«Elimizdiń eń basty ulyq merekesi – Qazaqstan Respýblıkasynyń Táýelsizdigi kúnimen shyn júrekten quttyqtaımyn! Táýelsizdik – bul bizdiń eń qasterli de qasıetti, baǵa jetpes qundylyǵymyz. Táýelsizdiktiń alǵashqy kúnderinen ekonomıkamyzdy qalyptastyrýǵa barynsha kúsh salýdamyz. Osy rette, Alashtyń anasy atanǵan Syr eli de - Táýelsiz Qazaqstannyń damýyna zor úlesin qosyp keledi», - dedi oblys ákimi.
Gúlshara Ábdiqalyqova birqatar azamattarǵa Qazaqstan Respýblıkasynyń Prezıdenti Qasym-Jomart Kemeluly Toqaevtyń 2020 jylǵy 3 jeltoqsandaǵy № 461 Jarlyǵyna sáıkes memlekettik jáne qoǵamdyq qyzmette sińirgen eńbegi, eldiń áleýmettik-ekonomıkalyq sondaı-aq mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin berilgen memlekettik nagradalardy tabystady. Olardyń qatarynda mádenıet jáne ǵylym qaıratkerleri, densaýlyq saqtaý, bilim berý, aýyl sharýashylyǵy, óndiris jáne bıznes salalarynyń ókilderi bar.
II dárejeli «Barys» ordenimen Qyzylorda «Bolashaq» ýnıversıtetiniń ǵylymı jetekshisi, ekonomıka ǵylymdarynyń doktory, professor, Qazaqstan Respýblıkasy Ulttyq ǵylym akademııasynyń akademıgi Baqbergen Dosmanbetov marapattalsa, «Qurmet» ordeni Qyzylorda oblystyq juqpaly aýrýlar aýrýhanasynyń bas dárigeri Aına Muhambetova, Qarmaqshy aýdanyndaǵy «Jańa jol» JShS dırektory Orynbasar Tólepov jáne basqa da azamattarǵa tabystaldy.
III dárejeli «Eńbek dańqy» ordenimen marapattalǵandardyń qatarynda Syrdarııa aýdanyndaǵy «Qyzyldıhan» sharýa qojalyǵynyń mehanızatory Qanat Baıkenjeev, Qyzylorda qalasyndaǵy «QazGerMunaı» birikken kásiporny» JShS operatory Qaırat Bısenbaev, Qyzylorda jylý elektr ortalyǵynyń slesari Ádilbek Bohanov, Shıeli aýdanyndaǵy «Baıken U» JShS dánekerleýshisi Joldasbek Myrzalıev bar.
Qazaqstan Respýblıkasy Prezıdentiniń Qurmet gramotasymen eńbek ardageri, memleket jáne qoǵam qaıratkeri Bıǵalı Qaıýpov nagradtaldy, al, Nartaı Bekejanov atyndaǵy Qyzylorda oblystyq qazaq mýzykalyq drama teatrynyń ártisi Baqytbek Temirbekovke «Qazaqstannyń eńbek sińirgen qaıratkeri» qurmetti ataǵy tabystaldy.
Sondaı-aq, Táýelsizdik merekesine oraı jazýshy, ekolog-pýblısıst, Qazaqstan Jazýshylar odaǵynyń múshesi Saılaýbaı Jubatyruly men memleket jáne qoǵam qaıratkeri Seıitsultan Aıymbetovke «Qyzylorda oblysynyń qurmetti azamaty» ataǵy berildi.
