Ortalyqtyń ashylý rásimine oblys ákimi О́mirzaq Shókeev, Túrkistan oblysy boıynsha sybaılas jemqorlyqqa qarsy qyzmet departamentiniń basshysy Hakım Kóshqalıev qatysty.
Ortalyqtyń basty maqsaty – halyqtyń ózekti máselelerin sheshý boıynsha shuǵyl áreket etý jáne azamattardyń quqyǵyn júzege asyrýda memlekettik organdardyń ózara birlese árekettesýin qamtamasyz etý.
"Qazirgi ýaqytta "Adaldyq alańy" jobasy aıasynda oblysta memlekettik qyzmetterdi alý barysynda qolaıly jaǵdaıdy qamtamasyz etetin, sonymen qatar ákimshilik kedergiler men bıýrakratııalyq sozbalańdy boldyrmaýǵa baǵyttalǵan memlekettik organdardyń "servıstik" úlgige kóshý prosesi qarqyndy júrgizilýde", - delingen ákimdik taratqan aqparatta.
Túrkistan oblysynyń ákimi ortalyqtyń ashylý rásimi barysynda taǵy bir eleýli oqıǵanyń ótip jatqanyn basa aıtty.
"Túrkistanda kóptegen ǵımarattar ashylyp jatyr. Biraq bul ǵımarattyń orny bólek. Adaldyq ortalyǵyna halyq kelip óz máselelerin aıtyp, tıisti quqyqtyq keńester alady. Bul – Elbasymyzdyń talaby, prezıdentimizdiń "halyq únine qulaq asatyn memleket" tujyrymdamasynyń júzege asýy. Bul memlekettik qyzmetterdiń ashyqtyǵyna jańa qadam bolmaq. Sondyqtan biz úshin bul úlken oqıǵa dep oılaımyn", - dedi О́mirzaq Shókeev.
Aıta keteıik, ortalyqtyń qyzmetine azamattardyń máselelerin jedel ári birlese sheshý, ótinishterdi qabyldaý, tegin quqyqtyq keńes kórsetý kiredi. Sondaı-aq, halyqtyń quqyqtyq saýattylyǵyn arttyrý boıynsha keshendi sharalar qabyldanatyn bolady.
