Sońǵy ýaqytta sheteldik avtokólik ıeleriniń belgisiz bireýlerdiń memlekettik tirkeý nómirlerin urlap, keıin qaıtarý úshin aqsha talap etkeni týraly shaǵymdary kóbeıip ketti. Qaraǵandy oblystyq Polısııa departamentiniń basshylyǵy osy qylmystardy jasaýǵa kúdikti tulǵalardy ustaý maqsatynda túngi reıdter ótkizetin jedel-izdestirý toptaryn qurdy. Urlyq faktilerine taldaý jasaý barysynda polısııa qyzmetkerleri qylmystyń atalǵan túriniń kóp jasalǵan aýmaǵy Qaraǵandy qalasynyń Ońtústik-shyǵys aýdany ekenin anyqtady. Sondyqtan polısııa qyzmetkerleri osy aýmaqqa basa nazar aýdaryp, jumystar atqardy. Kúndelikti ótkizilgen keshendi jedel-izdestirý is-sharalary oń nátıjege qol jetkizýge múmkindik berdi.
– 8 jeltoqsan kúni tańǵy saǵat 05.00 shamasynda Qaraǵandy qalalyq Polısııa basqarmasy krımınaldyq polısııa qyzmetkerleri ótkizgen jedel-izdestirý is-sharalary barysynda Iаzev kóshesinde ornalasqan úılerdiń biriniń aýlasynda turǵan kólikterdiń birinen tirkeý nómirin sheship jatqan 18 jáne 20 jastaǵy eki azamat ustaldy. Tekserý barysynda olardan toǵyz nómir tárkilenip alyndy. Sondaı-aq ustalǵandar Qaraǵandy qalasynda avtokólikterden tirkeý nómirlerin urlaýdyń 29 faktisin moıyndady, – dedi Qaraǵandy oblystyq Polısııa departamentiniń bastyǵy Erlan Faızýllın.
Qazirgi tańda ustalǵan azamattarǵa qatysty Qazaqstan Respýblıkasy Qylmystyq kodeksiniń 194-babynyń 2-tarmaǵyna (Qorqytyp alý) sáıkes qylmystyq is qozǵalyp, tergeý amaldary ótkizilýde.
Qaraǵandy oblystyq Polısııa departamenti kólik ıelerine kóliktiń memlekettik tirkeý nómiri urlanǵan jaǵdaıda dereý polısııaǵa habarlaý kerektigin eske salady.
