Polısııa departamenti baspasóz qyzmetiniń málimetinshe, qalanyń eki turǵyny «Turǵyndar qalashyǵy» shaǵyn aýdanynda turatyn zeınetkerdi tonap ketken.
Páterdiń esigin ashqan zeınetkerge urylar kúsh kórsetip, aqshasyn, uıaly jáne radıo telefonyn, altyn alqasy men syrǵasyn tartyp alyp, oqıǵa ornynan boı tasalaǵan. Alaıda urylardyń taırańdaýy uzaqqa sozylmady.
«Atalǵan qylmysty jedel ashý maqsatynda tájirıbeli qyzmetkerlerden arnaıy jedel top quryldy. Izdestirý is-sharasy kezinde kúdikti eki azamat anyqtalyp, ustaldy. Tekserý kezinde 71 jastaǵy azamatshaǵa 479 000 teńge zalal kelgeni, sonymen qatar, kúdiktilerdiń bireýi buryn urlyq qylmysy úshin sottalǵany anyqtaldy», - dep habarlady oblystyq polısııa departamenti bastyǵynyń orynbasary Nurhat Orazbaev.
Qazir kúdiktilerge qatysty QR Qylmystyq kodeksiniń 191-baby 3-bólimimen sotqa deıingi tergeý júrgizilip jatyr.
