Memleket basshysynyń Halyqqa Joldaýynda aıtylǵan tapsyrmasyna sáıkes «Balalardy sportpen, mádenıetpen jáne mektepten tys qosymsha bilimmen jappaı qamtý úshin jaǵdaı jasaýdyń Jol kartasy» jasaldy. Bilim, mádenıet, sport jáne t.b. salalardaǵy aqysyz úıirmeler men seksııalardyń jumysyn uıymdastyrý kózdelip otyr. Nátıjesinde balalardy aqysyz qosymsha bilimmen qamtý 83%-ǵa deıin jetkiziledi.
Sonymen qatar, 2021 jyly jergilikti bıýdjet esebinen barlyq mektep stadıondaryn jańartý josparlanýda. Bul óz kezeginde barlyq mektep oqýshylaryna sabaqtan tys ýaqytta sportpen tegin aınalysýǵa múmkindik beredi.
Qosymsha bilim berý uıymdarynyń jelisi damyp keledi. Jaqyn arada Alataý men Naýryzbaı aýdandarynda eki Oqýshylar saraıynyń qurylysy bastalady. Bıyl pandemııaǵa baılanysty qoldanystaǵy Oqýshylar saraıyn jańartý keıinge qaldyryldy. Bul jumys kelesi jyly qaıta bastalady.
Sport ǵımarattarynyń qoljetimdiligine keletin bolsaq, qaladaǵy sporttyq nysandarynyń sany men ornalasýyn saraptaı otyryp, olardyń basym bóliginiń qalanyń ortasynda ornalasqanyn anyqtadyq.
2020 jyly sportpen aınalysatyndar sany 588 321 adamdy qurady. Sporttyq ınfraqurylymdy damytýdyń arqasynda keler jyly biz sportpen shuǵyldanatyndardyń qataryn taǵy 65 myń adamǵa kóbeıtemiz.
Jabyq sport zaldarynyń tapshylyǵy 2021 jyly 30%-dan tómendeıdi. Osy maqsatta bıylǵy jyly 700-den astam shaǵyn sport nysany salyndy. Olar shaǵyn fýtbol, basketbol, voleıbol alańdary, jattyǵý alańdary jáne ámbebap oıyn alańdary. Jetisý aýdanynda biregeı «Jekpe-jek ortalyǵy» jobasy júzege asty. Bul joba qalanyń barlyq aýdandarynda júzege asatyn bolady.
Memlekettik-jekemenshik áriptestik aıasynda 12 mektep stadıony jańartylýda, jalpy 100-den astam mektep stadıony jańartýdy qajet etedi.
Jalpy bilim beretin mektepterde balalar men jasóspirimderdiń dene shynyqtyrý klýbtary ashylady.
Jańa Almaty yqshamaýdandaryndaǵy jabyq sporttyq nysandarǵa degen suranysty qanaǵattandyrý úshin 2021 jyly alty sporttyq-saýyqtyrý kesheni salynady. Jetisý, Túrksib jáne Medeý aýdandarynda úsh sporttyq-saýyqtyrý ortalyǵyn salý boıynsha daıyndyq jumystary qazirdiń ózinde aıaqtalýda. Basseın, oıyn zaly, jekpe-jek zaly, horeografııa sııaqty sporttyq-saýyqtyrý ortalyqtarynyń úsh tıptik jobasy ázirlendi. Alataý aýdanynda 14 kortqa arnalǵan tennıs ortalyǵynyń qurylysy bastaldy.
Búgingi kúni qalada 3399 sport nysany bar.
