ÁLEM KÝBOGY ALMATYDA

Qazaq fýtboly úshin qadamy qutty, jeńister juǵysty bolǵaı Taǵatsyzdana kútken sát te kelip jetti– Keshe Almatyǵa áýe kemesimen álemdik deńgeıdegi teńbil dop dodasynyń  Bas júldesi –    FIFA Álem kýbogy ákelindi. Qalaı desek te, jarqyn keleshekte álemdik matchtarǵa qatysýdan kúderin úzbegen qazaq fýtboly úshin bul jaqsy yrym. Fýtboldyń basty trofeıiniń Qazaqstanǵa kelgen qadamy qutty bolyp, jeńister bizdiń jigitterge juǵysty bolsa, qanekeı. Álem kýbogy Almatyda úsh kún turaqtaıdy. Álem kýbogyn Halyqaralyq Almaty áýejaıynan kútip alýǵa asyqqan, basty trofeıdi qol sozym jerden tamashalaýǵa tal­pyn­ǵandardyń basym bóligin BAQ ókilderi qurady. Jaqsy oqıǵany jarnamalaýǵa asyqqan jýrnalıs­ter búıirinde FIFA  tańbasy men­mundalaǵan ushaqtan  birinshi bolyp Kýbokty kútip aldy. О́z tarıhynda toǵyz aılyq sa­parǵa shyqqan Álem kýbogyn qol­dy etip almaý sharalary joǵary deńgeıde uıymdastyrylǵanyn buǵan deıin de habarlaǵanbyz. Sebebi, som altynnan quıylǵan,  jalpy salmaǵy 6 kılo 175 gramm  tar­tatyn trofeı 1966 jyly An­glııada Kýboktyń ashyq sherýi kezinde urlanǵany belgili. Osy oryn­syz oqıǵa  1983 jyly Brazı­lııa­da qaıtalanady. Alǵash An­glııa­da qoldy bolǵan Bas júlde ta­bylyp, ıelerine qaıtarylsa, óki­nishke oraı, ekinshi joly Kýbok izim-qaıym joǵalady. – Kýbokty udaıy FIFA-nyń arnaýly kúzet qyzmetiniń adam­dary alyp júredi. Onyń Qazaq­stan­daǵy qaýipsizdigin qamtamasyz etý úshin biz de qosymsha kúzet agenttiginiń qyzmetkerlerin jal­da­dyq. Sol sııaqty Kýboktyń 86 memlekettegi sapary túgeldeı qaýipsizdik sharalarymen qamtama­syz etilgen, – deıdi jobanyń úı­lestirýshisi Arystanbek Nurmaha­nov. Sonymen, jumada jetken Ký­bok Almatydaǵy “Interkontınen­tal” qonaqúıinde túnep, senbi kúni  aldyn ala jasalynǵan tizim­ge kirgen kópshilik nazaryna usy­nylady. Ondaı tańdaýlylardyń qatarynda – balalar úıleriniń tárbıelenýshileri, “Bylǵary dop” jalpyulttyq balalar men jas­óspirimder fýtboldyq týrnırleri­niń jeńimpazdary, úkimetttik emes uıymdardyń músheleri bar. Al jeksenbi kúni Álem ký­bo­gyn “Coca Cola” kompanııasynyń Almatydaǵy zaýytynda 5 myńdaı adam qol sozym jerden tamasha­lap, sýretke túse alady dep kútilý­de. Qazirge satylǵan bıletter sany osyndaı. Basty trofeıdiń kóshirmesin emes, dáp ózin kórýdiń áseri ǵajaıyp. Mundaı sırek sát­ter bizdiń fýtbol jankúıerlerine aıta-aıta júrerlikteı qulshynys­ty qýanysh syılary sózsiz. Dúnıejúzilik fýtbol dodasy­nyń eń  basty júldesiniń  Qazaq­stanǵa at basyn tireýge “Coca Cola” kompanııasy yqpal etip otyr­ǵanynan oqyrman habardar. Atalmysh kompanııa 60 jyldan beri álemdik teńbil dop doda­larynda jarnama jasap qana qoı­maı, áýesqoı fýtboldan bastap bar­lyq deńgeıde ótetin jarys­tardyń basty demeýshisi bolyp tabylady. Al FIFA-nyń shtab-páterinen bastalǵan Álem kýbogynyń bul jolǵy saıahaty 134 017 shaqy­rym­ǵa sozylyp, Jer sharyn úsh ret aınalyp shyǵýǵa bolatyndaı óz tarıhyndaǵy  eń alys saparǵa shyǵyp otyr. Sonymen FIFA Álem kýbogy­nyń túpnusqasy kezekti ret alda Ońtústik Afrıkanyń Iohannes­býrg qalasyndaǵy “Soccer City” stadıonynda ótken dodada jeńip shyqqan eldiń quramasyna tap­syrylǵanǵa deıin taǵy birqatar memleketterdi aralaıdy. Kýbok Qazaqstannan keıin Ońtústik Koreıaǵa attanady. Fýtbol dese ishken asyn jerge qoıatyn jankúıer tabanyna eki qabat malahıt salynǵan trofeıdiń túbine 1974 jyldan beri fýt­bol­dyń Álem kýbogyna ıe bolǵan elderdiń attary men jyldary oıyp jazylǵanyn biledi. Al bıyl aqtyq synǵa joldama alǵan 32 komanda tuńǵysh ret Afrıka qurlyǵynda bas trofeı úshin barlaryn salatyn bolady. Aınash ESALI. Almaty.