Aınur Egdirbek Abaıdyń 90 óleńi men 30 qarasózin jatqa biledi. Uly aqynnyń óleńine qumartqan ol aýdandyq, oblystyq, respýblıkalyq "Abaı oqýlary" saıystarynda júldeli orynǵa qol jetkizdi. Ol 12 jastan beri "Abaı oqýlary" saıysyna qatysyp keledi. 2019 jyly Semeı qalasynda ótken Respýblıkalyq "Abaı oqýlary" saıysyna qatysyp, bas júldeni ıelendi. Bıyl onlaın rejimde uıymdastyrylǵan jarysta da bas júlde aldy. Halyqaralyq saıys aldaǵy ýaqytta Nur-Sultan qalasynda ótedi dep josparlanǵan.
"Men Aınurǵa qazaq tili páninen sabaq beremin. Ol óte uqypty. Aınur tek Abaı atamyzdyń emes Shákárimniń óleńderin de jatqa aıtady. Úmit kútetin shákirtterimniń erekshe qabiletin birden kóremin. Ásirese Aınur erekshe qabiletti. Arasynda óleń jazatyny da bar", dedi ustazy Barshagúl Jumaǵalıeva.
