Ár jyldyń ózindik ereksheligi bolatyndyǵyn eskere otyryp, daıyndyq jumystarynyń talaptaryn eseleı túskender utady. Iаǵnı, barlyq uıymdastyrý-sharýashylyq sharalarynyń jıyntyǵyn qapysyz qamdaý basty shart bolmaq.
–Aýdan boıynsha 31521 iri qara, 31100 usaq mal, 12822 bas jylqy, 9316 shoshqa túligi qystatylýda, – deıdi aýdandyq aýyl sharýashylyǵy bóliminiń basshysy Vıktor Shkýrıhın. Osy rette, iri seriktestiktermen qatar, sharýa qojalyqtary men jeke turǵyndar qaraýyndaǵy mal sany anaǵurlym artqanyn aıta ketken lázim. Soǵan baılanysty jumys josparynyń aýqymy da keńeıip otyr. Aýyl sharýashylyǵy qurylymdarynda josparly is-sharalar – qora-jaılardy jóndeý, dezınfeksııalaý, zootehnıkalyq jáne veterınarlyq uıymdastyrý jumystary tolyq deńgeıde atqaryldy. Kadrlar quramy da jetkilikti. Bıyl, ádettegideı, mal azyǵynyń bir jarym jyldyq qory daıyndaldy. Byltyrǵylarǵa qosa, 81 myń tonna shóp, 5000 tonna saban, 54 myń tonnadan astam júgeri súrlemi, 15 myń tonna pishendeme, 98,5 myń tonna qurama jem daıyndalýy naýqandy oıdaǵydaı ótkizýge múmkindik beredi.
Basshynyń bul sózderi jyldyń ótken kezeńinde qol jetken tabys eselene túsetinine negizdelgeni belgili. Ústimidegi jyldyń qarashasyna deıin óńir malshylary tirideı salmaqta 4586,8 tonna et, 20780,6 tonna sút óndirgen. Bul kórsetkishter 2019 jyldyń sáıkes merzimimen salystyrǵanda 102,4 jáne 100,3 prosentke joǵary. Báseke kóshin Altynbek Qurmanqulov basqaratyn «2019 jyldyń úzdik ujymy» oblystyq baıqaýdyń jeńimpazy – «Shýıskoe» jaýapkershiligi shekteýli seriktestigi bastap keledi. Munda 790 iri qara, 464 bas jylqy qystatylýda. Sharýashylyq qarasha aıyna deıin 316 saýyn sıyrdan 2016,4 tonna sút daıyndady.
Et óndirý boıynsha «Altyndán», «Bastaý», «Shýıskoe», «Abdýalıevter», «ArmanAtbasarAgro» jáne «Shortanbaı» jaýapkershiligi shekteýli seriktestikteri aldyńǵy qatarda eken.
Bıyldyń ózinde «AtbasarAgroProdýkt», «Novoselskoe», Atbasar Dándi Astyq» jaýapkershiligi shekteýli seriktestikteri men «Táýke» sharýa qojalyǵynda ettik baǵyttaǵy fermanyń ashylýy tabys arnasyn keńeıte túsetinine senim qalyptastyrady. Bulardyń qaraýyndaǵy 350 iri qara mal sanyn kóbeıtý baǵytyndaǵy jumystar júrgizilýde. Búgingi kúni aýdan boıynsha 2020 jylǵa arnalǵan mal sharýashylyǵy salasyn damytýdyń ındıkatıvtik josparlary tuqymdyq túrlendirý boıynsha 118,3 prosentke, buqashyqtardy bordaqylaý alańyna ótkizý boıynsha 100,2 prosentke oryndalýy da jaqsy oılarǵa bastaıdy.
