Prezıdent Qasym-Jomart Toqaevtyń Táýelsizdik kúni qarsańynda ótken Memlekettik nagradalar tapsyrý rásiminde sóılegen sózi

Egemendik – ár halyqqa buıyra bermeıtin baǵa jetpes baqyt.

Táýelsizdik shejiresi Tuńǵysh Prezıdentimiz – Elbasynyń tarıhı tulǵasymen tyǵyz baılanysty. Nursultan Ábishuly Nazarbaev – jańa dáýirdegi Qazaqstannyń negizin qalaǵan uly qaıratker. Onyń esimi jasampazdyq jylnamasyna Qazaq memleketiniń avtory retinde jazyldy. Mine, egemen elimizdiń ómirindegi taǵy bir mereıli beles jaqyndap keledi.

Biz qasterli Táýelsizdiktiń 30 jyl­­dyǵyna qadam basamyz. Bul – bar­shamyzǵa ortaq ónegeli ólshem, taǵy­lym­dy kezeń. Jańa memle­ket qurýǵa atsa­lysqan búkil halqy­myz­dyń eren eńbeginiń tarıhı shejiresi. Son­dyqtan men kelesi jyldy «Táýel­­siz­diktiń 30 jyldyǵy» dep jarııa­ladym.

О́tken árbir on jyldyq atqarǵan mıssııasy turǵysynan ǵasyrdyń júgin arqalap tur.

Alǵashqy on jyldyq egemen Qa­zaqstannyń óz derbestigin qalyp­tastyrý kezeńi boldy.

Ekinshi on jyldyqta elimiz tuǵy­ryn nyqtap, keregesin keńeıtip, irge­sin bekitti.

Úshinshi on jyldyqta memle­ketimiz shyn máninde, kemeline kelip, álemdik saıasattyń tórine ozdy.

Aldaǵy tórtinshi on jyldyqta bizdi jańa mindetter kútip tur. Eli­mizdi ilgeri damytyp, árbir azamattyń la­ıyqty turmysyn qamtamasyz etýimiz kerek. Ony júzege asyrýdyń basty joly – tıimdi basqarý júıesi.

Men Joldaýymda memlekettik basqarýdyń jańa úlgisine basa mán bergenimdi bilesizder. Osyǵan oraı, kóptegen naqty shara atqarylýda.

Jalpy, jańǵyrýdyń jan-jaqty bolǵany jón. Búkil halqymyz zaman aǵymyna ilese bilýge tıis. О́zge­ris­terge beıimdele alatyn jurt qana ýaqyt tynysyn dóp basady. Biz bi­limdi ári bilikti, uqypty jáne jaýapty, isker de eńbekqor jurt bolýymyz qajet. Bul – uly Abaı aıtqandaı, «tolyq adamnyń» aıqyn kórinisi. Oǵan qosa, árkimniń jeke qasıeti men maqsaty eldik múddemen tyǵyz astasyp, patrıotızmge ulasýy kerek. Sonda ǵana memleketshildik ıdeıasy basty qundylyqqa aınalady.

Qurmetti otandastar!

О́kinishke qaraı, pandemııa kesirinen biz elimizdiń basty ulttyq merekesin jyldaǵydaı keńinen atap óte almaımyz. Bizge azamatta­ry­myzdyń densaýlyǵy, ómiri men amandyǵy bárinen qymbat.

Sondyq­tan barlyq is-shara­myzdy shek­teýli formatta jáne onlaın rejimde ótkizip jatyrmyz. Alaıda bul Táýel­sizdik kúniniń máni men qundylyǵyn eshbir jaǵdaıda da kemite almaıdy. Osy uly merekeniń saltanatty kóńil kúıi árbir úıde ornap, barlyq qazaqstandyqtyń júregin qýanysh pen maqtanyshqa toltyratynyna senimdimin.

Biz qıyndyqtar men kedergilerge qaramastan, alǵa ilgerileýdi jalǵas­tyramyz. Bul joldaǵy bizdiń basty shamshyraǵymyz táýelsizdik boldy jáne solaı bolyp qala beredi.

Osy jyldary shynaıy egemendik pen ulttyń biregeı tutastyǵynyń arqa­synda biz kóp nársege qol jetkizdik. Dál osy júıequraýshy elementter elimizdiń ornyqty, serpindi damýynyń kepiline aınaldy.

Búginde Qazaqstannyń aldynda aý­qym­dy jańa mindetter tur. Biz ekonomıkalyq qýatty, áleýmettik ádil jáne berik tiregi men progresshil qundylyqtary bar ashyq qoǵam quryp jatyrmyz.

Biz júıeli reformalar men sapaly ózgerister jolymen kelemiz. Bul saıasat jalǵasatyn bolady. Buǵan balama joq, endi artqa qaıtý da joq. Bul bizdiń jalpyhalyqtyq konsensýsqa negizdelgen sanaly tańdaýymyz.

Bıyl pandemııa bizdi ǵana emes, búkil álemdi synǵa saldy. Tutas dúnıeniń tynys-tirshiligi ózgerdi. Biz bul synaqqa tótep berip, elimizdi jahandyq daǵdarystan alyp shyǵý úshin bar kúsh-jigerimizdi jumyldyrdyq.

Ekonomıkaǵa qatysty teris boljamdardy joqqa shyǵaryp, indettiń zardabyn azaıttyq. Der kezinde qabyldanǵan sharalardyń arqasynda ahýaldy birshama turaqtandyrdyq. Jahandyq dúrbeleńge qaramastan memleketimizdiń irgesi myǵym, tuǵyry bekem ekenin dáleldedik.

Halqymyz janashyrlyq pen qamqorlyqtyń, uıymshyldyq pen bereke-birliktiń ozyq úlgisin kórsetti. Volonterler qozǵalysy jalpyulttyq sıpatqa ıe boldy. Dárigerler men muǵalimderdiń, tártip saqshylary men áskerı qyzmetshilerdiń kúndelikti ómirimizdegi mańyzdy rólin aıqyn sezindik. Qaýipti dertpen kúrestiń tıimdi júıesi, eń aldymen, solardyń tabandy eńbeginiń arqasynda qalyptasty.

Elimizde karantın jáne tótenshe jaǵdaı rejimi ýaqtyly engizildi.

Epıdemııaǵa qarsy keshendi is-sharalar úshin 350 mıllıard teńgeden astam qarjy bóldik.

Qysqa merzimde jańa juqpaly dert aýrýhanalary salynyp, ondaǵan myń qosymsha tósek qamtamasyz etildi. Qajetti medısınalyq buıymdar men dárilik preparattardyń jetkizilimi jáne óndirisi jolǵa qoıyldy.

Ǵalymdarymyz kidirmesten qazaq­stan­dyq vaksına jasaýǵa kiristi, bul vaksınalar jýyrda ǵylymı synaqtyń bar­lyq kezeńderinen ótedi degen úmittemiz. Koronavırýspen kúrestiń alǵy shebindegi dárigerlerdi qoldaý úshin 200 mıllıard teńge shamasynda qarajat bólindi.

Pandemııa osy strategııalyq mańyzdy salada júıeli reformalardyń ózektiligin anyq baıqatty. Osy maqsatpen biz Densaýlyq saqtaýdy damytýdyń 2025 jylǵa deıingi jańa memlekettik baǵdar­lamasyn qabyldadyq. Ony júzege asyrýǵa 3 trıllıon teńgeden astam qarajat josparlanǵan.

Biz tótenshe jaǵdaı men qatań karan­tındik shekteýler kezinde jappaı haosqa jol bermedik jáne reformalardy júzege asyrýdy jalǵastyrdyq.

Bólingen aýqymdy qarajat onyń maqsatsyz jumsalýyna jol bermeý úshin qatań baqylaýda bolady.

Meniń Prezıdent laýazymyndaǵy basty mıssııam – áleýmettik ádilettilik jáne halyqtyń ál-aýqatyn arttyrý. Sondyqtan memlekettiń kún saıynǵy kúsh-jigeri azamattarymyzdyń ómir sapasyn jaqsartýǵa jumyldyrylady.

Bıyl biz 4 mıllıonǵa jýyq azamaty­myzdyń zeınetaqysy men áleýmettik járdemaqylarynyń kólemin ulǵaıttyq. Áleýmettik saqtandyrý tólemderin ortasha 50%-ǵa kóterdik. Az qamtylǵan otbasylardaǵy 500 myńnan asa bala úshin kepildendirilgen áleýmettik paket engizdik.

Pandemııa kezinde kúrdeli jaǵdaıǵa tap bolǵan adamdardy qoldaý úshin bizdiń óńirde teńdesi joq qadamǵa bardyq. Azamattarymyzǵa 42 500 teńge kóleminde tikeleı tólemder jasaldy. 4,5 mıllıonnan asa azamat memleketten qarjylyq kómek aldy.

Nesıeler boıynsha usynylǵan tólem­derdi keıinge shegerý shamamen 1 mıllıon 900 myń qazaqstandyqtyń defoltqa ushyraýyna jol bermedi. «Jumyspen qamtýdyń jol kartasy mańyzdy turaqtandyrýshy ról oınady. 6,5 myńnan astam áleýmettik, kommýnaldyq jáne kólik ınfraqurylymy jobalaryn júzege asyrýǵa 1 trıllıon teńge baǵyttaldy. Kelesi jyly taǵy 400 mıllıard teńge bólemiz.

Áleýmettik jańǵyrý aıasynda gýma­nıtarlyq mamandyq ıeleriniń mártebesin arttyrýǵa den qoıdyq. Mádenıet jáne óner salasy ókilderiniń eńbekaqysy 50%, dárigerlerdiki – 30%, pedagogterdiki 25%-ǵa ósti.

Biz búgingi tańda ulttyń basty strategııalyq resýrsy adam kapıtalynyń sapasy ekenin bilemiz. Bilim, ıdeıalar men tehnologııalar progrestiń túpki qozǵaýshysy bolyp otyr. Sondyqtan biz Bilim men ǵylymdy damytýdyń 2025 jylǵa deıingi jańa memlekettik baǵdarlamasyn iske qostyq. Ol osy negizgi baǵyttarǵa arnalǵan shyǵystardy IJО́-niń 7 %-na deıin kóterýdi qarastyrady.

Bıylǵy daǵdarysty jaǵdaılarda kúshtik qurylymdardyń tıimdi qyzmetiniń máni kúrt ulǵaıdy. Karantındik is-sharalarǵa jumyldyrylǵan ishki ister organdary qyzmetkerlerin yntalandyrý úshin 18 mıllıard teńgeden astam qarajat bólindi. Kelesi úsh jyl boıynda quqyq qorǵaý qurylymdary men armııada qarjylyq tólemder ortasha 30%-ǵa ulǵaıatyn bolady.

Qoǵamdyq turaqtylyq pen eldiń áleýmettik ilgerileýi berik ekonomıkalyq negiz bolǵanda ǵana múmkin bolady. Qatań shekteýler men karantınge qaramastan, biz halyqtyń ekonomıkalyq belsendiligin saqtap qaldyq, bıznestiń aǵymda bolýyna kómektestik. Shaǵyn jáne orta bıznes sýbektileri daǵdarysqa qarsy sharalar paketi aıasynda nesıelik tólemdi keıinge shegerý múmkindigin, salyqtyq demalys­tar men ózge de jeńildikter, preferensııalar aldy.

Qoldaýdyń jalpy kólemi 1,5 trıllıon teńgeden asty. Bul 8 trıllıon teńgeniń ónimin óndirý kólemin saqtaýǵa múmkindik berdi. 200 myńnan asa jumys orny quryldy, otandyq kompanııalar 500 mıllıard teńge shamasynda memlekettik tapsyrys aldy. Osylaısha, 2025 jylǵa qaraı shaǵyn jáne orta bıznestiń IJО́-degi úlesi 35 %-ǵa jetýge tıis.

Pandemııa kezindegi qıyndyqtarǵa qaramastan, el qambasy astyqqa toldy. Jańa joldar salyndy, turǵyn úıler men ınfraqurylymdyq nysandar boı kóterdi. Bir sózben aıtqanda, tirshilik toqtap qalǵan joq. О́mir óz aǵysymen jalǵasyp jatyr.

Bıyl dıqandarymyz 20 mıllıon tonna bıdaı jınady. Bul ishki suranysty qamtamasyz etýge, sondaı-aq shetelge eksporttaýǵa da jetedi.

10 mıllıon sharshy metrden astam turǵyn úı salyndy. 2600 shaqyrym tas jol paıdalanýǵa berildi. Elimizdiń 10 mıllıonǵa jýyq turǵyny kógildir otyn­ǵa qol jetkizdi. Sıfrlandyrý bary­synda júzdegen aýyl ınternetke qosyl­dy. Ar­naıy kútimge muqtaj azamattar­dyń tur­mys sapasyn jaqsartý úshin Áleý­met­tik qyzmetter portaly jumys isteı bastady.

Múlde jańa Ekologııalyq kodeks ázirlendi.

Bılik pen qoǵam arasyndaǵy syndarly dıalog laıyqty jalǵasyn tapty. Ulttyq qoǵamdyq senim keńesinde bilim berý jáne densaýlyq saqtaý máseleleri, sondaı-aq saıası jańǵyrýdyń negizgi baǵyttary talqylandy.

Saıası reformalardyń alǵashqy paketi júzege asyryldy. «Beıbit jınalys­tar týraly» óte mańyzdy jańa zań qabyl­dandy. «Saıası partııalar týraly», «Saı­laý týraly», «Parlament jáne onyń de­pýtat­tarynyń mártebesi týraly» zańna­malyq aktilerge ózgerister engizildi.

Ulttyq keńestiń bastamasymen toǵyz zań qabyldandy. Taǵy jeti zań jobasy qaralyp jatyr. Bul – Keńes jumysynyń qajettigi men tıimdiliginiń aıqyn kórinisi.

Biz basshylardyń jańa býynyn daıyndaýǵa basa mán berdik. Prezıdenttik kadr rezervindegi jastardyń jartysynan kóbi qazirdiń ózinde jaýapty qyzmetterge taǵaıyndaldy. Jobanyń kelesi kezeńinde qoǵam múddesine adal kóshbasshylardy irikteýge erekshe nazar aýdaramyz.

Barsha álemge qıyndyq ákelgen osy jyly da birshama jetistikke jettik. Bul oraıda qajyrly eńbegimen jańa Qazaqstandy órkendetýge atsalysyp júrgen barlyq azamattarǵa shynaıy rızashylyǵymdy bildiremin.

Halqymyz indetti birge eńserip, birtutas ult retinde birligin nyǵaıta túsedi dep senemin.

Biz qazirgideı kúrdeli kezeńde osal tustarymyzdy aıqyndadyq. Aldaǵy maqsatymyzdy mejelep, oǵan jetýdiń baǵyttary men joldaryn anyqtap aldyq. Bul máselelerge men óz Joldaýymda tolyǵyraq toqtaldym. Aldaǵy min­det­terdi tıimdi júzege asyrsaq, ornyqty damý jolyna túsetinimiz anyq.

Qymbatty otandastar!

Bizdiń kóz aldymyzda jańa álemdik tártip qurylyp jatyr. Geostrategııalyq belgisizdik jaǵdaıynda elderdiń halyqaralyq arenada saıası ózimshildigi men ekonomıkalyq ultshyldyǵy kúsheıip keledi. Biz memleketter arasyndaǵy senim deńgeıiniń qalaı kúrt quldyrap, olardyń arasynda resýrstar men yqpal úshin kúrestiń qandaı qatań forma ala bastaǵanyn kórip otyrmyz.

Búginde halyqtardyń jahandyq mártebesi kóp jaǵdaıda tehnologııalyq kóshbasshylyq úshin jantalasqan jarys­pen aıqyndalýda. Sondaı-aq biz búkil álemde dinı qarama-qaıshylyqtardyń óristeýiniń jáne ksenofobııalyq kóńil kúıdiń kúsheıe túsýiniń kýágerleri bolyp otyrmyz.

Qazirgi kezde ekologııalyq proble­ma­lar­ ótkir aıtyla bastady. «Munaı dáýiriniń» taıaý arada aıaqtalatyny týraly boljamdar da naqtyraq sıpat alyp keledi. Osy syn-qaterler men álemdik tepe-teńsizdikter koronavırýs pandemııasynyń aıasynda kúrt ýshyǵyp otyr. Sondyqtan eldi damytýdyń ishki jáne syrtqy mindetteriniń úılesim tabýynyń mańyzy kúrt artady.

Bizge Qazaqstannyń naqty básekege qabilettiligin joǵarylatý úshin barlyq kúsh-jiger men resýrstardy jumyldyrý qajet. Búginde árbir azamattyń ultty toptastyrý men Táýelsizdik qundylyqtaryna alǵaýsyz qyzmet etýi qaı kezdegiden de mańyzdy.

Biz kópjaqty qurylymdar men Birik­ken Ulttar Uıymynyń rólin kúsheı­týge yqpal ete otyryp, ózimizdiń syrt­qy baǵytymyzdy halyqaralyq qaýipsiz­dik júıesin nyǵaıtý jolynda jalǵas­tyramyz. О́zimizdiń ulttyq múddemizdi berik qorǵap, qazirgi zamanǵy kóp polıarly álemde óziniń tıimdiligin dáleldegen teńdes­tirilgen jáne konstrýktıvti syrtqy saıasatymyzdy dáıektilikpen júrgi­zetin bolamyz.

Qadirli áleýmet!

Egemendik dáýiriniń taǵy bir paraǵy el shejiresine enip, tarıh taspasyna jazyldy.

Bıyl Abaı Qunanbaıuly jáne Ábý Nasyr ál-Farabıdiń mereıtoılary ótti.

Biz halqymyz úshin mańyzdy bul sharalardy mazmundy ári maǵynaly etip uıymdastyrýǵa kúsh saldyq.

Tarıhı tulǵalardan ónege alýǵa, taǵylymdy oı tolǵaýǵa mán berdik.

Ál-Farabı zamanynan beri tutas dáýir, Abaı qoǵamynan beri ǵasyrdan astam ýaqyt ótti.

Biraq ulylarymyzdyń asyl murasy kúni búginge deıin ózekti.

Dala danyshpandary – árdaıym bolashaqqa baǵyt silteıtin aınymas temirqazyǵymyz.

Ulttyń jańa bolmysy tuǵyrly tulǵalardyń ósıetinen, ónegesinen bas­taý alady.

Taǵylymdy tarıh pen kemel keleshekti ushtastyrý – Rýhanı jańǵyrýdyń basty sharty.

Sondaı-aq kıeli Túrkistandy túletý jolynda aýqymdy jumystar atqarylýda.

Ulytaýda Joshy han tarıhı-mádenı kesheniniń qurylysy bastaldy.

Ulylardy ulyqtap, tulǵalardy tanytý – bizdiń buljymas saltymyz.

Bul mereıtoılardyń mán-mańyzy Táýelsizdik qundylyqtarymen astasyp jatyr.

Qurmetti qazaqstandyqtar!

Táýelsizdigimizdiń 29-jyly kúrdeli, dramatızmge toly, qalyptan tys boldy. Osy taqylettes taǵdyrsheshti synaqtar ár býynnyń basyna túse bermeıdi. Bolashaqta urpaqtarymyz bizdiń kúsh-jigerimizdi laıyqty baǵalaıtynyna senimdimin. Jahandyq daǵdarystan  shynyǵa otyryp, aldymyzǵa budan da batyl maqsattar men mindetter qoıamyz.

Aldaǵy jyl biz úshin mejeli jyl bolady. Ol Otanymyz Táýelsizdiginiń 30 jyldyǵy aıasynda ótedi. Bul – qorytyndy shyǵaryp, ótken jolymyzdy saralaıtyn ýaqyt. Biz halqymyz úshin asa mańyzdy osy datany naqty isterimizben jáne jańa joba-josparlarymyzben atap ótemiz.

Biz dańǵaza aksııalar men pafostyq is-sharalar formatynan bas tartamyz, barlyq jumys barynsha pragmatıkalyq turǵyda, men aıtar edim, únemdi jasalatyn bolady. Biz ekonomıkada, áleý­mettik salada, ekologııada aýqymdy júıe­li sharalar keshenin júzege asyrýdy jal­ǵas­tyramyz. Halyqtyń barlyq jiginiń, ásirese jastardyń, áıelderdiń, múmkin­dikteri shekteýli adamdardyń muqtaj­dyq­tary men qajettilikterine jiti nazar aýdaramyz.

Biz elimizdi saıası jańǵyrtý úderisterin berik jalǵastyrý nıetindemiz. Qazir reformalardyń tolyq paketi daıyndalý ústinde, ol týrasynda kelesi jyl­dyń basynda jarııalaıtyn bolamyz. Bul elimizde «qulaq asatyn memleket» qurýǵa, ádiletti jáne teń múmkindikter qaǵı­dat­taryn ilgeriletý men bekitýge baǵyt­talǵan demokratııalyq ózgeristerge jańa serpin beredi.

Elimiz úshin aldaǵy jylǵy mańyzdy oqıǵa Májilis pen barlyq deńgeıdegi máslıhattar saılaýlary bolady. Olar bizdiń qoǵamnyń joǵary azamattyq belsendiligi men saıası tolysqandyǵynyń aıǵaǵy bolatynyna senimdimin. Saılaý naýqany Qazaqstan memlekettiliginiń ınstıtýttyq ornyqtylyǵyn taǵy da aıqyn dáleldeıdi.

Ár jyl saıyn táýelsizdiktiń asqaq ǵımaratynyń jańa qabattaryn turǵyza otyryp, biz elimiz ben ultymyzdyń bola­­shaǵyn da júıeli qalyptastyryp  kele­miz.

Biz óskeleń urpaq úshin damýdyń keń de qyzyqty kókjıekterin ashamyz. Olardyń jasampazdyq pen progress jolynda jańa bıikterdi baǵyndyryp, táýelsizdigimizdiń týyn qazirgiden de joǵary kótere alatynyna senimdimin.

Qurmetti qaýym!

 Qazaqstannyń búgingi jetistikteri – barsha otandastarymyzdyń ortaq eńbeginiń jemisi.

«Azattyq – eldiń muraty, abyroı – erdiń muraty» deıdi halqymyz.

Memleketimizdiń damýy jolynda adal qyzmet atqaryp júrgen dara tulǵalarymyz barshylyq.

Biz jyl saıynǵy dástúr boıynsha táýelsizdik kúni qarsańynda osyndaı azamattardy ulyqtaımyz.

Búgin meniń Jarlyǵymmen birqatar qaıratker memlekettik marapatqa ıe boldy.

Atap aıtqanda, bıyl elimizdiń eń joǵary ataǵy Murat Amangeldiuly Qaıyrgeldınge berildi. Ol óndiris salasyn órkendetýge qosqan zor úlesi úshin «Qazaqstannyń Eńbek Eri» atandy.

Osyndaı azamattardyń eńbek joly – kópshilikke, ásirese óskeleń urpaqqa jaqsy úlgi.

«Qazaqstannyń Eńbek Eri» ataǵy sondaı-aq Temirtaý metallýrgııa kombı­na­tynyń atqarýshy dırektory Vadım Borısovıch Basınge de beriledi. Kásip­orynda 30 jyldan astam jumys istegen ol zaýyttyń jumysshysynan top-menedjerine deıingi joldan ótti.

Bıyl joǵary memlekettik nagra­dalar, sonymen qatar bir top dáriger men medıkterge berilgenin, olardyń ishinde óz  ómir­lerin koronavırýs pandemııasymen kúres­te qıǵandar da bar ekenin erekshe atap ótkim keledi.

«Qazaqstannyń Eńbek Eri» ataǵy­na qaza tapqannan keıin Oleg Nıkolae­vıch Isaev, Qalıhan Esbosynuly Qozba­ǵarov laıyqty dep tabyldy. Olardyń er­júrektigi men batyrlyǵy qazaqstan­dyq­tardyń jadynda árdaıym saqtalady.

Búgin «Otan» ordenimen jeztańdaı ánshi Maıra Muhamedqyzy marapattaldy.

Maıra – álemniń eń áıgili sahnalarynan jarqyraı kórinip, qazaq ónerin dáriptep júrgen daryn ıesi. О́kinishke qaraı, Maıra densaýlyǵyna baılanysty búgin kele almady.

Barshaǵa tanymal talantty óner sańlaqtarynyń biri Jánııa Áýbákirova birinshi dárejeli «Barys» ordenin ıelendi.

Onyń óneri men sheberligi halyq­aralyq deńgeıde moıyndalǵan.

Sondaı-aq birinshi dárejeli «Barys» ordenimen kórnekti aqyn Shómishbaı Sarıev marapattaldy.

Ol – ózindik óleń órnegi arqyly el qurmetine bólengen qalamger.

II dárejeli «Aıbyn» ordenimen podpolkovnık Ivan Valerevıch Gavrılko marapattaldy. Ol otqa oranǵan joıǵysh ushaqty eldi mekennen buryp áketip, kóptegen adamnyń ómirin saqtap qaldy.

Belgili qoǵam qaıratkeri, dintanýshy ǵalym Qaırat Joldybaıuly «Qurmet» ordenine laıyq dep tanyldy.

Ol jas urpaqtyń jańasha kózqarasyn qalyptastyrýǵa eleýli eńbek sińirdi.

Sonymen qatar «Qurmet» ordenimen tarıhshy ǵalym, tanymal qalamger Tursynhan Zákenuly marapattaldy.

Belgili ánshi Svetlana Aıtbaeva «Qurmet» ordenimen nagradtaldy.

Ol ónerimizdi damytýǵa, jas talanttardy tárbıeleýge mol úles qosyp keledi.

 «Qurmet» ordeni «Respýblıkalyq jedel medısınalyq járdem ǵylymı ortalyǵynyń» aǵa feldsheri Fatıma Iаkýpovna Jakenovaǵa tapsyrylatyn bolady. Kóptegen jyl boıy densaýlyq saqtaý salasynda qaısarlyqpen eńbek etip kele jatqan ol búginde koronavırýs­pen kúreske aıtarlyqtaı úles qosyp júr.

Polısııa ınspektory Berikbol Kók­segenge «Erligi úshin» medali beriledi.

Berikbol qyzmettik mindetin atqarý kezinde adam ómirin ajaldan arashalap qaldy.

«Jaýyngerlik erligi úshin» medalimen Nur-Sultan qalasyndaǵy órt sóndirý bóliminiń bólimshe komandıri Qaıyrbek Nurlanuly Jumanbaev marapattalady. Ol ajal aýzyndaǵy adamdy qutqarý kezinde sheshimtaldyq pen batyrlyq tanyta bildi.

Tanymal jýrnalıst Iýlııa Kýshnareva «Eren eńbegi úshin» medalimen marapattaldy.

Memlekettik nagradalarmen basqa da belgili jýrnalıster atap ótildi.

Ulttyq neırohırýrgııa ortalyǵynyń bó­lim meńgerýshisi, bilikti dáriger Serik Ká­ri­baıǵa «Shapaǵat» medali tabys etiledi.

Sondaı-aq bıylǵy Volonter jylynda eren eńbegimen erekshelengen Nurbaný Ámirǵalıeva, Natalıa Konovalova jáne Sáýle Muqasheva «Shapaǵat» medalimen marapattaldy.

Táýelsizdik kúni qarsańynda joǵary nagradalarmen birge, óz salasynda eleýli tabystarǵa jetip, zor eńbek sińirgen birqatar azamatqa memlekettik syılyqtar tapsyrylady.

 Bıyl «Qazaqstannyń Tuńǵysh Prezıdenti – Elbasynyń Memlekettik beıbitshilik jáne progress syılyǵy» akademık Tóregeldi Sharmanovqa berildi. Ol medısına salasyn damytýǵa, beıbitshilikti jáne halyqtar arasyndaǵy dostyq pen ózara senimdi nyǵaıtýǵa erekshe úles qosty.

«Qazaqstannyń Tuńǵysh Prezıdenti – Elbasynyń Memlekettik beıbitshilik jáne progress syılyǵy» 10 jyl boıy elimizdegi joǵary bilim berýdiń flagmany – Nazarbaev Ýnıversıtetti basqaryp ke­le jatqan Shıgeo Katsý myrzaǵa berildi.

Halyqtyń oı-sanasy jáne tanym deńgeıi rýhanı qazynasyna qarap baǵalanady. Uly Abaıdy ulyqtaǵan jyly Abaı atyndaǵy memlekettik syılyqqa ıe bolýdyń mán-mańyzy zor. Ádebıet pen óner salasyndaǵy eń tańdaýly shyǵarmalar úshin beriletin joǵary marapat bıyldan bastap uly aqynnyń atymen atalatyn boldy.

Bıyl kórnekti jazýshylar Tynymbaı Nurmaǵambetov pen Roza Muqanova, belgili aqyndar Serik Aqsuńqar men Baqytjan Qanapııanov, tanymal ádebıettanýshylar Myrzataı Joldasbekov, Saýytbek Abdrahmanov jáne Ǵarıfolla Esim memlekettik syılyqtyń laýreaty atandy. Sizderdiń týyndylaryńyz qazaq ádebıetiniń kókjıegin keńeıtip, ulttyq sanany baıyta túsedi dep senemin.

Uly Abaı «Dúnıe de ózi, mal da ózi, Ǵylymǵa kóńil berseńiz» dep, bar ıgiliktiń bastaýy ǵylym ekenin basa aıtqan. Osy salada zor tabysqa jetken azamattar da búgin bizdiń ortamyzda. Olar ǵylym men óndiristi ushtastyryp, elimizdi órkendetýge óz úlesterin qosýda.

Ál-Farabı atyndaǵy ǵylym men tehnıka salasyndaǵy memlekettik syılyq Qaraǵandy tehnıkalyq ýnıversıtetiniń professory Arıstotel Isaǵulov basta­ǵan ǵalymdar tobyna berildi. Olardyń zertteý jumystary tehnıka salasyna jańa tehnologııa engizýdi kózdeıdi.

Sondaı-aq osy syılyqqa Ulttyq ǵylymı medısınalyq ortalyqtyń jetekshisi Abaı Baıgenjın bastaǵan bir top ǵalymdarymyz laıyq dep tanyldy. Olardyń eńbegi ınnovasııalyq tehnologııalardy klınıkalyq medısınada qoldanýǵa arnalǵan. Bul – otandyq densaýlyq saqtaý júıesi úshin mańyzdy ǵylymı jumys.

Ál-Farabı atyndaǵy ǵylym men tehnıka salasyndaǵy memlekettik syılyq mańyzdy ǵylymı jumystardyń sıkly úshin Matematıka jáne matematıkalyq modeldeý ınstıtýtynyń bas dırektory Mahmud Abdysametuly Sadybekovke beriledi. 

Qadirli qaýym!

 Sizderdi búgingi marapattaryńyzben shyn júrekten quttyqtaımyn!

Bárimizdiń maqsatymyz – ortaq, mindetimiz – bir.

Qasıetti Otanymyzdyń mereıi árdaıym ústem bolsyn!

Barshańyzǵa tolaǵaı tabys tileımin!

Táýelsizdigimiz tuǵyrly, eldigimiz ǵumyrly bola bersin!