Ardaq Otorbaev qurylǵyǵa patent alýǵa arnalǵan qujattar paketin 2020 jyldyń basynda ótkizgen bolatyn. Komandamen birge ol barlyq sharttardy oryndap, qajetti qujattardyń barlyǵyn usynǵan. Nátıjesinde Ulttyq zııatkerlik menshik ınstıtýty ónertapqyshqa patent bergen kórinedi.
Elimizdiń klımaty keıde jańbyrly, birde qar jaýyp, artynsha ol erip, múgedekter arbasyn paıdalanýshylarǵa qolaısyzdyq týǵyzyp jatady. Arbanyń dóńgelekteri tez lastanǵandyqtan úı-jaılarda da yńǵaısyz jaǵdaı bolatyny belgili.
Ardaq Otorbaevtyń aıtýynsha, múgedekter arbasynyń dóńgelekterin mehanıkalyq qurylǵymen jýý arqyly birshama ýaqytty únemdeýge bolady, qosymsha kúsh-jiger men yńǵaısyzdyqty qajet etpegendikten adamnyń psıhologııalyq jaǵdaıy da jaqsarady. Mundaı jabdyqtar áleýmettik jáne medısınalyq mekemelerde, sport keshenderinde, halyqqa qyzmet kórsetý ortalyqtarynda jáne basqa da qoǵamdyq oryndarda ornatylsa, quba-qup bolar edi.
A. Otorbaev múgedektigi bar adam bolǵandyqtan erekshe qajettilikteri bar adamdardyń ómir súrý jaǵdaılaryn jaqsartý qanshalyqty mańyzdy ekenin basqalardan artyq túsinedi. О́zi joǵary bilimdi, arbamen sporttyq bı bıleýden halyqaralyq dárejedegi sport sheberi, Álem chempıonattary men Parazıadalyq oıyndardyń birneshe dúrkin júldegeri, Qazaqstan paralımpıadalyq quramasynyń múshesi.
Qazir ol «DOS» táýelsiz ómir» múgedekter qoǵamdyq birlestiginiń atqarýshy dırektory bolyp jumys isteıdi jáne múgedekter arbasyndaǵy adamdardyń ómirin neǵurlym yńǵaıly jáne táýelsiz etý úshin jańa paıdaly modelder oılap tapqan konstrýktorlyq bıýrony basqarady. Sonymen qatar Ardaq búginde úsh balany tárbıelep otyr.
«Men úshin arba – bul meniń armanymdy júzege asyratyn, jumys isteıtin, balalardy tárbıeleıtin, sportpen aınalysatyn, óz sezimderim men oılarymdy bildiretin, bir sózben aıtqanda ómirdi onyń barlyq kórinisterinde jaqsy kóretin ómir saltym», deıdi ol.
Ol mektep jasynan bastap tehnıkany jóndeýmen aınalysa bastaǵan. Sol kezden-aq ákesiniń kóligin jóndeýge, mektepte synǵan jıhazdy qalpyna keltirýge kómek qolyn sozatyn. Ýaqyt óte kele ol avtomehanıkamen kásibı túrde aınalysýdy qolǵa alǵan.
«О́zimniń arbamdy jóndeý prosesi meni elordamyzda múgedekter tehnıkasyn jóndeý boıynsha qyzmetter joq degen oıǵa alyp keldi. Osylaısha, múgedekter tehnıkasyna qyzmet kórsetý boıynsha «Inva STO» biryńǵaı servıstik ortalyǵyn qurý ıdeıasy týdy, onda biz arbalardy jóndeýden bastap jańǵyrtýǵa deıin, jańa konstrýktorlyq sheshimder oılap tabýǵa deıingi qyzmetterdi usynamyz. Bizde jalǵa berý qyzmeti de bar», deıdi konstrýktor.
Ideıany iske asyrý «Samruk Kazyna Trust» Áleýmettik jobalardy damytý qory men áleýmettik kásipkerlikti damytýǵa baǵyttalǵan «Áreket» jobasynyń arqasynda múmkin boldy. 2019 jyly Qoǵamdyq birlestik Qordyń grantyn jeńip alyp, ortalyqtyń materıaldyq-tehnıkalyq bazasyn nyǵaıtyp, arbadaǵy múgedekterdiń jeke qajettilikteri úshin múgedekter arbalaryn jańǵyrtý jáne ońaltýdyń qosymsha quraldaryn qurý qyzmetterin iske qosty.
«Áleýmettik kásipkerlik - bul tabys tabý kózi emes, ol áleýmettik maqsattarǵa qol jetkizýdiń quraly bolyp tabylatyn áleýmettik maqsattar men kommersııalyq quraýyshtyń teńgerimi. Mysaly, biz múgedek adamdarǵa arbalardy jóndeýge kómektesý arqyly máseleni sheshemiz. Sonymen qatar biz jobamyzǵa erekshe qajettilikteri bar adamdardy jumysqa ornalastyrdyq, ıaǵnı jumyssyzdyq máselesin sheship qana qoımaı, osyndaı adamdardyń qoǵamda áleýmettenýine kómektesemiz», deıdi A. Otorbaev.
Onyń aıtýynsha, alynǵan tabys áleýmettik máselelerdi sheshýge, mysaly, muqtajdarǵa arnalǵan múgedekter arbalaryn óteýsiz jóndeýge, halyqtyń osal toptaryna materıaldyq kómek kórsetýge, erekshe balalarǵa arnalǵan sheberlik sabaqtaryna, múgedektigi bar adamdar úshin Nur-Sultannyń kórikti jerleri boıynsha ekskýrsııalar uıymdastyrýǵa baǵyttalady.
