaıy ortasha. Sondaı-aq Jýaly aýdanynda ornalasqan №16 Jýaly kolledjiniń jataqhanasyna da kúrdeli jóndeý qajet. Jalpy, 32 orynǵa arnalǵan jataqhanada karantın talaptaryna sáıkes qazir 20 stýdent turyp jatyr. Alaıda stýdentter ta­rapynan jataqhanaǵa degen suranys óte joǵary. Biraq bárine birdeı oryn jetkizý taǵy múmkin emes. Bıylǵy oqý jylynyń ózinde jataqhanadan oryn alýǵa 50 stýdent ótinim beripti. О́ńirdegi kol­ledj jataqhanalarynyń búgingi jaǵ­da­ıy osyndaı.

Osy oraıda Nur Otan partııasy oblystyq fılıaly janyndaǵy Jas Otan jas­tar qanatynyń músheleri de óńirdegi kol­ledjderge zerdeleý jumystaryn júrgizip, atalǵan kemshilikterdi oblys­tyq bilim basqarmasyna joldaǵan. Endi al­daǵy ýaqyttarda quzyrly mekeme atal­ǵan máselelerge baılanysty qan­daı she­shim shyǵarady, ol ýaqyttyń enshi­sin­de­gi dúnıe.

Búginde bilim sapasyn arttyrý – basty talap. Memleket tarapynan kórsetilip otyrǵan qoldaý da az emes. El Prezıdenti Qasym-Jomart Toqaev bilim sapasyna «Jańa jaǵdaıdaǵy Qazaqstan: is-qımyl kezeńi» atty Joldaýynda da toqtalǵan bolatyn. Alaıda stýdentterdiń sapaly bilim alýy úshin de jaǵdaı kerek. Biraq Jambyldaǵy jataqhanalardyń búgingi jaǵdaıy osyndaı bolyp tur. Jyl saıyn óńirdegi bilim berý salasyna tıisti qarajat bólinedi. Atalǵan bilim nysandarynyń bári de oblystyq bilim basqarmasyna qarasty bolǵandyqtan, basqarma basshylyǵynyń osy ýaqytqa deıin jataqhana máselesine kóńil bólmeı kelgeni tipti túsiniksiz. Búginde oblysta 46 tehnıkalyq jáne kásiptik bilim berý mekemesi jumys isteıdi. Onyń 23-i memlekettik bolsa, 23-i jekemenshik. Sondaı-aq memlekettik 16 kolledjde, memlekettik emes 3 kolledjde jataqhana bar.

«Jalpy, oblystaǵy 19 kolledjdegi jataqhanalardyń syıymdylyǵy 2 840 adamdy quraıdy. Shtattyq rejimde jumys istep otyrǵan №2 Qarataý, №8 Moıynqum, №16 Jýaly jáne №17 Jambyl kolledjinde 110 stýdent jataq­ha­namen qamtylǵan. Sonymen qatar 3 kolledjge 750 oryndyq jataq­ha­na­ǵa qajettilik bar», deıdi oblystyq bilim basqarmasy tehnıkalyq jáne kásip­tik bilim berý bóliminiń basshysy Altynaı Jaılyshqyzy. Bólim bas­shysynyń aıtýynsha, №16 Jýaly ko­l­ledji jataqhanasynyń ǵımaraty to­zy­ǵy jetýine baılanysty byltyr qa­ra­sha aıynda aýdan teńgerimine berý qujattary daıyndalyp, ótkizý-qabyldaý aktileri jasalǵan. Bıyl ǵımaratqa aýdan tarapynan jobalyq-smetalyq qu­jat­tar jasalyp, oblysqa 2021 jylǵa «Jol kartasy» baǵdarlamasy aıasynda qurylysyn júrgizý usynylǵan. «№2 Qa­rataý kolledjiniń jataqhanasy bes qabattan turady. Biraq onyń úshinshi jáne besinshi qabattary paıdalanylmaıdy. Jataqhana qazirgi tańda 50 orynǵa yńǵaılastyrylyp, ekinshi qabatqa or­na­lasqan. Kolledjdiń únemdelgen qara­ja­tynan stýdentterge tamaq daıyndaıtyn, jýynatyn bólme jáne ájethana iske qosylǵan. Kelesi jyly №2 Qarataý kolledjin ońtaılandyrý jumystary jos­parlanyp otyr», deıdi Altynaı Jaılyshqyzy.

Qazirgideı ǵylym men bilimniń da­my­ǵan ǵasyrynda aýdandardaǵy kolledj jataqhanalaryna kóńil bólinbeýi estigen qulaqqa ersi jaǵdaı. Talapqa saı emes jataqhana «jyrynyń» Jambyl oblysynda jýyq arada bitetin túri kó­rinbeıdi. Onyń ústine, oblystaǵy merdiger kompanııalar da jataqhana qu­ry­lysyn júrgizýge qulyqsyz eken. Ne sebepti olaı ekeni ózderine bolmasa, ózge­lerge beımálim. Osylaısha búginde stýd­entter tozyǵy jetken jataqhanada áýpi­rimdep kúneltýde. Búgingi stýdent, er­teńgi mamannyń áli qansha ýaqyt osylaı júretini belgisiz...

Jambyl oblysy