El Prezıdenti óziniń quttyqtaý sózinde otandyq kásiporyndar – ulttyq ekonomıkanyń tiregi, basty kúshine aınalǵanyn aıtty. Táýelsizdik jyldaryndaǵy elimizdiń jetistigin aıta kele, pandemııaǵa qaramastan otandyq kásiporyndardyń eksporttaǵy úlesiniń tómendemegenine alǵysyn bildirdi.
Atalǵan jıynǵa Shymkent qalasynyń ákimi Murat Áıtenov te onlaın qatysty.
Bıyl Shymkentten «Altyn sapa» syılyǵyna qatysýǵa 6 kompanııa ótinish bildirdi. Onyń ishinde «Isker» arnaıy syılyǵynyń laýreaty bolyp «Alem BT» JShS-i tanyldy.
«Álem BT» JShS-i - otandyq naryqty tolyq qamtamasyz etýden bólek, shetelge de ónimderin eksporttap jatqan iri kásiporyndardyń biri. Bul qazaqstandyq shulyq-toqyma zaýytynyń ónimderine suranys joǵary. Kásiporyn qýattylyǵy jylyna 16 mıllıon jup ónimdi quraıdy. Erler, áıelder men balalarǵa arnalǵan 200-den astam shulyq ónimderiniń assortımentin shyǵarady. Kásiporyn jumys istep turǵan barlyq kezeńde 2 mlrd.teńgeden astam ónimdi TMD jáne Eýropa elderine eksporttady.
«Altyn sapa» premııasy jyl saıyn úzdik taýar óndirýshiler, qyzmet kórsetý sapasynda joǵary jetistikterge qol jetkizgen kásipkerlerge konkýrstyq negizde beriledi. Atalǵan baıqaýda jyl saıyn tórt nomınasııa boıynsha syılyqtar taǵaıyndalady. Iаǵnı, ár jyly óndiristik, qyzmet kórsetý, halyqqa taýar usynatyn, tamaq jáne aýylsharýashylyq ónimderin shyǵaratyn eń úzdik kásiporyn ıegerleri anyqtalady.
Aıta ótý kerek, buǵan deıin baıqaýda «Kazmedpribor Holding» JShS (2015 j), «Karlskrona» JShS (2016 j), «Hımfarm» AQ (2016 j), «Planta» JShS (2017 j), «Azala tekstıl» JShS (2018 j) jeńimpaz atanǵan bolatyn.
